នាយករដ្ឋមន្ត្រីអង់គ្លេស លោក ដាវិដ កាមើរូន (David Cameron) ចង់ទាមទារឲ្យក្រុមហ៊ុនផ្គត់ផ្គង់អាំងធើណែត បិទជា​ស្វ័យប្រវត្តនូវខ្សែភ្ជាប់ទាំងឡាយដែល ចូលទៅកាន់គេហទំព័រ«កូនជ្រូកអាសអាភាស»ទាំងឡាយ។ អ្នកណាដែលចង់​ទស្សនាឬពិគ្រោះគេហទំព័រ«កូនជ្រូក»ទាំងនោះ ត្រូវធ្វើការសុំទៅក្រុមហ៊ុនអ្នកផ្គត់ផ្គង់នោះ ជាមុនសិន។

រូបបង្ហាញពីការចូលទៅពិគ្រោះគេហទំព័រកូនជ្រូក នៅលើបណ្ដាញអាំងធើណែត។

សេចក្ដីស្នើសុំរបស់លោកនាយករដ្ឋមន្ត្រី ធ្វើឡើងក្នុងក្របខ័ណ្ឌកាត់បន្ថយ ការប៉ះពាល់ទៅលើកុមារ នូវរាល់រូបភាព ដែល​មានលក្ខណៈអាសអាភាស ឬអាណាចារទាំងឡាយ។

លោកនាយករដ្ឋមន្ត្រី បានថ្លែងអះអាងនៅថ្ងៃច័ន្ទទី២ខែកក្កដានេះ ពីប្រព័ន្ធ​ច្រោះ​ថ្មីរបស់ឪពុកម្ដាយ នឹងត្រូវដាក់ឲ្យ​ដំណើរ​ការនៅចុង​ឆ្នាំខាងមុខ ទៅកាន់អតិថិជនថ្មីៗ ដែលនឹងមកជាវការភ្ជាប់​បណ្ដាញ​អាំងធើណែត។ អតិថិជនដែលបានជាវ​ការភ្ជាប់បណ្ដាញ នៅមុនច្បាប់នេះចូលជាធរមាន នឹងមិនត្រូវបាន​គេច្រោះនោះ​ឡើយ តែអាចចូលទៅកែប្រែ​ជម្រើស​ទាំង​នេះបាន ប្រសិនបើ​អតិថិជននោះ មានបំណងបានបិទគេហទំព័រទាំងនោះ។

បន្ថែមពី​លើនេះ លោកកាមើរូន ក៏មានគម្រោងដាក់ឲ្យនៅក្រៅច្បាប់ផងដែរ នូវឈុតឆាកវីដេអូកូនជ្រូក ដែលមានលក្ខណៈ​ហឹង្សា​ខ្លាំង ដែលបើតាមលោក វាបង្កើតឲ្យមានឈុតឆាក«ចាប់រំលោភ»នៅខាងក្រៅដូចគ្នា។

គេហទំព័ររុករក ដូចយ៉ាងហ្គូហ្គោល (Google) យ៉ាហូ (Yahoo) ជាដើមនោះ នឹងត្រូវសុំឲ្យបិតចោលនូវពាក្យគន្លឹះមួយចំនួន និងលទ្ធផលរុករកទាំងឡាយ ដែលពាក់ព័ន្ធក្នុងករណីនេះ។

ក្រុមសមាគមដែលធ្វើការប្រយុទ្ធប្រឆាំងនឹងភាពយន្ដ ឬវីដេអូ «កូនជ្រូកអាសអាភាស»ទាំងនេះ បានស្វាគមន៍យ៉ាងខ្លាំង​នូវចំណាត់ការ របស់លោកនាយករដ្ឋមន្ត្រីរូបនេះ។ តែក្រុមសកម្មជនដទៃទៀត ដែលមានបុព្វហេតុសម្រាប់សេរីភាព​នៃ​ការបញ្ចេញមតិយោបល់ បានចាត់ទុកថាវិធានការទាំងនេះ ថាជាការហាមឃាត់មួយ ដែលមានលក្ខណៈ«ចាប់បង្ខំ»៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី២២ ខែកក្កដា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ