ក្រុមពលរដ្ឋប្រមាណជាជាង១០០នាក់ បានបន្តជួបជុំគ្នានៅថ្ងៃសៅរ៍នេះ ដើម្បីស្វែងរកការដាក់ញាតិថ្វាយព្រះមហាក្សត្រ ដើម្បីស្នើរដល់ព្រះអង្គ ឲ្យពន្យាពេលប្រជុំសភា។ ប៉ុន្តែច្រកចូលទៅកាន់ព្រះបរមរាជវាំង ត្រូវបានហ៊ុំព័ទ្ធទៅរនាំងបន្លាលួស និងកងកម្លាំងអាជ្ញាធរ ហើយបានធ្វើឲ្យលេចលឺនូវការរិះគន់ថា «អាជ្ញាធរកំពុងឃុំព្រះមហាក្សត្រ»។ ការរិះគន់ដែលអាជ្ញាធរ​បានច្រានចោល ដោយអះអាងពីមូលហេតុ «ការពារសុវត្ថិភាពរបស់ព្រះមហាក្សត្រ» មកបញ្ជាក់។

ក្រុមប្រជាពលរដ្ឋ ព្យាយាមធ្វើដំណើរទៅកាន់ព្រះបរមរាជវាំង តែត្រូវបានហាមឃាត់ដោយកងកម្លាំងសមត្ថកិច្ច។ (រូបថត MONOROOM.info/ O. Vary)

រាជធានីភ្នំពេញ - ប្រជាពលរដ្ឋប្រមាណជាជាងមួយរយនាក់ ដែលគេជឿថាស្និតនឹងគណបក្សសង្គ្រោះជាតិ ដែលជា​គណបក្សប្រឆាំង បានមកជួបជុំគ្នានៅសួនច្បារមុខមន្ទីររដ្ឋសភាចាស់ មុននឹងយក«ញត្ដិ»ប្រជាពលរដ្ឋដែលបានប្តឹតមេដៃ ជាង២៦ម៉ឺននាក់  ស្នើរដល់ព្រះមហាក្សត្រ ព្រះបាទ នរោត្ដម សីហមុនី ដើម្បីសុំពន្យាពេល សម័យប្រជុំសភាបើក​និតិកាល​ទី៥ថ្មី ដែលគ្រោងនឹងធ្វើ នៅថ្ងៃទី២៣ខែកញ្ញាឆ្នាំ២០១៣ខាងមុខ។

ប៉ុន្តែតាំងពីមុនការជួបជុំគ្នារបស់ប្រជាពលរដ្ឋទាំងនេះ កងកម្លាំងសមត្ថកិច្ចច្រើនរយនាក់ ព្រមជាមួយនឹង​ការពង្រាយ​រនាំង​ដែក និងបន្លាលួសជាច្រើនផង ត្រូវបានដាក់ពង្រាយរួចជាស្រេច នៅគ្រប់ទិសជុំវិញព្រះបរមរាជវាំង ដើម្បីទប់ទល់នឹង​ការ​ហែរក្បួន ឬដំណើររុលមកមុខព្រះបរមរាជវាំង របស់ក្រុមប្រជាពលរដ្ឋ។ សាក្សីជាច្រើន រួមនឹងអ្នកសារព័ត៌មាន​របស់​ទស្សនាវដ្ដីមនោរម្យព័ងអាំងហ្វូផង ដែលមានវត្តមាននៅទីនោះ បានថ្លែងរៀបរាប់ថា រនាំងបន្លាលួសជាច្រើន ត្រូវបាន​ដាក់​ពង្រាយស្ទើរជុំវិញព្រះបរមរាជវាំង ដូចជានៅចំណុចក្បែរតុលាការកំពូល សាលាឧទ្ធរណ៍ (មុខមហោស្រពចតុមុខ) មុខ​វាលព្រះមេរុ និងមុខសារមន្ទីរជាតិជាដើម។

ការពង្រាយរនាំងបន្លាលួស អមការពារដោយកកម្លាំងជាច្រើនរយនាក់ ព័ទ្ឋជុំវិញព្រះបរមរាជវាំងនេះ ត្រូវបានក្រុមប្រជា​ពលរដ្ឋនៅទីនោះ ធ្វើការរិះគន់ថា ជាការគំរាមកំហែង បំបាក់សិទ្ធិសេរីភាព ក្នុងការដើរហើរ និង​បញ្ចេញមតិ​យោបល់​របស់​ប្រជាពលរដ្ឋ។ ក្រុមអ្នករិះគន់ ថែមទាំងបាននិយាយបរិហាពីសកម្មភាពរបស់អាជ្ញាធរ ថាមិនមែន​ជាការការពារ សុវត្ថិភាព​របស់ព្រះមហាក្សត្រនោះទេ តែនោះជាការរារាំងទប់ស្កាត់ «ខ្លាច»ប្រជាពលរដ្ឋនាំ​ញតិ្តទូល​រឿង​ពិតថ្វាយព្រះមហាក្សត្រ។ ប្រជាពលរដ្ឋមួយចំនួន បានហៅការពង្រាយរបាំងបន្លាលួសទាំងនេះ ថាជាការ«ឃុំ»​ព្រះមហាក្សត្រទៅវិញ។

ទស្សនាវដ្តីមនោរម្យព័ងអាំងហ្វូ បានព្យាយាមសុំប្រតិកម្ម ពីមន្ត្រីរដ្ឋាភិបាលលោក ផៃ ស៊ីផាន ចំពោះបញ្ហាខាងលើនេះ តែ​ទូរស័ព្ទរបស់លោកមិនអាចទំនាក់ទំនងបានទេ នៅរសៀលថ្ងៃដដែលនេះ។ ប៉ុន្តែកន្លងមក រដ្ឋមន្ត្រី​ក្រសួងមហាផ្ទៃ លោក ស ខេង ក្នុងនាម​អគ្គបញ្ជាការ​សន្តិសុខ​អចិន្ត្រៃយ៍​សម្រាប់​ការបោះឆ្នោត តែងបានចេញលិខិតជាច្រើនដង បញ្ជាក់​ពីកត្តព្វកិច្ច​របស់អាជ្ញាធរ ក្នុងការរក្សាឲ្យបាននូវសណ្ដាប់ធ្នាប់ សុវត្ថិភាពប្រជាពលរដ្ឋ និងសន្តិសុខសង្គម។

ទោះបីជាយ៉ាងណាក៏ដោយ ក៏នៅវេលាម៉ោងប្រមាណ ១២និង៥០នាទី  ក្រុមមន្ត្រីព្រះបរមរាជវាំងប្រាំនាក់ ដោយមាន​ការ​សម្របសម្រួល ពីអភិបាលរងរាជធានីភ្នំពេញលោក ឃួង ស្រេង ផង បានចេញមកទទួលញត្តិពីតំណាងប្រជាពលរដ្ឋ ដែល​រួមមានលោក សោ ចាន់ថុក លោក យ៉ា យឿន លោក លី សុផុន និងលោក សាន ម៉ៅ ដើម្បីដាក់ទូលថ្វាយព្រះមហាក្សត្រ។ លោក ចាន់ សុវេត អនុប្រធានស៊ើបអង្កេតសមាគមការពារសិទ្ធិមនុស្ស អាដហុក (Adhoc) ដែលមានវត្តមាននៅទីនោះបាន​និយាយាថា ស្នាមមេដៃរបស់ប្រជាពលរដ្ឋ មានឥទិ្ធពលខ្លាំងចំពោះព្រះមហាក្សត្រ។ លោក បានថ្លែងឲ្យដឹងទៀតថា «ស្នាម​មេដៃនេះជាការបង្ហាញពីឆន្ទៈរបស់ប្រជាជន។ (...) ទោះជាយ៉ាងណាក៏ដោយ ព្រះបរមរាជវាំងត្រូវតែចាត់ដំណាង មក​ទទួលដោយខានមិនបាន។»

តំណាងប្រជាពលរដ្ឋមួយរូប លោក សោម ចន្ទថុក បានលើកឡើងថា ស្នាមមេដៃចំនួនជាង២៦ម៉ឺននាក់នេះ បានប្រមូល​ក្នុងរយៈពេលមួយថ្ងៃប៉ុណ្ណោះ ពីប្រជាពលរដ្ឋរស់នៅរាជធានីភ្នំពេញ និងនៅតាមខេត្តនានាដូចជាខេត្តកំពង់ចាម សៀមរាប កំពត ស្វាយរៀង ព្រៃវែង តាកែវ និងខេត្តកណ្ដាល។ លោកបានបន្ថែមទៀតថា ស្នាមមេដៃរបស់ប្រជាពលរដ្ឋ មកពីបណ្ដា​ខេត្តដ៏ទៃទៀត កំពុងប្រមូលមកជាបណ្តើរៗ។

នៅក្នុងព្រឹត្តិការណ៍មួយទៀត ក្នុងថ្ងៃដដែលនេះ មានយុវជនប្រមាណជាងបីរយនាក់ បានជួបជុំគ្នានៅសួនច្បារ​ក្បែរក្រុម​ប្រឹក្សាអភិវឌ្ឍន៍ (CDC) ជិតវត្តភ្នំ បានធ្វើពីធីប្រារព្ធទិវាសន្តិភាពពិភពលោកលើកទី១១ និងដើម្បីដំណើរ​ការស្វែងរក​សន្តិភាព​ក្នុងកម្ពុជាផង។ ក្រោមការរៀបចំចាត់ចែង របស់អង្គការកម្មវិធីអភវិឌ្ឍន៍ធនធានយុវជន (YRDP)  ក្រុមយុវជន​ទាំងនោះ បានដើរឆ្ពោះទៅទៅកាន់ព្រះបរមរាជវាំង ដើម្បីស្នើឲ្យព្រះមហាក្សត្រ ពិចារណាទៅលើការប្រជុំសភានោះដែរ តែពួកគេត្រូវបានកងកម្លាំងសមត្ថកិច្ចហាមឃាត់។

ចំណែកឯនៅជុំវិញរមណីយដ្ឋានវត្តភ្នំវិញ ព្រះសង្ឃប្រមាណជាង៤០អង្គ ដែលមានបំណងចង់ធ្វើពិធីបួងសួងសុំសន្តិភាព ក៏ត្រូវបានកងកម្លាំងសមត្ថកិច្ចរាប់រយនាក់ រារាំងមិនឲ្យធ្វើនោះដែរ។ ច្រកចូលទៅកាន់ រមណីយដ្ឋានវត្តភ្នំ ត្រូវបានហាម​ឃាត់តាំងពីយប់មកម្លេះ បន្ទាប់ពីព្រះអង្គម្ចាស់មួយអង្គ ព្រះនាម ស៊ីសុវត្ថិ ធម្មិកោ បានប្រកាសធ្វើកូដកម្មតមព្រះស្ងោយ ជាមួយនឹងព្រះសង្ឃប៉ុន្មានអង្គទៀត ដើម្បីទាមទាររកយុត្តិធម៌ឲ្យពលរដ្ឋម្ចាស់ឆ្នោត។ តែកូដកម្មនេះ បានមកដល់ទី​បញ្ចប់​ហើយនៅថ្ងៃនេះ ដោយព្រះអង្គម្ចាស់បានថ្លែងថា ព្រះអង្គត្រូវបានរំខានដោយក្រុមអាជ្ញាធរ៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី២១ កញ្ញា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ