ខ្សែបម្រើស្លាបក្រុមរៀលម៉ាឌ្រីដ (Real Madrid) គ្រីស្ទែណូ រ៉ូណាល់ដូ (Cristiano Ronaldo) បាននិយាយថា គាត់នឹកដល់​ពេលវេលា ដែលគាត់លេងឲ្យក្រុមម៉ែនឆេស្ទើ យូណៃធីត (Manchester United) ខណៈដែលតារាឆ្នើមរបស់ព័រទុយហ្គាល​រូបនេះ កំពុងតែមានពាក្យចចាមអារ៉ាមថា នឹងអាចត្រឡប់មកកាន់ទឹកដីអូលត្រាហ្វដ (Old Trafford) នៅរដូវក្តៅនេះ។ នេះបើតាមសេចក្ដីរាយការណ៍ របស់គេហទំព័រហ្គោលដតខម (Goal.com) ។

គ្រីស្ទែណូ រ៉ូណាល់ដូ កីឡាករបាល់ទាត់ របស់ក្រុមរៀលម៉ាឌ្រីដ ដ៏ល្បីនៃប្រទេសអេស្ប៉ាញ។

បើទោះបីជាគាត់និយាយថា គាត់នឹកក្រុមម៉ែនញូយ៉ាងនោះក៏ដោយ គាត់ក៏បាននិយាយថា គាត់រីករាយក្នុង​ការលេងឲ្យ​ក្រុម​រៀលម៉ាឌ្រីដ និងពេញចិត្តជីវិតរបស់គាត់ នៅក្នុងប្រទេសអេស្ប៉ាញដែរ។

ពាក្យចចាមអារ៉ាមជាច្រើននៅតែបន្តលើកឡើងថា រ៉ូណាល់ដូនឹងត្រឡប់ទៅកាន់ក្រុមម៉ែនញូវិញនៅរដូវក្តៅនេះ ខណៈ​ដែលខ្សែបម្រើស្លាបឆ្វេងរូបនេះ មិនបានចុះកិច្ចសន្យាថ្មីជាមួយរៀលម៉ាឌ្រីដ ហើយកិច្ចសន្យារបស់គាត់ជាមួយក្លិបបច្ចុប្បន្ន នឹងបញ្ចប់នៅឆ្នាំ២០១៥។

រ៉ូណាល់ដូ បាននិយាយ ក្នុងដំណើរទស្សនៈកិច្ចរបស់គាត់ទៅកាន់ប្រទេសសិង្ហបុរី កាលពីថ្ងៃពុធថា៖ «ខ្ញុំនឹកបាល់ទាត់​ប្រទេសអង់គ្លេស។ សម្រាប់ខ្ញុំ វាជាពេលវេលា ដ៏អស្ចារ្យបំផុត នៅក្នុងអាជីពរបស់ខ្ញុំ នៅពេលដែលខ្ញុំបានលេងឲ្យ​ក្រុម​ម៉ែនញូ។ គ្រប់គ្នាដឹងហើយថា នោះជាក្លិប ដែលស្ថិតក្នុងក្រអៅបេះដូងរបស់ខ្ញុំ ហើយខ្ញុំពិតជា ពិតជានឹកខ្លាំងណាស់។»

ប៉ុន្តែកីឡាករវ័យ ២៨ឆ្នាំរូបនេះ បានបន្តថា៖ «ពេលនេះការរស់នៅរបស់ខ្ញុំ នៅប្រទេសអេស្ប៉ាញ។ ខ្ញុំពេញចិត្តលេងនៅ​ទីនោះ ប៉ុន្តែចំពោះអនាគតយ៉ាងណា យើងមិនដឹងនោះទេ។ ខ្ញុំពិតជាសប្បាយរីករាយ។»

កំឡុងពេលទស្សនៈកិច្ចរបស់គាត់នៅទីនោះ មានសិស្សសាលាសិង្ហបុរីជាច្រើន បានចោទជាសំនួរថា៖ «ហេតុអ្វីក៏អ្នកលេង​បាល់ទាត់បានល្អម្លេះ?»

រ៉ូណាល់ដូ បានឆ្លើយតបវិញយ៉ាងសាមញ្ញថា៖ «ខ្ញុំខិតខំហ្វឹកហាត់យ៉ាងខ្លាំង។ បើអ្នកចង់លេងល្អបំផុត អ្នកត្រូវ​តែខិតខំ​ហ្វឹកហាត់ ឲ្យបានម៉ត់ចត់ និងខិតខំជាទីបំផុតដែរ។ ជឿជាក់លើខ្លួនអ្នកផ្ទាល់ ហើយកុំខ្លាចអ្វីទាំងអស់។»

សរុបមក រ៉ូណាល់ដូ នៅតែបញ្ជាក់ពីអនាគតរបស់គាត់ ពុំច្បាស់លាស់ដដែល ពោលគឺគាត់និយាយបែបនេះ មានន័យថា គាត់បើកដៃឲ្យម៉ែនញូ ចូលចចារយកគាត់ទៅវិញ ប៉ុន្តែគាត់និយាយថា រីករាយនៅរៀលម៉ាឌ្រីដ ព្រោះគាត់កំពុង​តែលេង​នៅទីនោះនៅឡើយ និងដើម្បីផ្គាប់ចិត្តអ្នកគាំទ្ររៀលម៉ាឌ្រីដ កុំឲ្យមានប្រតិកម្មដាក់គាត់ខ្លាំងពេក៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៤ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ