ត្រូវបូជាតែមិនស្លាប់ - នេះដែលខ្មែរតែងមានជំនឿថា«ភ្លឹក»។ អ្នកជឿជំនឿនេះ បានគិតថារូបនៅមិនទាន់ស្លាប់នៅឡើយ ដោយសារតែ​ព្រលឹង​កំពុងស្វែងរករាងកាយ ដើម្បីចូលមកសណ្ឋិតវិញ។ ករណីខ្លះ ញាតិមិត្តរបស់«រូប» ថែមទាំងស្វែង​រក​គ្រូអាចារ្យ មកសូត្រធម៌ហៅ​ព្រលឹងឲ្យត្រឡប់មកវិញទៀតផង។ តែករណីរបស់ទារកដែលទើបនឹងកើតនេះ មាន​លក្ខណៈ​ខុសពីជំនឿ ដែល​កើតមាន​នៅប្រទេសកម្ពុជាយើង ដោយសារតែក្រុមគ្រូពេទ្យដែលបង្កើតទារកចេញពីផ្ទៃម្ដាយ បាន​ប្រកាសថា ទារកបានស្លាប់បាត់​ទៅវិញបន្ទាប់ពីវាបានប្រសូតហើយ ដែលទំនងជាមកពីមូលហេតុ​ចាប់ទម្រង់ខុសនៅ​ក្នុង​ផ្ទៃ។

តែដឹងអីទារក ដែលរៀបនឹងត្រូវបានបូជា នៅឈាបនដ្ឋានទៅហើយ បែរជាមានជីវិតរស់នៅត្រឡប់មកវិញ។ នេះ​បើ​តាម​ការផ្សាយឲ្យដឹងរបស់ ទីភ្នាក់ងារសារព័ត៌មានផ្លូវការចិនថ្មី របស់ប្រទេសចិន។ បុគ្គលិកដែលធ្វើការនៅឈាបនដ្ឋាន បាន​លឺសម្លេងទារកស្រែកយំ  ហើយបានបញ្ជូនទារកដែលចង់រស់នេះ ត្រឡប់ទៅកាន់មន្ទីរពេទ្យវិញ។

វេជ្ជបណ្ឌិតម្នាក់ត្រូវបញ្ឈរជើង និងជំនួយការម្នាក់ទៀត ត្រូវបានបណ្ដេញចេញពីការងារ

ទារកបានវិលត្រឡប់ទៅកាន់គ្រឹះស្ថានសុខភាព ដែលបានជួយឲ្យវាប្រសូតចេញ នៅក្នុងទីក្រុង អាញវី (Anhui - ផ្នែកខាង​កើតនៃប្រទេសចិន)។ សមាជិកម្នាក់ដែលបម្រើការក្នុងគិលានុបដ្ឋាននោះ បាននិយាយថា «ដោយសារតែទារក​បាន​បង្ហាញ​ថាវានៅមានជីវិតនៅឡើយ យើងបានកំពុងផ្សាំចិញ្ចឹមវាជាបន្តទៅទៀត»។

សារព័ត៌មានចិន បាននិយាយទៀតថា ការបន្សាំ​នេះ មិនសូវជាមានសង្ឃឹមប៉ុន្មានទេ ដោយសារតែឪពុកម្ដាយរបស់ទារកទើបនឹងយល់ព្រម ឲ្យបញ្ចប់ការព្យាបាលថែរក្សា​កូនតូចរបស់ខ្លួន ដោយហេតុថាកំណែទម្រង់នៅក្នុងផ្ទៃ មិនសមប្រកបរបស់ទារក បានបង្កបញ្ហាឲ្យវាយ៉ាងខ្លាំង​ខាងផ្លូវ​ដក​ដង្ហើម ហើយនឹងអាចបន្ថែមបញ្ហាកាន់តែខ្លាំង ប្រសិនជាវារស់ធំធាត់ឡើង។

តែបើទោះជាស្ថានភាពសុខភាពរបស់ទារក ស្ថិតក្នុងសភាពទន់ជ្រាយយ៉ាងណា តែសំនុំរឿងដែលប្រកាសថា​ទារកបាន​ស្លាប់នោះ មិនបានឲ្យក្រុមសមាជិកគ្រូពេទ្យ ដែលបានត្រួតពិនិត្យព្យាបាលវានៅពេលមុន បានរួចខ្លួនឡើយ។ វេជ្ជបណ្ឌិត​មួយរូបត្រូវបានបញ្ឈរជើង និងគិលានុបដ្ឋាយិការម្នាក់ទៀត ត្រូវបានបណ្ដេញចេញពីការងារ ហើយការស៊ើបអង្កេតមួយ​ក៏​ត្រូវបានបង្កើតឡើងដែរ។

នៅប្រទេសចិន ហេតុការណ៍ដែលទាក់ទងនឹងទារក ដែលត្រូវបានគេមិនយកចិត្តទុកដាក់ រាប់​ទាំងពីសំណាក់ឪពុកម្ដាយនោះផង មិនមែនមានតែករណីលើកនេះទេ។ កាលពីខែឧសភាកន្លងទៅ ទារកដ៏តូចមួយ ត្រូវ​បានគេសង្គ្រោះចេញពីបំពង់បង្គន់មួយ បន្ទាប់ពីវាបានបន្លឺសម្លេងយំ ហើយត្រូវបានលឺដោយអ្នករស់នៅជាប់នោះ៕