ពាក្យ«ដូរមេឃុំបម្រើបក្ស ដាក់មេឃុំបម្រើរាស្ត្រ» ដែលដុតឲ្យឆេះ
- ដោយ: កេសរ កូល ([email protected]) - ភ្នំពេញ ថ្ងៃទី០៧ មិនា ២០១៧
- កែប្រែចុងក្រោយ: March 07, 2017
- ប្រធានបទ: នយោបាយខ្មែរ
- អត្ថបទ: មានបញ្ហា?
- មតិ-យោបល់
-
ពាក្យស្លោកឬសារនយោបាយ ដែលមានន័យបញ្ឆិតបញ្ឆៀង ផ្អៀងផ្អង ចងជាការប្រមាថ ញុះញង់ ប្រុងនឹងបង្កហេតុ មិនអាចយកមកលេង នៅក្នុងសង្វៀន នៃការប្រកួតប្រជែងនយោបាយ នៅក្នុងប្រទេសកម្ពុជាបានទេ ជាពិសេសពាក្យពេជ្រទាំងឡាយណា ដែលចេញពីគណបក្សសង្គ្រោះជាតិ ដៃគូប្រកួតដ៏ធំមួយ របស់គណបក្សកាន់អំណាច។ បើនៅតែហ៊ានរឹងទទឹង គណបក្សប្រជាជនកម្ពុជា ដែលមានអតីតភាព កើតចេញពីគណបក្សកុម្មុយនីសឥណ្ឌូចិន របស់លោក ហូ ជីម៉ិញ បានព្រមានរួចជាស្រេច ថានឹងប្ដឹងម្ចាស់ពាក្យស្លោក ដែលមានន័យថា «ដូរមេឃុំបម្រើបក្ស ដាក់មេឃុំបម្រើរាស្ត្រ»នេះ ទៅកាន់តុលាការ។
ប៉ុន្តែ គេក៏ត្រូវនិយាយដែរ ពីប្រសិទ្ធិភាពនៃប្រតិកម្មយ៉ាងរហ័ស របស់អ្នកនាំពាក្យគណបក្សប្រជាជនកម្ពុជា ដែលបានចេញសេចក្ដីថ្លែងការណ៍ព្រមាននេះ យ៉ាងទាន់ហន់ តែប៉ុន្មានម៉ោង(ឬនាទី)ប៉ុណ្ណោះ នៅក្រោយការថ្លែងរបស់លោក ហ៊ុន សែន នាយករដ្ឋមន្ត្រី-ប្រធានគណបក្សប្រជាជនកម្ពុជា ដែលសំដែងឲ្យដឹង ពីការខឹងក្រេវក្រោធរបស់លោក ជុំវិញពាក្យស្លោកខាងលើ កាលពីរសៀលថ្ងៃទី៦ ខែមិនាម្សិលម៉ិញ។
នៅក្នុងសេចក្ដីថ្លែងការណ៍នោះ អ្នកនាំពាក្យគណបក្សកាន់អំណាចបានចាត់ទុកខ្លឹមសារ នៃឃ្លា"ដូរមេឃុំបម្រើបក្ស ដាក់មេឃុំបម្រើរាស្ត្រ" របស់បក្សប្រឆាំងថា មានចរិតញុះញង់ បង្កហេតុ និងប្រមាថមើលងាយធ្ងន់ធ្ងរ ដល់មន្ត្រីឃុំ-សង្កាត់ទូទាំងប្រទេស។ គណបក្សប្រជាជនកម្ពុជា បានអះអាងទៀតថា មន្ត្រីមូលដ្ឋានទាំងនោះ ដែលខ្លះបានកាន់តំណែង តាំងពីរបបកុម្មុយនីស (សាធារណរដ្ឋប្រជាមានិតកម្ពុជា) មក បាន«ខិតខំបម្រើរាស្ត្រ ស្របតាមតួនាទីរបស់ខ្លួន ដោយមិនមានការរើសអើងនិន្នាការនយោបាយសោះឡើយ»។
ថ្លែងចំពោះនិស្សិតរាប់ពាន់នាក់ កាលពីរសៀលម្សិល លោក ហ៊ុន សែន បានថ្លែងឡើងដាក់កំហិតដូច្នេះថា៖ «ហើយកុំណា អាពាក្យដូរមេឃុំបម្រើបក្ស ដាក់មេឃុំបម្រើរាស្ត្រ។ ចាំមើលអាមេឃុំបម្រើរាស្ត្រ មុខមេឃុំហ្នឹង វាយ៉ាងម៉េច? (...) ៣៨ឆ្នាំ នៃការបម្រើប្រជាជន បើមិនមានគោលនយោបាយត្រឹមត្រូវ សួរថាបាន[ដូចសព្វថ្ងៃ]ឬទេ?»។
បន្ទាប់ពីទាមទារ ឲ្យគណបក្សម្ចាស់ពាក្យស្លោកខាងលើ ឆាប់ធ្វើការកែតម្រូវ ទៅលើសារនយោបាយនេះ ដើម្បីរក្សាបរិយាកាសល្អ និងសន្តិសុខរបស់ប្រទេសនោះ គណបក្សប្រជាជនកម្ពុជា នៅបានព្រមានបន្ថែម តាមរយៈសេចក្ដីថ្លែងការណ៍ ដដែលនោះថា គណបក្សសូម«រក្សាសិទ្ធិប្ដឹងទៅតុលាការ ស្របតាមច្បាប់ជាធរមាន»។
ជាប្រតិកម្មតបវិញ លោក អេង ឆៃអ៊ាង មន្ត្រីជាន់ខ្ពស់ និងជាតំណាងរាស្ត្រ របស់គណបក្សសង្គ្រោះជាតិ បានលើកឡើងថា គណបក្សប្រជាជនកម្ពុជា អាចហាមមិនឲ្យគណបក្សសង្គ្រោះជាតិ យកពាក្យស្លោកនេះ មកប្រើបាន តែគណបក្សកាន់អំណាចដុះស្លែមួយនេះ មិនអាចហាមប្រជាពលរដ្ឋ មិនឲ្យយកយកពាក្យនេះ មកប្រើបាននោះឡើយ។ លោក អេង ឆៃអ៊ាង បានសរសេរពន្យល់ នៅលើគណនេយ្យហ្វេសប៊ុក របស់លោកថា៖ «ព្រោះពាក្យនេះ កើតចេញពីប្រជាពលរដ្ឋ»។
មន្ត្រីគណបក្សប្រឆាំងរូបនេះ បានថ្លែងបន្ត ហាក់ដូចជាចង់កាត់បន្ថយកម្ដៅមកវិញ យ៉ាងដូច្នេះថា៖ «ពាក្យស្លោកនេះ [គ្រាន់តែ]ជាការជំរុញ និងលើកទឹកចិត្តឲ្យមេឃុំ ដែលទទួលបានការគាំទ្រពីប្រជាពលរដ្ឋនៅពេលបោះឆ្នោត ធ្វើការងារបម្រើប្រជាពលរដ្ឋ កុំឲ្យបម្រើបក្ស តែប៉ុណ្ណោះ»។
«ខ្លាចដល់ថ្នាក់យល់សប្ដិ ឃើញប្ដឹង...»
ប៉ុន្តែសម្រាប់ក្រុមអ្នកឃ្លាំមើលវិញ បានចំអកឲ្យលោក ហ៊ុន សែន និងគណបក្សប្រជាជនកម្ពុជាវិញ យ៉ាងចាស់ដៃ។ លោក មឿន តុលា នាយកប្រតិបត្តិនៃមជ្ឈមណ្ឌលសម្ព័ន្ធការងារនិងសិទ្ធិមនុស្ស (Central) បានសរសេរដោយមិនចំមុខ នៅលើបណ្ដាញសង្គមថា៖ «ដល់ពេលត្រូវខ្លាច សូម្បីពាក្យមួយឃ្លា ក៏ត្រូវដេកយល់សប្តិ ឃើញថាប្តឹងដែរ!»។
ចំពោះលោក គល់ បញ្ញា នាយកប្រតិបត្តិអង្គការខុមហ្វ្រែលវិញ បានចាត់ទុកការប្រើប្រាស់ភាសា ឬពាក្យ ដើម្បីការ«ផ្លាស់ប្ដូរ» នៅក្នុងពេលបោះឆ្នោតម្ដងៗ គឺជារឿងធម្មតាមួយ នៅក្នុងសង្គមប្រជាធិបតេយ្យ។ លោក គល់ បញ្ញា បានសរសេរនៅលើគណនេយ្យហ្វេសប៊ុករបស់លោក នៅមុននេះបន្តិចថា៖ «ការបោះឆ្នោត គឺនិយាយទៅដល់ "ជម្រើស (Choice)" រវាង រក្សាដដែល ឬដូរ។ ការឃោសនារបស់បេក្ខជន និង/ឬគណបក្សមកប្រកួត បានប្រើពាក្យស្លោក "ដូរ" ជាធម្មតាទៅហើយនៅប្រទេសខ្លះ រហូត[ដល់ប្រើ]ពាក្យស្លោកជម្រុញ [ឲ្យ]ដូរការដឹកនាំ ពីបុរសមកស្ត្រី ឬពីចាស់មកយុវជន។»។
នាយកប្រតិបត្តិអង្គការជំនាញខាងបោះឆ្នោតរូបនេះ បានពន្យល់បន្តទៀតថា៖ «រហូតដល់ឥឡូវ បេក្ខជន និង/ឬគណបក្សភាគច្រើន លែងប្រើពាក្យស្លោក "ដូរ" ព្រោះវាមិនគ្រប់គ្រាន់ ក្នុងការទាក់ទាញម្ចាស់ឆ្នោត ខណៈពាក្យស្លោកផ្សេងៗ ត្រូវបានបង្កើត[ឡើង ដើម្បី]ភ្ជាប់ទស្សនៈនៃការដូរ។ ឧទាហរណ៍ នៅអាមេរិក បេក្ខជនប្រធានាធិបតី អូបាម៉ា ប្រើពាក្យស្លោក "យើងអាច! (Yes We can)" លោក ត្រាំ ប្រើ[ពាក្យស្លោក] "អាមេរិកអស្ចារ្យឡើងវិញ! (Make America Great Again)" ខ្លះ[ទៀត] ថា "រុងរឿងទាំងអស់គ្នា! (Prosperity together)"។ល។»៕