ប្រតិកម្ម​សហជីព​និង​កម្មករ តប​លិខិត​ GMAC ផ្ញើ​ទៅ​ក្រសួង​ការងារ

លិខិតមួយ ដែលខាងសមាគមរោងចក្រកាត់ដេរកម្ពុជា បានផ្ញើលិខិតមួយជួនរដ្ឋមន្រ្តីក្រសួងការងារ កាលពីថ្ងៃទី០៨ ខែមករា ឆ្នាំ២០១៤កន្លងទៅ ត្រូវបានតំណាងសហជីព និងកម្មករប្រតិកម្មតបថា បាតុកម្មអាចនឹងកើតមានសាជាថ្មី។
Loading...
  • ដោយ: ប្រាថ្នា
  • កែប្រែចុងក្រោយ: January 09, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

លិខិតមួយ ដែលសមាគមរោងចក្រកាត់ដេរកម្ពុជា បានផ្ញើជួនទៅរដ្ឋមន្រ្តីក្រសួងការងារ កាលពីថ្ងៃទី០៨ ខែមករា ឆ្នាំ២០១៤កន្លងទៅ ត្រូវបានតំណាងសហជីព និងកម្មករប្រតិកម្មតបថា បាតុកម្មអាចនឹងកើតមានសាជាថ្មី។


លោក អាត់ ធន់ (ខាងឆ្វេង) ក្នុងអង្គប្រជុំសម្រេចការតម្លើងប្រាក់បៀវត្សកម្មករ នៅក្រសួងការងារថ្ងៃទី២៤ខែធ្នូ ឆ្នាំ២០១៣។ (រូបថត MONOROOM.info/ O. Vary)

ប្រាក់ខែកម្មករ - កាលពីថ្ងៃកាលទី០៨ ខែមករា ឆ្នាំ២០១៤ សមាគមរោងចក្រកាត់ដេរកម្ពុជា បានផ្ញើលិខិតមួយទៅ​រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈលោកអ៊ិត សំហេង ក្នុងគោលបំណងអោយក្រសួង​ចេញសេចក្តី​ជូន​ដំណឹងមួយ អំពីការដែលកម្មករមិនទទួលបានប្រាក់ឈ្នួល ក្នុងអំឡុងពេលធ្វើកូដកម្ម-បាតុកម្មនៅពេលថ្មីៗនេះ ដោយ​សំអាងថា ក្នុងពេលកូដកម្ម-បាតុកម្មនោះ ព្រឹត្តិការណ៍បានបង្កអោយរោងចក្រជាច្រើន​បានខាតបង់ទឹកប្រាក់​សរុប​មិនតិចជាង២០០លានដុល្លា និងទ្រព្យសម្បត្តិមួយចំនួនត្រូវបានបំផ្លាញ។

នៅក្នុងកិច្ចសម្ភាសមួយ ជាមួយទស្សនាវដ្ដីមនោរម្យព័ងអាំងហ្វូ លោក អាត់ ធន់ ប្រធានសហភាពការងារកម្ពុជា​ប្រតិកម្មតបថា នោះជាការព្យាយាម របស់សមាគម ថៅកែរោងចក្រ ក្នុងការមិនផ្តល់ប្រាក់ឈ្នួលអោយកម្មករ។  ប្រធានសហជីពរូបនេះ បាននិយាយប្រកបដោយសុទ្ទិដ្ឋិនិយមថា «តែក៏មាន​ក្រុមហ៊ុនមួយចំនួនដែល​គេបានរក្សា​ប្រាក់ឈ្នួល និងប្រាក់រង្វាន់ផ្សេងៗអោយនៅដដែល និងមួយចំនួនទៀត​ គេ​កាត់តែប្រាក់ថ្ងៃ ដោយទុកប្រាក់​រង្វាន់​និងប្រាក់ផ្សេងៗទៀត។» លោក អាត់ ធន់ បានបន្ថែមទៀតថា «ការដែលនិយោជក ពន្យា​ពេលមិនបើកប្រាក់ខែ​ជូន​កម្មករនេះ វាកំហុសធ្ងន់របស់និយោជក។ ដែលជាទូទៅប្រាក់ខែ ​ត្រូវតែបើកអោយ​កម្មករ​តាមពេល។ បើសិនជាយឺត យ៉ាងយូរណាស់ត្រឹមតែរយៈពេលពីសប្តាហ៏ប៉ុណ្ណោះ។»

កន្លងមកក្នុងការធ្វើកូដកម្ម-បាតុកម្មរបស់កម្មករ ក្រុមនិយោជកព្យាយាមធ្វើការចរចារជាមួយកម្មករ ដោយមិនកាត់​ប្រាក់​ឈ្នួល ប្រាក់រង្វាន់និងប្រាក់ផ្សេងៗ ដើម្បីជាថ្នូរនឹងការចូលធ្វើការរបស់កម្មករវិញ។ តែបើសិនជាខាងសមាគម​រោងចក្រ​កាត់ដេរកម្ពុជា មិនសម្រុះសម្រួលជាមួយកម្មករទេនោះ វាអាចនឹងធ្វើអោយសភាពការណ៍​ដែលស្ងប់ស្ងាត់​នេះពុះ​កញ្រ្ជោលឡើងវិញ។ ទាក់ទងនឹងបញ្ហានេះលោកអាត់ ធន់ បានបញ្ជាក់អះអាងទៀតថា «យើងឃើញថាកម្មករ បាន​ចូលធ្វើការវិញ តាំងពីថ្ងៃទី៦មកម្លេះ បើខាង"ជីម៉ាក់"គេធ្វើបែបនេះ វាកាន់តែបង្កបញ្ហានោះទេ ហើយអាចធ្វើ​អោយ​​កម្មករ ដែលចូលធ្វើការវិញនោះ អាចនឹងធ្វើបាតុកម្មសារជាថ្មី»។

សំរាប់វិធានការណ៍បន្តបន្ទាប់ ក្នុងការដោះស្រាយបញ្ហានេះ ប្រធានសហជីពល្បីឈ្មោះរូបនេះ បានបញ្ជាក់ថា «យើង​បាន​ជំរុញអោយក្រុមហ៊ុនដោះស្រាយបញ្ហាប្រាក់ខែកម្មករនេះឡើងវិញ និងស្នើសុំអោយខាងក្រុមហ៊ុន មានការផ្តល់​ប្រាក់​ឈ្នួល និងប្រាក់រង្វាន់ ទៅអោយកម្មករ ដើម្បីអោយពួកគាត់មានទឹកចិត្តក្នុងការធ្វើការអោយក្រុមហ៊ុនឡើវិញ។»

លោក ជួន មុំថុល គ្រោងធ្វើបាតុកម្មប្រឆាំងបក្សប្រឆាំង និងសហជីពទាំង៦

ដោយឡែក លោកជួន មុំថុល ប្រធានសហភាពសហព័ន្ធសហជីពជាតិកម្ពុជា ដែលបានគាំទ្រនូវគោលជំហរ របស់​សមាគមរោងចក្រកាត់ដេរកម្ពុជា (​GMAC) នោះ បានពន្យល់ថា តាមច្បាប់ការងារនៃប្រទេសកម្ពុជា ថ្ងៃធ្វើកូដកម្ម កូដករនឹងមិនទទួលបានប្រាក់ខែទេ។ ផ្ទុយពីការថ្លែងរបស់ លោក អាត់ ធន់ ដែលនិយាយទាក់ទងរវាងតែកម្មករ និង​ថៅកែរោងចក្រ លោកជួន មុំថុល បានថ្លែងដាក់បន្ទុកទៅគណបក្សសង្រ្គោះជាតិ និងមេដឹកនាំសហជីព​ទាំង​ប្រាំមួយ​ថា «ធ្វើអោយកម្មករមួយចំនួនដែលចង់ធ្វើការ ត្រូវប្រឈមមុខនឹងការកាត់លុយរបស់ក្រុមហ៊ុនដែរ»។

ចំពោះការមិនទទួលបានប្រាក់ខែ របស់កម្មករក្នុងអំឡុងពេលធ្វើបាតុកម្មនេះ លោកជួន មុំថុលអះអាង នឹងគ្រោង​ធ្វើបាតុកម្មប្រឆាំងគណបក្សសង្រ្គោះជាតិ និងអ្នកដឹកនាំសហជីពទាំងប្រាំមួយ ដែលធ្វើអោយកម្មករបាត់ប្រាក់ខែ ដែលគម្រោង នៃការធ្វើបាតុកម្មនេះ លោកមិនទាន់បានកំណត់ពេលនៅឡើយទេ រងចាំដល់ថ្ងៃទី១០ ដែលជាថ្ងៃ​កម្មករបើកប្រាក់ខែសិន។

ការគម្រាមធ្វើបាតុកម្មខាងលើនេះ ជា«បញ្ហាមួយ គោលជំហរពីរ» រវាងក្រុមសហជីពស្និតនឹងលោក អាត់ ធន់ និង​ក្រុម​ដែល​ស្និត​នឹងលោកជួន មុំថុល។ ប៉ុន្តែសម្រាប់ក្រុមកម្មករខ្លួនឯង បានគម្រាមរួចជាស្រេចដែរថា បើរោងចក្រ​មិនបើក​ប្រាក់ខែ​កម្មករ​ទេនោះ បាតុកម្មតវ៉ានឹងកើតមាន។ «ថ្ងៃទី១០នេះ បើរោងចក្រមិនបើកប្រាក់​អោយកម្មករ​ទេនោះ ថ្ងៃ​ទី​១១​យើងនឹងនាំ​គ្នាធ្វើកូដកម្ម» នេះការលើកឡើងរបស់លោក ទ្រី ស៊ុ ជាតំណាងកម្មករមួយរូប​មកពី​រោងចក្រអ៊ីខាង។

សូមបញ្ជាក់ថា ចាប់ពីថ្ងៃទី២៥ ខែធ្នូ ឆ្នាំ២០១៣ បន្ទាប់ពីការសម្រេចរបស់ក្រសួងការងារ បានកំណត់​លើប្រាក់ខែ​គោលកម្មករ ៩៥ដុល្លាក្នុងមួយខែរួចមក កម្មករបាននាំគ្នាធ្វើកូដកម្ម-បាតុកម្ម មិនចូលធ្វើការដោយទាមទារ ប្រាក់​អប្បបមា ១៦០ដុល្លាក្នុងមួយខែ រហូតមានការបង្រ្កាបយ៉ាងហិង្សា នៅតំបន់សេដ្ឋកិច្ចពិសេសភ្នំពេញ និងនៅមុខសូន​កាណាឌីណាលើផ្លូវវេងស្រេង។ ប៉ុន្តែរាប់ចាប់តាំងពីថ្ងៃទី៦ រហូតមកដល់ថ្ងៃទី៩ ខែមករានេះ កម្មកស្ទើតែ១០០% បាន​ចូល​ធ្វើការ​ធម្មតាវិញហើយ៕

--------------------------------------------------------
ដោយ ៖ ក. ចាន់នីតា - ភ្នំពេញ ថ្ងៃទី០៩ ខែមករា ឆ្នាំ២០១៤
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ contact@monoroom.info
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...