ការឃុំខ្លួនជាបណ្តោះអាសន្ន នៅក្នុងតុលាការកម្ពុជា ត្រូវបានគេមើលឃើញថា នៅមានភាពមិនប្រក្រតីនៅឡើយ។ បញ្ហា​ទាំងនេះ ត្រូវ​បានមជ្ឈដ្ឋានមហាជនមើលឃើញថាបានកើតឡើងសឹងតែជាទូទៅ និងជាពិសេស នៅក្នុងដំណើរការនីតិវិធី​របស់តុលាការ​នាពេល​កន្លង​មក។

សាលាដំបូងរាជធានីភ្នំពេញ។ (រូបថត MONOROOM.info/ O. Bory)

កំណត់ត្រាមួយចុះថ្ងៃទី១៤ ខែកក្កដា ឆ្នាំ២០១៣ ចេញផ្សាយដោយ មជ្ឈមណ្ឌលសិទ្ធិមនុស្សកម្ពុជា បានបង្ហាញនូវភាព​មិន​ប្រក្រតីគួរឲ្យបារម្ភ នៅក្នុងដំណើរការនីតិវិធី នៃការឃុំ​ខ្លួនរបស់តុលាការកម្ពុជា។ កំណត់ត្រា ដែលមានចំណងជើងថា ការ​អនុវត្តន៍​ការ​ឃុំខ្លួន​បណ្តោះ​អាសន្ន នៅក្នុងតុលាការកម្ពុជានោះ បានលើកឡើងពីករណីជាក់ស្តែងមួយចំនួន ដែលតុលាការ​បានប្រើឆន្ទានុសិទ្ធិក្នុងការកំណត់ពីការឃុំខ្លួនបណ្តោះអាសន្ន ត្រូវបានធ្វើទាំងបំពាន ហើយច្បាប់មិនត្រូវបានអនុវត្តន៍​ដោយត្រឹមត្រូវ និងករណីឃុំខ្លួនបណ្តោះអាសន្នខ្លះទៀត ដែលពាក់ព័ន្ធនឹងរឿងនយោបាយ។

លោក ឌុច ពិសិដ្ឋ មន្រ្តីគម្រោងសង្កេតការណ៍សវនាការ របស់មជ្ឈមណ្ឌលសិទ្ធិមនុស្សកម្ពុជាបានថ្លែងថា៖ «នៅក្នុងនីតិវិធី​ច្បាប់ បានចែងជម្រើសក្រៅពីការឃុំខ្លួនជនសង្ស័យ ជាបណ្តោះអាសន្ន តែតុលាការបែជាធ្វើការឃុំខ្លួនជនសង្ស័យទៅវិញ ខណៈដែលវាជាបទល្មើសតូចតាច និងខ្លះទៀតមានវិមតិសង្ស័យ»។ មន្ត្រីរូបនេះ បានលើកយកករណី អ្នកស្រី យ៉ោម បុប្ផា មកបញ្ជាក់ ដោយលើកឡើងថា តុលាការអាចផ្តល់ឱកាសឲ្យអ្នកស្រីអាចនៅក្រៅឃុំបាន។ តែផ្ទុយទៅវិញ តុលាការបែជា​សម្រេចឃុំខ្លួន ជាបណ្តោះអាសន្នទៅវិញ។

សាកសួរសុំប្រតិកម្មដោយមនោរម្យព័ងអាំងហ្វូ នាយកប្រតិបត្តិនៃក្រុមអ្នកច្បាប់ការពារសិទ្ធិកម្ពុជា លោក សុក សំអឿន បាន​បញ្ជាក់ថា៖ «តុលាការកម្ពុជាងាយនឹងការឃុំខ្លួន ជាជាងការអប់រំ និងផ្តល់ឱកាសឲ្យជនសង្ស័យក្នុងការកែខ្លួន»។ លោកបន្តថា ច្បាប់កម្ពុជាពុំទាន់ចែងច្បាស់អំពីនីតិវិធី ធានាឲ្យនៅក្រៅឃុំ ខណៈករណីមួយចំនួនចាំចាប់ត្រូវឃុំខ្លួន គេបែ​ជាមិនឃុំខ្លួន។

សូមរំលឹកថា លោក ឈូក បណ្ឌិត អតីតអភិបាលក្រុងបាវិត ជាប់ខេត្តស្វាយរៀង ដែលបានប្រើកាំភ្លើងបាញ់លើ​កម្មការិនី​រោងចក្របីនាក់ ឲ្យរងរបួសជាទម្ងន់ ក្នុងពេលកម្មការិនីទាំងនោះតវ៉ាពីសិទ្ធិការងារ កាលពីថ្ងៃទី២០ខែកុម្ភៈឆ្នាំ២០១២​​កន្លង​មក​នោះ នៅតែបន្តមានសេរីភាពរហូតមកដល់ពេលនេះ បើទោះជាច្បាប់ចាំបាច់ត្រូវឃុំខ្លួនលោក​ជាបណ្តោះ​អាសន្ន​ក្តី។

សំណុំរឿងលោក ឈូក បណ្ឌិត ត្រូវបានគេមើលឃើញជាទូទៅថា តុលាការហាក់ដូចជាមានការស្ទាក់ស្ទើរ ​ក្នុងការចាត់​វិធានការតាមផ្លូវច្បាប់ ដោយមានការរុញទៅរុញមករវាងតុលាការខេត្តស្វាយរៀង និងសាលាឧទ្ធរណ៍ ហើយថែមទាំង​ធ្លាប់​ទម្លាក់ចោល នូវបទចោទប្រកាន់នោះទៀតផង ខណៈដែលមានការរិះគន់យ៉ាងខ្លាំងពីគ្រប់មជ្ឍដ្ឋាន។ ការស្ទាក់ស្ទើរ​នេះ ត្រូវបានសាធារណជនទូទៅរិះគន់ថា ដោយសារតែតុលាការ រងអន្តរាគមន៍ពីអ្នកនយោបាយដ៏មានឥទ្ធិពល។

កំណត់ត្រាខាងលើ បានដកស្រង់សេចក្ដីរាយការណ៍មួយ របស់កាសែតភ្នំពេញប៉ុសិ៍្ត កាលពីថ្ងៃទី១៥ ខែសីហា ឆ្នាំ២០១២ មករំលឹកថា មានមន្ត្រីបួនរូបមកពីក្រសួងរៀបចំដែនដី ដែលបានជាប់ពាក់ព័ន្ធនឹងអំពើពុករលួយទទួលប្រាក់សំណូក ចំនួន​ពីរលានដុល្លារអាមេរិក ហើយក្រោយមកមានសេចក្តីបញ្ជាក់ពីតុលាការថា បន្តឲ្យមានសេរីភាព ដោយមិនមានការឃុំខ្លួន​ជាបណ្តោះអាសន្នអ្វីឡើយ។ តែផ្ទុយទៅវិញ មានប្រជាពលរដ្ឋមួយចំនួនត្រូវបានតុលាការឃុំខ្លួនជាបណ្តោះអាសន្ន ចំពោះ​បទល្មើសដែលមិនមានលក្ខណៈ​ធ្ងន់ធ្ងរ ដោយសារតែពួកគេ គ្មានការជួយសម្រួលខាងផ្នែកនយោបាយ ឬអ្នកមានអំណាច​ណាមួយ​នៅពីក្រោយ។

ភាពខុសគ្នានេះ ធ្វើឲ្យគេកាន់តែយល់ថា តុលាការ​កំពុង​តែវិនិច្ឆ័យ​ក្ដីលើសំនុំរឿងទាំងនោះ តាមរបៀបពីរផ្សេងគ្នា ដោយ​មិនផ្អែកលើស្មារតីនៃច្បាប់ និងភស្តុតាង តែបែជា​ផ្អែកទៅលើឋានៈសង្គម ប្រាក់កាស និងនិន្នាការនយោបាយរបស់ជន​សង្ស័យនោះ​ទៅវិញ។

------------------------------------------
ដោយៈ អ៊ុំ បូរី - ភ្នំពេញថ្ងៃទី១៥ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ