អតីតមិត្តរួមក្រុមនៅរៀលម៉ាឌ្រីដ (Real Madrid) របស់កីឡាករ មេស៊ូត អូស្ស៊ីល (Mesut Ozil) ជាច្រើននាក់ សុទ្ធតែ​មាន​ការភ្ញាក់ផ្អើល និងខកចិត្ត បន្ទាប់ពីឃើញខ្សែបម្រើអន្តរជាតិអាឡឺម៉ង់ ផ្ទេរទៅកាន់ក្រុមអាសឺណល (Arsenal) នៅថ្ងៃចុង​ក្រោយ នៃការបិទទ្វារទិញដូរកីឡាករ។

កីឡាករ មេស៊ូត អូស្ស៊ីល ពេលមកដល់ និងបានស្លៀកពាក់ឯកសណ្ឋានរបស់ក្រុមអាសឺណល។ (រូបថត ក្រុមអាសឺណល)

ទោះជាយ៉ាងណា កីឡាករវ័យ២៤ឆ្នាំ អូស្ស៊ីល បានផ្តល់កិច្ចសម្ភាស៏ដល់គេហទំព័របាល់ទាត់អាឡឺម៉ង់ (www.dfb.de) ថា៖ «គាត់សម្រេចចិត្តចាកចេញ ព្រោះតែគាត់គ្មានជំនឿទៅលើគ្រូបង្វឹក លោកកាឡូ អេនសេឡូទី (Carlo Ancelotti) និង​មិន​ពេញចំពោះឋានានុក្រមរបស់ក្លិប។»

ដំណឹងនៃការចាកចេញរបស់កីឡាករ អូស៊្សីល បានធ្វើឲ្យកីឡាកររៀលម៉ាឌ្រីដមួយចំនួន មានការមិនពេញចិត្ត ខឹងសម្បារ និងខកចិត្តយ៉ាងខ្លាំង។

តារាឆ្នើម គ្រីស្ទែណូ រ៉ូណាល់ដូ (Cristiano Ronaldo) បាននិយាយ ខណៈដែលគាត់កំពុងតែហ្វឹកហាត់ ជាមួយនឹងក្រុម​ជម្រើសជាតិព័រទុយហ្គាល់ថា៖ «ការលក់អូស្ស៊ីល ជាដំណឹងដ៏អាក្រក់សម្រាប់ខ្ញុំ។ គាត់ជាកីឡាករ ដែលដឹងពីការផ្លាស់ទី​របស់ខ្ញុំយ៉ាងល្អបំផុតនៅមុខទីគូប្រកួត។ ខ្ញុំពិតជាខឹង និងឈឺចាប់យ៉ាងខ្លាំង ពេលដឹងថាគាត់ចាកចេញ។»

ខ្សែការពារ សឺជីអូ រ៉ាម៉ូស (Sergio Ramos) បាននិយាយថា៖ «ម៉េស៊ូត ជាកីឡាករដែលខុសប្លែកពីគេ។ បើការសម្រេច​ចិត្ត​នៅលើខ្ញុំ គាត់ត្រូវតែជាជម្រើសចុងក្រោយបង្អស់ ដែលត្រូវចាកចេញ។ ប៉ុន្តែគាត់ និងក្លិបសុទ្ធតែបានសម្រេចចិត្តរៀងៗខ្លួន ដូច្នេះខ្ញុំជូនពរឲ្យគាត់ទទួលបានអ្វី ដែលល្អបំផុត។»

កីឡាករអេស្ប៉ាញ វ័យ២៧ឆ្នាំ បានបន្ថែមថា៖ «ខ្ញុំមានការជិតស្និតជាមួយគាត់ខ្លាំងណាស់។ គាត់ជាកីឡាករម្នាក់គត់​ខុស​ពីគេ ហើយពេលនេះខ្ញុំពិតជាខកចិត្ត។ មានរឿងផ្ទាល់ខ្លួនខ្លះៗ ដែលគាត់ត្រូវសម្រេចចិត្តពីអនាគតរបស់គាត់។ គ្រប់គ្នា តែងតែចង់បានអ្វីដែលល្អបំផុតសម្រាប់ខ្លួនឯង ហើយគាត់ក៏មានសិទ្ធធ្វើដូចនោះដែរ។»

ខ្សែបម្រើថ្មី វ័យក្មេង២១ឆ្នាំ អ៊ីស្កូ (Isco) បាននិយាយថា៖ «និយាយតាមត្រង់ វាពិតជាធ្វើឲ្យខ្ញុំមានការភ្ញាក់ផ្អើល ខណៈ​ដែលកាលពីសប្តាហ៏មុន គាត់បាននិយាយថាគាត់នឹងនៅបន្ត។ យើងទាំងអស់គ្នាបានស្គាល់អូស្ស៊ីលហើយ គាត់មាន​សមត្ថភាពយ៉ាងច្រើន ហើយគាត់ជាកីឡាករម្នាក់ ដែលអាចកែប្រែស្ថានការណ៏នៅលើទីលានប្រកួតបាន។»

កីឡាករ អាល់វ៉ារ៉ូ អាបេឡរ (Alvaro Arbeloa) ក៏បានបញ្ចេញប្រតិកម្មមិនខុសពី រ៉ូណាល់ដូ, រ៉ាម៉ូស និងអ៊ីស្កូដែរ។

ខណៈដែលកំពុងតែជាប់ភារកិច្ចជាមួយនឹងក្រុមជម្រើសជាតិអេស្ប៉ាញ អតីតកីឡាករលីវើភូល (Liverpool) រូបនេះ បាន​និយាយប្រាប់ដល់កាសែតអេអេស (AS) ថា៖ «ខ្ញុំមានការភ្ញាក់ផ្អើល និងមានការសោកស្តាយ ហើយវាជាការបាត់បង់​ដ៏ធំ​សម្រាប់ខ្ញុំ ទាំងនៅលើទីលានប្រកួត និងនៅក្រៅទីលាន (មិត្តភក្តិ)។»

ខ្សែការពារស្លាបស្តាំ បានបន្តថា៖ «គាត់បាននិយាយលារយើង កាលពីថ្ងៃអាទិត្យ ប៉ុន្តែខ្ញុំគិតថា ប្រហែលជាគាត់​កំពុង​តែ​កំប្លែងលេង។ គាត់ជាកីឡាករដែលប្លែកពីគេ ហើយប្រហែលជាគ្មានកីឡាករណាដូចទេ នៅលើពិភពលោក។ គាត់ពិតជា​អាចធ្វើឲ្យការប្រកួតមានភាពខុសប្លែក។»

កីឡាករអន្តរជាតិអេស្ប៉ាញ វ័យ៣០ រូបនេះដដែលបានបន្ថែមថា៖ «គាត់ប្រហែលជាមានហេតុផលរបស់គាត់ សម្រាប់​ការផ្ទេរមួយនេះ។ ខ្ញុំយល់ថា អ្នកគាំទ្រក៏មានការសោកស្តាយ និងសោកសៅដូចជាខ្ញុំដែរ ព្រោះតែពួកគេស្រលាញ់​គាត់​ខ្លាំង។ គាត់តែងតែធ្វើអ្វីល្អៗ ជាមួយអ្នកគ្រប់គ្នា។ ហើយនេះជាការបាត់បង់មនុស្សដ៏សំខាន់ម្នាក់ពិតៗ៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៥ ខែកញ្ញា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ