បើទោះជាប្រតិភូសហភាពការងារកម្ពុជា របស់លោក អាត់ ធន់ បានធ្វើដំណើរដល់ពន្ធនាគារត្រពាំងថ្លុង ក្នុងខេត្ត​កំពង់ចាមហើយក៏ដោយ ក៏មន្រ្តីអនុរក្សពន្ធនាគារ ដោយមានបទបញ្ជា ពីអគ្គនាយកដ្ឋានពន្ធនាគារនៃក្រសួងមហាផ្ទៃ បានសម្រេចមិនអនុញ្ញាតឲ្យលោក អាត់ ធន់ និងសហការីចូលសួរសុខទុក្ខលោក វន់ ពៅ នោះដែរ តែបាន​អនុញ្ញាត​ឲ្យភរិយា និងមេធាវីរបស់លោក វន់ ពៅ ចូលជួប។

ពន្ធនាគារត្រពាំងថ្លុង ជិតព្រំដែនវៀតណាម មើលពីលើប្រព័ន្ធផ្កាយរណបរបស់ហ្គូហ្គ័ល។

សិទ្ធិមនុស្ស - ប្រធានសហភាពការងារកម្ពុជា លោក អាត់ ធន់ បានថ្លែប្រាប់ទស្សនាវដ្តីមនោរម្យព័ងអាំងហ្វូ តាមរយៈ​ទូរសព្ទពីខេត្តកំពង់ចាម នៅថ្ងៃទី២៤ ខែមករា ឆ្នាំ២០១៤ នេះថា៖ «យើង និងសហជីពបានមកដល់ពន្ធធនាគារ តែ​គេ​មិនឲ្យពួកយើងចូល គេឲ្យចូលតែមេធាវី និងបងប្អូន។ ចំពោះអង្គការផ្សេងៗគេអត់ឲ្យចូល យើងសោកស្តាយដែល​គេ​មិនឲ្យចូលជួប។»

គួរកត់សម្គាល់ថា លិខិតឆ្លើយតបថ្មីៗនេះ របស់លោក គុយ ប៊ុនសន អគ្គនាយកនៃអគ្គនាយកដ្ឋានពន្ធនាគារ នៃ​ក្រសួង​មហាផ្ទៃ ដែលបានផ្ងើរជូន លោក អាត់ ធន់ ប្រធានសហភាពការងារកម្ពុជាបានបញ្ជាក់ថា ករណីជន​ជាប់​ឃុំ​ឈ្មោះ វន់ ពៅ កំពុងស្ថិតនៅក្នុងដំណាក់កាល ស៊ើបអង្កេតរបស់ស្ថាប័នតុលាការ។ ដូច្នេះ ក្រៅពីគ្រួសារ និងមេធាវី​របស់​ជនជាប់ឃុំ សមត្ថកិច្ចមិនអាចអនុញ្ញាត ឲ្យអ្នកផ្សេងចូលជួបបានឡើយ។

គួររម្លឹកថា លោក វន់ ពៅ ជាប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ និងមនុស្សចំនួន​២២​នាក់ទៀត ត្រូវបានសមត្ថកិច្ចគ្រប់គ្រងដោយរដ្ឋាភិបាលគណបក្សប្រជាជនកម្ពុជា ចាប់ខ្លួន កាលពីថ្ងៃទី០២ និងទី០៣ ខែមករា ឆ្នាំ២០១៤ ក្នុងអំឡុងពេលនៃការប៉ះទង្គិចគ្នា យ៉ាងហិង្សារវាងកម្លាំងសមត្ថកិច្ច និងក្រុមបាតុករ នៅរោងចក្រ​យ៉ាកជីង និងសួនឧស្សាហកម្ម កាណាឌីយ៉ា ផ្លូវវេងស្រេង។

ក្រោយពីការចាប់ខ្លួនជនទាំង២៣នាក់ ដែលរដ្ឋាភិបាលចាត់ទុកថាជា«ជនល្មើស» ត្រូវបានសមត្ថកិច្ចបញ្ជូនខ្លួន ទៅ​ឃុំក្នុងពន្ធនាគារ ត្រពាំងថ្លុង លើទឹកដីខេត្តកំពង់ចាម ក្បែរព្រំដែនវៀតណាម ដើម្បីរង់ចាំការផ្តន្ទាទោស។ តែសម្រាប់ ក្រុមអង្គការសង្គមស៊ីវិលជាតិ និងអន្តរជាតិ សកម្មជនដីធ្លី និងគណបក្សសង្គ្រោះជាតិ ដែលជាគណបក្សជំទាស់ បាន​ចាត់ទុកជនទាំង២៣នាក់នោះ ថាជាជនរងគ្រោះដោយ«អយុត្តិធម៌» នឹងកំពុងទាមទារឲ្យដោះលែងពួកគេ ដោយបាន​ធ្វើការតវ៉ា និងដាក់ញត្ដិជាបន្ដបន្ទាប់តាមបណ្តាស្ថានទូតនានា ជាពិសេសប្រទេសមហាអំណាច ប្រចាំកម្ពុជា៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី២៤ ខែមករា ឆ្នាំ២០១៤