ខ្សែបម្រើ សែស ហ្វាប្រេហ្គាស (Cesc Fabregas) បានប្រាប់ដល់មិត្តភក្តិរបស់គាត់ នៅក្នុងប្រទេសអង់គ្លេសថា គាត់ចង់​ចាកចេញពីក្រុមបាសេឡូណា (Barcelona) ទៅចូលរួមជាមួយក្រុមម៉ែនឆេស្ទើ យូណៃធីត (Manchester United)។

កីឡាករ រ៉ូបីន វ៉ាន់ផឺស៊ី និងកីឡាករ សែស ហ្វាប្រេហ្គាស កាលនៅទាត់ឲ្យក្រុមអាសឺណល។ (រូបថត Getty Images)

ហ្វាប្រេហ្គាស មានការចាប់អារម្មណ៏ផ្ទេរទៅកាន់កីឡាដ្ឋានអូលត្រាហ្វដ (Old Trafford) ចាប់ពីលឺដំណឹងថា បើគាត់ព្រម​ទៅនោះនឹងក្លាយជាកីឡាករជម្រើសដំបូងជានិច្ច ហើយគាត់ក៏ចង់ចាប់ដៃគូម្តងទៀត ជាមួយអតីតមិត្តរួមក្រុមអាសឺណល (Arsenal) របស់គាត់ រ៉ូបីន វ៉ាន់ផឺស៊ី (Robin van Persie) ដែលជាខ្សែប្រយុទ្ធក្រុមម៉ែនញូបច្ចុប្បន្នផងដែរ។

កីឡាករអន្តរជាតិអេស្ប៉ាញ ជាគោលដៅដ៏ធំបំផុតរបស់ក្រុមបីសាចក្រហម នៅក្នុងរដូវក្តៅនេះ ខណៈដែលក្រុម​ម្ចាស់​ជើង​ឯកព្រីមែលីក (Premier League) មួយនេះ បានដេញថ្លៃ ៣០លានផោនម្តងរួចមកហើយ ប៉ុន្តែត្រូវបានក្លិបបាសេឡូណា​បដិសេធ។

គ្រូបង្វឹកថ្មីក្រុមម៉ែនញូ លោកដេវីដ ម៉យ (David Moyes) បាននិយាយនៅក្នុងសន្និសីតកាសែត នៅប្រទេសជប៉ុន ខណៈ​ដែលក្រុមរបស់លោកនឹងប្រកួតមិត្តភាពនៅថ្ងៃសុក្រ នាទីក្រុងអូសាកា (Osaka) ថា ការផ្ទេរអតីតកីឡាករឆ្នើមអាសឺណល គឺកំពុងតែដំណើរទៅមុខ ហើយគាត់ជឿជាក់ថា ការដេញថ្លៃថ្មីមួយទៀត នឹងកើតឡើងក្នុងពេលឆាប់ៗ។

កីឡាករវ័យ២៦ឆ្នាំ គាត់មានជំនឿថាបើគាត់អាចផ្ទេរទៅម៉ែនញូ នោះគាត់អាចនឹងឈ្នះពានរង្វាន់ព្រីមែលីក ខណៈដែល​កាលពីរដូវកាលមុន គាត់ទើបតែឈ្នះពានរង្វាន់ឡាលីកា (La Liga) របស់អេស្ប៉ាញ ជាមួយនឹងក្រុមបាសា។ ហ្វាប្រេហ្គាស ពុំដែលធ្លាប់ឈ្នះពានរង្វាន់ព្រីមែលីកនោះទេ កំឡុងពេលដែលគាត់នៅជាមួយក្រុមកាំភ្លើងធំ ពោលគឺបានត្រឹមតែឈ្នះ​ពានរង្វាន់ អេហ្វអេខាប់ (FA Cup) និងពានរង្វាន់ខមញ៉ូនីធីស្យ៊ែល (Community Shield) តែប៉ុណ្ណោះ។

ក្លិបអ្នកមានបុណ្យ បាសេឡូណាបានប្រកាសម្តងរួចមកហើយថា ពួកគេដាច់ខាតមិនព្រមលក់ហ្វាប្រេហ្គាសនោះទេ ហើយថែមទាំងបានព្រមាណដល់ក្លិបម៉ែនញូថា «កុំចំណាយពេលមកដេញថ្លៃឥតប្រយោជន៏អី» ទៀតផង។

ប៉ុន្តែទោះជាយ៉ាងណា ការផ្ទេរនៅតែអាចកើតឡើង បើសិនជាសាមីខ្លួន សែស ហ្វាប្រេហ្គាស ចង់ចាកចេញពីអេស្ប៉ាញ និងព្រមដាក់សំណើរដល់ក្លិបម្ចាស់ជើងឯកអេស្ប៉ាញថាគាត់ពិតជាចង់ចាកចេញទៅអង់គ្លេសវិញមែន។ ដូច្នេះសរុបមក បើម៉ែនញូហ៊ានឲ្យថ្លៃពីលើ ៣០លានផោន ហើយហ្វាប្រេហ្គាសចង់ចាកចេញពីបាសាដែរនោះ នោះការផ្ទេរប្រាកដជា​កើត​មានឡើងក្នុងពេលឆាប់ៗខាងមុខ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៦ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ