ក្រុមលីវើភូល (Liverpool) បានចុះកិច្ចសន្យាជាផ្លូវការរួចរាល់អស់ហើយ ក្នុងការខ្ចីជើងនាំយកខ្សែការពារស្លាបឆ្វេង អាលី ស៊ីសូខូ (Aly Cissokho) ក្នុងរយះពេល១រដូវកាល មកពីក្រុមអេស្ប៉ាញ វ៉ាឡិនស្សៀ (Valencia)។

កីឡាករខ្សែការពារ អាលី ស៊ីសូខូ ពេលនៅទាត់ឲ្យក្រុមអេស្ប៉ាញ វ៉ាឡិនស្សៀ។ (រូបថត Getty)

កីឡាករអន្តរជាតិបារាំង ស៊ីសូខូ ជាកីឡាករចំណូលថ្មីទី៥ហើយ ដែលក្រុមហង្សក្រហមទិញចូល នៅក្នុងរដូវកាលថ្មីនេះ ហើយគាត់នឹងមកប្រកួតប្រជែងជាមួយនឹងកីឡាករ ជូសេ អេនរ៉ិក (Jose Enrique) ដើម្បីយកដំណែងជា​កីឡាករជម្រើស​ដំបូង។

ស៊ីសូខូ បានប្រាប់ដល់គេហទំព័ររបស់ក្លិបលីវើភូលថា៖ «ខ្ញុំសប្បាយរីករាយខ្លាំងណាស់ ដែលបានមកកាន់ទីនេះ។ ខ្ញុំគិត​ថា យើងមានក្រុមដ៏អស្ចារ្យមួយ និងមានអ្នកគាំទ្រដ៏អស្ចារ្យ ហើយទាំងអស់គ្នា យើងនឹងអាចសម្រេចគោលដៅធំៗ។»

កីឡាករវ័យ២៥ឆ្នាំ ស៊ីសូខូ បានបង្ហាញខ្លួន២៥ប្រកួតនៅក្នុងលីកអេស្ប៉ាញ ហើយបានរកគ្រាប់បាល់បញ្ចូលទីបាន២គ្រាប់ សម្រាប់ក្រុមវ៉ាឡិនស្សៀកាលពីរដូវកាលមុន បន្ទាប់ពីផ្ទេរចេញពីក្រុម លីយ៉ុង (Lyon) ក្នុងតម្លៃ ៥លានផោន កាលពីខែ​សីហា ឆ្នាំ២០១២។

កីឡាកររូបនេះដដែល បានបន្តថា៖ «វាជាបទពិសោធន៏ដ៏ល្អមួយ ដែលអាចជួយរ៉ាប់រងតួនាទី​ជាមួយនឹងកីឡាករ​កំពូលៗ​របស់ក្លិប។ ខ្ញុំមានបទពិសោធន៏ច្រើនក្នុងការប្រកួត ប៉ុន្តែការមកកាន់ទីនេះ នឹងមានអ្វីៗជាច្រើនទៀត ដែលខ្ញុំត្រូវសិក្សា​បន្ថែម ហើយខ្ញុំនឹងស្វែងយល់នៅពេលដែលខ្ញុំហ្វឹកហាត់ជាមួយនឹងកីឡករគ្រប់រូបរាល់ថ្ងៃ។»

គាត់បានបន្ថែមថា៖ «ខ្ញុំអាចសិក្សាពីគ្រូបង្វឹក ដើម្បីស្វែងយល់ពីទម្រង់ថ្មី ក្នុងការលេងនៅទីនេះ និងសិក្សាពីភាសា។ វានឹង​ក្លាយជាបទពិសោធន៏ដ៏ល្អបំផុតមួយសម្រាប់រូបខ្ញុំ ហើយតាមពិតការចូលលេងឲ្យក្លិបលើកដំបូង ជារឿងមួយដែល​ធ្វើឲ្យ​ខ្ញុំរំភើប។»

គ្រូបង្វឹកលីវើភូល លោកប្រេនដិន រ៉ដចឺស (Brendan Rodgers) ក៏ចង់បានខ្សែការពារឆ្វេងមួយរូបទៀតដែរ ពោលគឺកីឡាករ ហ្គឺវីលហឺម ស៊ីហ្គឺរ៉ា (Guilherme Siqueira) របស់ក្រុមអេស្ប៉ាញ ហ្គ្រែនណាដា (Granada) ប៉ុន្តែក្លិបទាំង២ចរចារពុំ​ត្រូវ​តម្លៃ​គ្នា។

ស៊ីសូខូ បានលេងឲ្យក្រុមជម្រើសជាតិបារាំងបាន១លើក និងធ្លាប់បានលេងក្នុងក្របខ័ណ្ឌឆែមពានលីក (Champions League) ឲ្យក្រុមព័រតូ (Porto), លីយ៉ុង និងក្រុមវ៉ាឡិនស្សៀ។ គាត់បានលេងនៅក្នុងកីឡាដ្ឋាន អេនហ្វៀល (Anfield- កីឡាដ្ឋានក្រុមលីវើភូល) ម្តងកាលពីឆ្នាំ២០០៩ ក្នុងការប្រកួតឆែមពានលីក ខណៈដែលក្រុមលីយ៉ុងរបស់បារាំង យកឈ្នះក្រុមលីវើភូល ដោយលទ្ធផល ២-១៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២១ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ