កីឡាករ យ៉ាយ៉ា តូរ៉េ (Yaya Toure) បានដាក់សម្ពាតដល់ក្រុមម៉ែនឆេស្ទើ ស៊ីធី (Manchester City) ដោយបង្ខំឲ្យក្រុមមួយ​នេះ បន្តកិច្ចសន្យាថ្មី១ នៅថ្ងៃសៅរ៏ បើមិនដូច្នោះទេ គាត់នឹងចាកចេញ។

កីឡាករ យ៉ាយ៉ា តូរ៉េ នៃក្រុមម៉ែនឆេស្ទើ ស៊ីធ។

ខ្សែបម្រើជម្រើសជាតិ អាយរីខូស (Ivorian) រូបនេះ ធ្លាប់បានពិភាក្សាពីការបន្តកិច្ចសន្យានេះ អស់រយះពេល ៦ខែកន្លង​មកហើយ តែពុំទទួលបានភាពច្បាស់លាស់ណាមួយសោះ។

ភ្នាក់ងាររបស់កីឡាករ តូរ៉េ លោក ឌីមីទ្រី សេលុក (Dimitri Seluk) បាននិយាយថា «បើសិនជាគាត់អាចចុះកិច្ចសន្យាថ្មី នៅ៣ឬ៤ថ្ងៃបន្ទាប់ វាគ្មានបញ្ហាអ្វីនោះទេ។ ប៉ុន្តែបើមិនដូច្នោះទេ ពួកយើងមិនចាំយូរទេ ហើយយើងនឹងចាប់ផ្តើម​ចរចារ​ជាមួយនឹងក្រុមផ្សេង។ ខ្ញុំចង់មានន័យថា ការចុះកិច្ចសន្យា នឹងធ្វើឡើងនៅថ្ងៃសៅរ៏។ បើសម្រេច ខ្ញុំក៏អរគុណ ប៉ុន្តែបើមិន​បានជោគជ័យទេ តូរ៉េនឹងចាកចេញនៅខែឧសភា ខាងមុខ។»

គាត់បន្តថា «ខ្ញុំមានអារម្មណ៏ថា គាត់ប្រហែលជាមិននៅជាមួយក្រុមស៊ីធី ជាបន្តទេ។ វាមិនមែនត្រឹមតែជាបញ្ហា​លុយ​នោះ​ទេ ហើយគាត់ចង់ចេញ ព្រោះគាត់មានហេតុផលជាច្រើន។ គាត់ជាកីឡាករដែលល្អជាងគេមួយរូប នៅក្នុងក្រុម​ម៉ែនឆេស្ទើ ស៊ីធី ប៉ុន្តែគាត់មានអារម្មណ៏ថា បុគ្គលិកទាំងអស់មិនគោរពគាត់។ មានតែលោកគ្រូបង្វឹក រ៉ូបឺតូ ម៉ែនស៊ីនី (Roberto Mancini) ម្នាក់គត់ប៉ុណ្ណោះ ដែលឲ្យតម្លៃដល់រូបគាត់។»

អតីតកីឡាកររបស់ក្រុម បាសេឡូណា (Barcelona) វ័យ ២៩ឆ្នាំរូបនេះ គឺជាអ្នកដែលមានថ្លៃឈ្នួល ខ្ពស់ជាងគេបង្អស់ ដែលទទួលបាន ២២០ពាន់ ផោនក្នុងមួយសប្តាហ៏។ ប៉ុន្តែលោក សេលុក បាននិយាយថា គាត់មិនមែនចង់បាន​លុយ​បន្ថែមនោះទេ ហើយក៏មិនមែន មិនពេញចិត្តចំពោះការកែទម្រងលេង របស់ក្រុមនោះដែរ។

តូរ៉េ ពេលនេះកំពុងតែជាប់ភារកិច្ច ក្នុងក្រុមជម្រើសជាតិ ដែលត្រូវប្រកួតជំរុះបាល់ទាត់ពិភពលោក ជាមួយនឹងប្រទេស គេមបៀ (Gambia) ក្នុងទីក្រុង អាបីដចេន (Abidjan)។ គាត់ត្រៀមខ្លួនរួចរាល់ហើយ ដើម្បីអនុវត្តន៏ច្បាប់ ហ្វីហ្វា (FIFA) ក្នុងករណីរបស់គាត់មួយនេះ។

ច្បាប់របស់ ហ្វីហ្វា បានចែងថា បើសិនជាក្រុមបាល់ទាត់ណាមួយ មិនបន្តកិច្ចសន្យាថ្មី នៅពេលដែលកិច្ចសន្យា​ចាស់នៅ​សល់រយះពេល ១ឆ្នាំនោះ កីឡាករអាចមានសិទ្ធចាកចេញ ដោយស៊េរី នៅពេលចប់រដូវកាល។

ក្រុមបាល់ទាត់ដែលកីឡាករតូរ៉េ អាចនឹងចាប់អារម្មណ៏ ចង់ទៅលេងឲ្យនោះមាន ក្រុម រៀលម៉ាឌ្រីដ (Real Madrid), ម៉ែនឆេស្ទើ យូណៃធីត (Manchester United), ឆែលស៊ី (Chelsea) និងក្រុមអ្នកមានថ្មីរបស់ប្រទេសបារាំង ប៉ារីស ហ្សិន ជឺម៉ិន (Paris Saint-Germain)៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២០ ខែមិនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ