ភ្នំពេញ៖ នាយករដ្ឋមន្ត្រីនៃប្រទេសកម្ពុជាលោក ហ៊ុន សែន បានផ្ញើរសារមួយជាសាធារណៈពីឃុំល្វា ស្រុកព្រះស្តេច ខេត្ត​ព្រៃវែង កាលពីថ្ងៃទី១៦ ខែឧសភា នេះ ទាក់ទងនិងការការពាររបបរាជានិយម និងស្ថាប័នព្រះមហាក្សត្រ។ ការលើកឡើង​របស់លោកនាយករដ្ឋមន្ត្រីនេះ ជាប្រតិកម្មឆ្លើយតប នឹងព្រះអង្គម្ចាស់ស៊ីសុវត្ថិ ធម្មិកោ ដែលទ្រង់បានបានចូលរួមប្រលូក ក្នុងឆាយនយោបាយជាមួយនឹងគណបក្សប្រឆាំង។

រូបសញ្ញារបស់ស្ថាប័នព្រះមហាក្សត្រ តំណាងឲ្យរាជានិយមនៅកម្ពុជា។

លោក ហ៊ុន សែន បានបង្ហាញសារនោះថា ព្រះអង្គម្ចាស់ ធម្មិកោបានប្រកាសខ្លួនថា ជាអ្នកតំណាងញាតិវង្សានុវង្ស និង​តំណាងសង្គមរាស្ត្រនិយម។ ចំពោះបន្ទូលរបស់ព្រះអង្គម្ចាស់ ធម្មិកោ នេះបានបង្កើយឲ្យមានប្រតិកម្មតបភ្លាមៗពីលោក ហ៊ុន សែន។ លោកនាយករដ្ឋមន្ត្រីបានចោទថា ការលើកឡើងនេះ អាចធ្វើឲ្យមានការភន្ត័ច្រឡំចំពោះអង្គព្រះមហាក្សត្រ (នរោត្តម សីហមុនី) និងអង្គសម្តេចម៉ែ (មុនីនាថ សីហនុ) ថាបានអនុញ្ញាតិឲ្យព្រះអង្គម្ចាស់ ធម្មិកោចូលរួមជាមួយនឹង​គណបក្សប្រឆាំង ពិសេសអាចធ្វើអោយប៉ះពាល់ ដល់ព្រះកិត្តិនាមរបស់សម្តេចម៉ែ និងព្រះមហាក្សត្រផ្ទាល់តែម្តង។

លោកនាយករដ្ឋមន្រ្តីបានបន្តថា ព្រះអង្គម្ចាស់ ធម្មិកោ មានប្រវត្តិជាអតីតទាហានលន់ នល់ ដែលធ្លាប់ប្រឆាំងនឹង​អតីត​ព្រះមហាក្សត្រ ព្រះបរមរតនកោដ្ឋ (នរោត្ដម សីហនុ) និងរបបរាជានិយម។ លោកហ៊ុន សែន បានលើកពីព្រះអង្គម្ចាស់ ធម្មិកោ ថាបានចូលរួមជាមួយបក្សប្រឆាំង ក្បត់ព្រះមហាក្សត្រ និងស្ថាប័នព្រះមហាក្សត្រ ជាពិសេសផ្ទុយទៅនឹងមាគា ព្រះរាជតម្រិះរបស់ អតីតព្រះមហាក្សត្រ ព្រះបរមរតនកោដ្ឋ។ តែលោកបានទទួលស្គាល់ថា នេះជាសិទ្ធិរបស់ទ្រង់ ក្នុង​ការធ្វើនយោបាយ។

នាយករដ្ឋមន្រ្តីរូបនេះក៏បានអំពាវនាវ ដល់បងប្អូនប្រជពលរដ្ឋ និងព្រះសង្ឃទាំងអស់ កុំឲ្យមានការភន្ត័ច្រឡំជាមួយ​អង្គ​ព្រះមហាក្សត្រ និងអង្គសម្តេចម៉ែ ដែលព្រះអង្គម្ចាស់ ធម្មិកោ បានតាំងខ្លួនជា«តំណាងព្រះរាជវង្ស»នោះ។ ហើយ​លោក ហ៊ុន សែន ដែលជា​​អនុ​ប្រធានគណបក្សប្រជាជនផងនេះ ក៏បានប្រកាស និងអះអាងដែរថា គណបក្សរបស់លោក ជាកំផែង យ៉ាងរឹងមាំ​បំផុត ក្នុង​ការ​ការពារអង្គសម្តេចម៉ែ និងអង្គព្រះមហាក្សត្រ ពិសេស«រាជានិយម»។

សម្រាប់អ្នកវិភាគ និងអ្នកតាមដានស្ថានការណ៍នយោបាយកម្ពុជា បានពន្យល់តបវិញថា ការថ្លែងរបស់លោក ហ៊ុន សែន ដែលរអះអាងថា មាន​តែគណបក្សប្រជាជនកម្ពុជា ដែលអាចការពាររាជជានិយមបាននោះ ពុំមែនជា«ឆន្ទះ»តាមផ្លូវ ច្បាប់នោះទេ។ ព្រោះ​អ្វីៗ​ទាំងអស់ត្រូវបានការពារដោយច្បាប់ មិនមែនការពារដោយបក្ស ឬដោយបុគ្គលនោះឡើយ។ ការ បាត់បង់ ឬឋិតឋេរ ក៏​អាស្រ័យនឹងរបបគ្រប់គ្រងមួយ ដែលប្រកាន់នូវគោលការណ៍«នីតិរដ្ឋ»ផងដែរ។

លោក ឡៅ ម៉ុងហៃ អ្នកវិភាគសង្គម និងនយោបាយ បានលើកឡើងថា ចំពោះ «រាជានិយម» ត្រូវបានការពារ ដោយ​រដ្ឋ​ធម្មនុញ្ញ ដែលជាច្បាប់កំពូលរបស់ជាតិ។ ដូច្នេះគ្មាននណាម្នាក់ អាចរំលាយស្ថាប័នព្រះមហាក្សត្របានឡើយ។ លោក​បន្តថា លើកលែងតែធ្វើរដ្ឋប្រហារ «រដ្ឋធម្មនុញ្ញ» ទើបអាចផ្តួលរំលំរាជានិយមបាន។ តែចំពោះកម្ពុជាបច្ចុប្បន្ន ករណីនោះ​នឹងមិន អាចធ្វើទៅរួចនោះឡើយ។

តែលោកបានធ្វើការកត់សំគាល់ថា កន្លងមកធ្លាប់មានការផ្តួលរំលំរាជានិយមម្តងហើយ។ លោកបន្តថាមុននេះជាងដប់ឆ្នាំ គណបក្សប្រជាជន ក៏ធ្លាប់បានធ្វើការវាយប្រហារ ទៅព្រះករុណាព្រះបរមរតនកោដ្ឋផងដែរ តែក្រោយមកក៏មានការជានា​នឹងគ្នាវិញ និងបានបង្កើតរបបរាជានិយមជាថ្មី។ ក្រោយការបង្កើតនេះ ក៏នៅមានការវាយប្រហារគ្នាម្តងម្កាលដែរ ដូចជា​ធ្វើការប្រៀបប្រដូចទៅនឹងប្រវត្តិសាស្ត្រ «ស្តេចកន» ជាដើម៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី១៨ ឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ