អតីតអ្នកចាំទីក្រុមលីវើភូល (Liverpool) ប៉េប៉េ រ៉េណា (Pepe Reina) បានចាកចេញពីទឹកដីអង់គ្លេសហើយ បន្ទាប់ពីក្លិប​ហង្សក្រហម បានប្រកាសថាពួកគេបានឲ្យក្រុមណាប៉ូលី (Napoli) របស់ប្រទេសអ៊ីតាលី ខ្ចីជើង១ឆ្នាំ ខណៈដែលរ៉េណា បង្ហើបប្រាប់ថា ក្លិបបង្ខំឲ្យគាត់ចាកចេញ ទាំងគ្មានប្រឹក្សាយោបល់ជាមួយនឹងគាត់សោះ។

អតីតអ្នកចាំទីក្រុមលីវើភូល (Liverpool) ប៉េប៉េ រ៉េណា ដែលមកលេងឲ្យក្រុមណាប៉ូលីមួយឆ្នាំ។ (រូបថត metro.co.uk)

កីឡាករអន្តរជាតិអេស្ប៉ាញ ដែលលេងឲ្យលីវើភូលតាំងពីឆ្នាំ២០០៥ បានផ្ញើសំបុត្រផ្លូវការមួយ ដល់អ្នកគាំទ្រក្រុមលីវើភូល​ទាំងអស់ ដោយគាត់និយាយថា៖ «ខ្ញុំពិតជាខកចិត្ត ដែលអ្នកចាត់ការក្រុមលីវើភូល យល់ព្រមឲ្យខ្ញុំចេញទៅក្រុមណាប៉ូលី ដោយមិនបានប្រាប់ខ្ញុំពីដំបូង។»

គ្រូបង្វឹកក្រុមហង្សក្រហម លោកប្រេដិន រ៉ដចឺ (Brendan Rodgers) បានចំណាយលុយ ៩លានផោន នាំយកអ្នកចាំទី ស៊ីម៉ុន ម៉ិកណូឡិត (Simon Mignolet) មកពីក្រុមសាន់ដឺឡែន (Sunderland) ក្នុងគោលបំណងជាអ្នកចាំទីដៃទី១​នៅរដូវ​កាលថ្មី រីឯរ៉េណា ក៏មិនអាចក្លាយជាកីឡាករបម្រុងនោះដែរ ដូច្នេះមានតែផ្លូវឲ្យគាត់ចេញពីក្លិបបណ្តោះអាសន្នសិន។

អ្នកចាំទីវ័យ៣០ឆ្នាំ រ៉េណា ស្រលាញ់ និងស្មោះស្ម័គ្រ នឹងក្លិបលីវើភូលណាស់ ហើយគាត់ក៏មិនដែលប្រាប់ក្លិបថា គាត់ចង់​ចាកចេញម្តងណានោះដែរ ប៉ុន្តែលោករ៉ដចឺ បាននិយាយថា គាត់មិនអាចទុកឲ្យអ្នកចាំទីអេស្ប៉ាញរូបនេះ អង្គុយនៅកន្លែង​បម្រុងនោះទេ ព្រោះគាត់មានថ្លៃឈ្នួលថ្លៃណាស់ (១១ម៉ឺនផោន ក្នុង១សប្តាហ៏)។

ក្នុងសេចក្តីសំបុត្រ រ៉េណាបានបន្តថា៖ «ខ្ញុំបានប្រាប់ដល់គ្រូបង្វឹកថា ខ្ញុំចង់លេងឲ្យក្រុមលីវើភូល មិនចង់ចេញទៅណាទេ លើកលែងតែក្លិបចាស់របស់ខ្ញុំ បាសេឡូណា (Barcelona) ត្រូវការខ្ញុំខ្លាំង ទើបខ្ញុំអាចពិចារណាខ្លះ ហើយខ្ញុំនឹងរីករាយ ក្នុង​ប្រជែងជាមួយកីឡាករចំណូលថ្មី ដើម្បី រកដំណែងជម្រើសទី១ជាបន្ត ប៉ុន្តែខ្ញុំពិតជាភ្ញាក់ផ្អើលនៅពេលដឹងថា ក្លិបបាន​យល់​ព្រមឲ្យក្រុមណាប៉ូលីខ្ចីជើង។»

រ៉េណា បានបង្ហាញពីអារម្មណ៏ឈឺចាប់ និងក្តុកក្តួលជាបន្តថា៖ «ទាំងក្លិប, បុគ្គលិក, ទីក្រុង, ប្រជាជន និងអ្នកគាំទ្រលីវើភូល​ទាំងអស់ ជាផ្នែកមួយដ៏ធំធេងបំផុត នៅក្នុងជីវិតរបស់ខ្ញុំ។ លីវើភូលជាក្លិបដ៏ពិសេស ហើយខ្ញុំពិតជាសំណាងណាស់ ដែល​មានឱកាសលេងជាច្រើនឆ្នាំនៅទីនោះ។ គ្រប់អនុស្សារីយ៏ទាំងអស់ នឹងធ្វើឲ្យខ្ញុំចងចាំជារៀងរហូត។»

ជាចុងបញ្ចប់រ៉េណា បានបញ្ជាក់ថា៖ «ខ្ញុំសូមជូនពរ ឲ្យគ្រូបង្វឹក និងកីឡាករមិត្តរួមក្រុមទាំងអស់ ទទួលបានជោគជ័យធំៗ និងជួយក្លិបឲ្យក្លាយជាក្រុមមួយ ដែលធ្លាប់ល្បីល្បាញដូចពីអតីតកាល។ ខ្ញុំគ្មានចង់បានអ្វីនោះទេ គ្រាន់តែនៅថ្ងៃណាមួយ ខ្ញុំនឹងត្រឡប់ទៅជួយលីវើភូលវិញ ហើយខ្ញុំចង់លេងឲ្យក្លិបច្រើនឆ្នាំបំផុត រហូតដល់បញ្ចប់អាជីពរបស់ខ្ញុំ។ អរគុណសម្រាប់អ្វីៗគ្រប់យ៉ាង ខ្ញុំនឹងជួបអ្នកទាំងអស់គ្នា ក្នុងពេលឆាប់ៗ។»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី៣០ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ