ក្រុមបាល់ទាត់តោកំណាចអង់គ្លេស ប្រកួតបានត្រឹមស្មើ ១-១ ជាមួយនឹងក្រុមដែលកំពុងតែនាំមុខគេ ក្នុងពូលអេច (H) ម៉ន់តេណេក្រូ (Montenegro) កាលពីយប់ថ្ងៃអង្គារ៏កន្លងទៅ។ ក្តីសង្ឃឹមរបស់ក្រុមអង់គ្លេស ថានឹងត្រូវតែឈ្នះ ហើយឡើង ឈរលើកំពូលតារាងក្នុងពូលអេចនោះ ត្រូវបានខកខាន បន្ទាប់ពីការតាមបានស្មើពីក្រុមម្ចាស់ផ្ទះ។

កីឡាករ វែន រ៉ូនី នៅពេលបណ្ដើរបាល់ចេញ គេចចេញពីកីឡាករម៉ន់តេណេក្រូ។

ខ្សែប្រយុទ្ធរបស់ក្រុមបីសាចក្រហម ម៉ែនឆេស្ទើ យូណៃធីត (Manchester United) វែន រ៉ូនី (Wayne Rooney) បានរកគ្រាប់​បាល់បញ្ចូលទីឲ្យក្រុមអង់គ្លេស នាំមុខមុននៅនាទី៦ ដោយការប្រើក្បាល បន្ទាប់ពីការបញ្ជូនបាល់ជ្រុងបានយ៉ាងល្អ ពី​កីឡាករប្រធានក្រុម ស្តេវិន ចឺរ៉ាដ (Steven Gerrard)។

ខ្សែប្រយុទ្ធម៉ន់តេណេក្រូ ដេចេន ដាមចាណូវីក (Dejan Damjanovic) ដែលលេងឲ្យក្រុម អេហ្វស៊ី ស៊េអ៊ូល (FC Seoul) នៅ​ប្រទេសកូរ៉េខាងត្បូង បានរកគ្រាប់បាល់ តាមយកស្មើជាមួយនឹងក្រុមអង់គ្លេស បានសម្រេចនៅនាទី៧៧។

កីឡាករខ្សែបម្រើ ស្តេវិន ចឺរ៉ាដ មានឱកាសរកគ្រាប់បាល់នៅចុងម៉ោងចំនួន២លើក ប៉ុន្តែត្រូវបានអ្នកចាំទី ម៉ាឡាដិន បូស្ស៊ូវីក (Mladen Bozovic) ជួយសង្គ្រោះ និងធ្វើការរារាំងមិនចូលទី។

ប្រធានក្រុមអង់គ្លេសរូបនេះ បាននិយាយថា «ការនាំមុខមុនចំនួន១គ្រាប់ ពិតជាមិនមានភាពកក់ក្តៅទេ ដូច្នេះ​ទើបយើង​ខំស្វែងរកគ្រាប់ទី២។ ប៉ុន្តែនៅវគ្គទី២ យើងលេងគ្រប់គ្រងបាល់អត់បានល្អ ដែលធ្វើឲ្យមានការរបូតគ្រាប់បាល់។»

ការប្រកួតបន្ទាប់របស់ក្រុមជម្រើសជាតិអង់គ្លេស ក្នុងការប្រកួតជម្រុះបាល់ទាត់ពិភពលោកនេះ នឹងត្រូវជួបជាមួយក្រុម ម៉ូលដូវ៉ា នៅថ្ងៃទី៦ ខែកញ្ញា ខាងមុខ ក្នុងកីឡាដ្ឋានវែមប្លី (Wembley)។

គ្រូបង្វឹកក្រុមជម្រើសជាតិអង់គ្លេស លោក រ៉យ ហដសិន (Roy Hodgson) បាននិយាយថា «ខ្ញុំមានអារម្មណ៏ខកចិត្តចំពោះ​លទ្ធផលនេះ ព្រោះក្រុមយើងលេងបានយ៉ាងល្អ តែបែរជាមិនទទួលបានជ័យជំនះទៅវិញ។ យើងទទួល​បានលទ្ធផល​ត្រឹមស្មើ ខ្ញុំគិតថាវាមិនមែនជាលទ្ធផលដ៏អាក្រក់ទេ ព្រោះក្រុមម៉ន់តេណេក្រូ មិនមែនជាក្រុមខ្សោយ ដែលងាយ​ស្រួល​យកឈ្នះនោះទេ។ ប៉ុន្តែក្រុមរបស់យើង គួរតែទទួលបាន៣ពិន្ទុ និងគួរតែអាចឈរនៅលើកំពូលតារាងក្នុងពូលអេច៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៧ ខែមិនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ