ធានាសាស្ត្រ កសិកម្ម ចិញ្ចឹមសត្វ ការនាំចូលសាច់សត្វ ដោយគ្មានការត្រួតពិនិត្យ បញ្ហាព្រៃឈើ ទីផ្សារជាតិ និងអន្តរជាតិ ព្រមទាំងបញ្ហាក្ដៅផ្សេងទៀត ដូចជាការផ្តល់ដីសម្បទាន សេដ្ឋកិច្ច និងសង្គមកិច្ចជាដើម ត្រូវបានលើកជាចំណោទឡើងដោយលោក ប៉ុល ហំម ប្រធានគណៈកម្មការទី៣ នៃរដ្ឋសភា ដាក់ចំពើមុខ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក អ៊ុក រ៉ាប៊ុន កាលពីរសៀលថ្ងៃទី២៧ ខែវិច្ឆិកា នាវិមានរដ្ឋសភា។

នៅក្នុងសវនាការនោះ លោករដ្ឋមន្ត្រីបានស្រាយបំភ្លឺថា ទាំង​ក្រសួង ទាំង​រដ្ឋាភិបាល បាន​ខិតខំ​បង្ក​ឲ្យ​មាន​នូវ​ប្រព័ន្ធ​ធារាសាស្ត្រ ស្ទើ​គ្រប់​តំបន់ គ្រប់​កន្លែង ដើម្បី​ជួយ​សម្រួល​ផ្នែក​បញ្ហា​ទឹក ក្នុង​ការ​ពង្រីក​កសិកម្ម របស់​កសិករ​ទាំង​អស់។

លោក អ៊ុក រ៉ាប៊ុន បានលើកឡើងថា កម្ពុជាបានត្រៀមនាំអង្ករទៅក្រៅប្រទេស ឲ្យបានមួយលានតោន នៅក្នុង​ឆ្នាំ២០១៥ខាងមុខនេះ។ ឯបញ្ហាដីសម្បីទានសេដ្ឋកិច្ច ក្រសួង ក៏ដូចជារដ្ឋាភិបាល បាននឹងកំពុងធ្វើការ​ដក​ហូត​ដីជាបណ្តើរៗ ពីបណ្តាក្រុមហ៊ុនមួយចំនួន ដែលគ្មានសកម្មភាពប្រមាណ ៦៨ ក្រុមហ៊ុន នៃក្រុមហ៊ុន ទាំង​១២០ក្រុមហ៊ុននោះ។

រដ្ឋមន្រ្តីរូបនេះបន្តថា រដ្ឋាភិបាលបានដកហូតដីទាំងនោះ មកដាក់ក្រោមការគ្រប់គ្រងរបស់ក្រសួងវិញ។ ហើយ​ក្រសួងក៏មានវិធានការ ដើម្បីគ្រប់គ្រង ការពារនូវធនធាននានា និងអនុវត្តតាមបន្ទាត់ច្បាប់ ពង្រីកការ​ការពារ​ព្រៃឈើ និងជំរុញឲ្យមានការដាំកូនឈើឡើងវិញ។ លោកក៏បញ្ជាក់ថា ឯបញ្ហា នាំចូលនូវគ្រឿងចក្រ និងជី សម្រាប់វិស័យកសិកម្ម រដ្ឋាភិបាលមិនតម្រូវឲ្យធ្វើការបង់ពន្ធឡើយ។

ក្នុងកិច្ចសម្ភាសជាមួយអ្នកសារព័ត៌មាន លោករដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានធ្វើការ​អះអាង​ជាថ្មីថា ព្រៃឈើនៅកម្ពុជាទាំងអស់ នាពេលបច្ចុប្បន្ននេះ នៅសល់រហូតដល់ជាង ៦០ ភាគរយទៀត។

ប៉ុន្តែបើយោងតាមរបាយការណ៍មួយ របស់គេហទំព័រ Open Development Cambodia (ODC) បានយក​រូប​ភាព​ផ្កាយរណប ណាស្សា (NASA)ដែលថតចុងក្រោយបំផុត ចេញកាលពីខែធ្នូ ឆ្នាំ ២០១៣ មកប្រៀបធៀប​ជា​មួយ​នឹងរូបភាពប្រទេសកម្ពុជា នៅមុនឆ្នាំ១៩៧៥ ហើយបញ្ជាក់យ៉ាងច្បាស់ថា គម្រប​ព្រៃឈើបច្ចុប្បន្ន មានតិច​ទៅៗ គឺចំនួនត្រឹមតែ ៤៦,៣៣ ភាគរយប៉ុណ្ណោះ ដោយ​រួម​បញ្ចូល​ទាំងចម្ការកៅស៊ូផង។ រីឯរូបភាពដែលថត​ក្នុងឆ្នាំ១៩៧៣ បានបង្ហាញថា ប្រហែល ៧២.១១%នៃប្រទេសកម្ពុជា ត្រូវបានគ្រប់ដណ្តប់​ដោយ​ព្រៃឈើ។ ប៉ុន្តែការបម្រែបម្រួលព្រៃឈើ ដែលមានសភាពខ្លាំងក្លាបំផុតនេះ បានកើតឡើងនៅក្នុងរយៈពេល​៥-៦ឆ្នាំ​ចុង​ក្រោយនេះ៕

សូមតាមទស្សនាកិច្ចសម្ភាសជាមួយអ្នកសារព័ត៌មានដូចខាងក្រោម៖

(វីដេអូមិនទាន់រួចរាល់)