អ្នកនាំពាក្យខាងការពារជាតិ របស់ទីក្រុងសេអ៊ូល បានរាយការណ៍ថា ប្រទេសកូរ៉េខាងជើង បានធ្វើការបាញ់កាំជ្រួច​បញ្ជា​ពីចម្ងាយមួយទៀត ពីឆ្នេរខាងកើតរបស់ខ្លួន នៅថ្ងៃអាទិត្យទី១៩ខែមេសានេះ មួយថ្ងៃក្រោយការបាញ់កាំជ្រួចរយៈខ្លី ចំនួន​បីផ្សេងទៀត ទៅក្នុងទិសដៅដូចគ្នា (សមុទ្រជប៉ុន)។

កាំជ្រួចដាក់តាំងបង្ហាញ របស់ប្រទេសកូរ៉េខាងជើង។

ប្រទេសកុម្មុយនីសបានធ្វើការបាញ់សាកល្បង ការបាញ់កាំជ្រួចប្រភេទនេះ ជាញឹកញយដង តែសកម្មភាពនេះ​បានកើត​មានឡើង បន្ទាប់ពីយន្ដការផ្នែកការទូត ដើម្បីបន្ថយភាពតានតឹងរវាងប្រទេសបងប្អូនគូរសត្រូវទាំងពីរ បានចាប់ផ្ដើម​ដំណើរការរបសខ្លួនរួចហើយនោះ។

ទីក្រុងព្យុងយ៉ាងបានគម្រាម សឹងជារៀងរាល់ថ្ងៃ ជាពិសេសក្នុងរយៈពេលចុងក្រោយនេះ ដើម្បីធ្វើការវាយប្រហារប្រទេស​កូរ៉េខាងត្បូង និងសហរដ្ឋអាមេរិក។ ប្រទេសកូរ៉េខាងជើង បានប្រតិកម្មផងដែរទល់នឹងសមយុទ្ធយោធា ដែលបានធ្វើ​ប្រចាំ​ឆ្នាំរវាងទីក្រុងសេអ៊ូល និងទីក្រុងវ៉ាស៊ីនតោន។ របបកុម្មុយនីសព្រមទាំងបានសម្ដែងការក្ដៅក្រហាយ ទល់នឹង​ទណ្ឌកម្ម​របស់អង្គការសហប្រជាជាតិកាលពីខែកុម្ភះ បន្ទាប់ពីខ្លួនបានបាញ់សាកល្បងនុយក្លេអ៊ែររួចមក។

សម្រាប់អ្នកនាំពាក្យក្រសួងការពារជាតិកូរ៉េខាងត្បូង នេះជាគ្រាប់កាំជ្រួចទីបួន ដែលបានបាញ់ចេញនៅរសៀលថ្ងៃអាទិត្យ របស់ប្រទេសកូរ៉េខាងជើង។ កាលពីថ្ងៃសោរ៍ ប្រទេសនេះបានបាញ់កាំជ្រួចពីរគ្រាប់នៅពេលព្រឹក និងមួយគ្រាប់ទៀត​នៅ​ពេលរសៀល។ ទីក្រុងសេអ៊ូល បានបរិហារអំពើនេះ​ ថាជា«ការបង្កហេតុដ៏ធ្ងន់ធ្ងរ»មួយ។

ក្នុងថ្ងៃអាទិត្យដដែល ពីទីក្រុងម៉ូស្គូ ប្រទេសរ៉ូស្សី អគ្គលេខាធិការនៃអង្គការ​សហ​ប្រជាជាតិ លោកបាន គីម៊ូន​ (Ban Ki-moon) បាននិយាយជាមួយនឹងក្ដីសង្ឃឹមថា «កូរ៉េខាងជើងនឹងបញ្ឈប់ការបាញ់សាកល្បងទាំងឡាយ ហើយដើរ​ចូល​តុចចារ»។

ចំណែកសហរដ្ឋអាមេរិកវិញ ថ្លែងថា ខ្លួនតាមដានសភាពការណ៍នៅក្នុងឧបទ្វីកូរ៉េនេះ យ៉ាងដិតដល់ជាទីបំផុត ហើយ​«បន្ត​គាបសង្កត់ប្រទេសកូរ៉េខាងជើង ដើម្បីអោយប្រទេសនេះចេះសម្ដែងនូវការអត់ធ្មត់ និងធ្វើកាយវិការដើម្បីភាពប្រសើរ​ឡើង នៃទំនាក់ទំនងជាមួយប្រទេសកូរ៉េខាងត្បូង»៕

-------------------------------------------------
ដោយ ៖ កេសរកូល - ភ្នំពេញ ថ្ងៃទី១៩ ខែឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ