លីវើភូល ត្រូវបានស្វាគមន៏យ៉ាងកក់ក្តៅ នៅក្នុងទីក្រុងបាងកក
- ដោយ: វិន ជីវ័ន្ត
- កែប្រែចុងក្រោយ: July 26, 2013
- ប្រធានបទ:
- អត្ថបទ: មានបញ្ហា?
- មតិ-យោបល់
-
ក្រុមហង្សក្រហម លីវើភូល (Liverpool) បានធ្វើដំណើរមកដល់ទីក្រុងបាងកក ប្រទេសថៃហើយ កាលពីយប់ថ្ងៃព្រហស្បតិ៏ ខណៈដែលមានអ្នកគាំទ្ររាប់ពាន់នាក់ មកចាំទទួលស្វាគមន៏យ៉ាងកោះករ នៅឯព្រលានយន្តហោះ ដុងមឿង (Don Mueang) បន្ទាប់ពីក្រុមព្រីមែលីក (Premier League) របស់អង់គ្លេសមួយនេះ ចាកចេញពីប្រទេសអូស្ត្រាលី។
ការទទួលស្វាគមន៍របស់អ្នកគាំទ្រនៅទីក្រុងបាងកក។ (រូបថត liverpoolfc.com)
បន្ទាប់ពីបំបាក់ក្រុមជម្រើសជាតិឥណ្ឌូនេស៊ី ២-០ និងបំបាក់ក្រុមមីលបឺន (Melbourne) របស់អូស្ត្រាលី ២-០ ទៀតកាលពីថ្ងៃពុធកន្លងទៅនោះ លីវើភូលនឹងត្រូវប៉ះក្រុមជម្រើសជាតិថៃម្តង នៅថ្ងៃអាទិត្យចុងសប្តាហ៏នេះ នៅកីឡាដ្ឋានជាតិ រ៉ាចាម៉ាន់ហ្គាឡា (Rajamangala National Stadium)។
បើតាមកាលវិភាគគ្រោងទុក ការប្រកួតនឹងចាប់ផ្តើមនៅម៉ោង ០៦៖០០ល្ងាច (នៅថៃ) ប៉ុន្តែដោយសារតែមានកម្មវិធីពិសេស និងជាការអបអរគម្រប់ខួបរបស់ក្រុមហ៊ុនឯកជនមួយ ដែលតម្រូវឲ្យផ្សាយផ្ទាល់តាមរយះកញ្ចក់ទូរទស្សន៏ ការប្រកួតនឹងចាប់ផ្តើមទាត់មុន២០នាទី ពោលគឺត្រូវចាប់ផ្តើមនៅម៉ោង ០៥៖៤០នាទីល្ងាចវិញ នៅថ្ងៃអាទិត្យដដែល។
ក្រោមការដឹកនាំរបស់លោកគ្រូបង្វឹកប្រេដិន រ៉ដចឺស (Brendan Rodgers) តារាឆ្នើមៗរបស់ក្រុមដូចជាប្រធានក្រុម ស្តេវ៉ិន ចឺរ៉ាដ (Steven Gerrard) និងខ្សែប្រយុទ្ធដែលកំពុងតែចង់ចាកចេញពីក្រុម ល្វីស ស្វារែស (Luis Suarez) ក៏បានអមដំណើរមកជាមួយផងដែរ។
នេះជាលើកទី៤ហើយ ដែលក្រុមលីវើភូល ធ្វើដំណើរមកប្រកួតមិត្តភាពនៅក្នុងប្រទេសថៃ ខណៈដែលលើកចុងក្រោយនៅឆ្នាំ២០០៩ ប៉ុន្តែវាជាលើកដំបូងសម្រាប់គ្រូបង្វឹក លោកប្រេដិន រ៉ដចឺស។
លោករ៉ដចឺស បាននិយាយថា៖ «កីឡាករមួយចំនួនដែលធ្លាប់មកកាន់ប្រទេសថៃ ពួកគេពិតជារីករាយខ្លាំងណាស់ ដែលបានមកជាថ្មីទៀត។ យើងធ្លាប់លឺថា មានអ្នកគាំទ្រក្រុមលីវើភូលច្រើនណាស់ នៅក្នុងប្រទេសនេះ ហើយសុទ្ធសឹងតែជាអ្នកគាំទ្រដ៏ស្មោះស្ម័គ្រជាមួយក្រុម។ ដូច្នេះយើងនឹងផ្តល់ឲ្យពួកគេវិញ នូវការប្រកួតដ៏អស្ចារ្យមួយ នៅថ្ងៃអាទិត្យខាងមុខ។»
ការប្រកួតនៅក្នុងប្រទេសថៃនេះ ជាការប្រកួតចុងក្រោយបង្អស់នៅក្នុងតំបន់អាស៊ី សម្រាប់ក្រុមលីវើភូល ហើយបន្ទាប់ពីប្រកួតចប់ពួកគេនឹងធ្វើដំណើរកាន់ប្រទេសអង់គ្លេសវិញ ដើម្បីត្រៀមបើកទ្វារពហុកីឡាដ្ឋានអេនហ្វៀល (Anfield) ទទួលស្វាគមន៏ក្រុមភ្ញៀវ អូឡាំព្យាកូស (Olympiacos) របស់ប្រទេសក្រិក ក្នុងការប្រកួតមិត្តភាព នៅថ្ងៃសៅរ៏ ទី០៣ ខែសីហាខាងមុខ៕
----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៦ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ