ព្រះអគ្គិបានឆេះកម្ទេចតូប និងទ្រព្យ​សម្បត្តិ​របស់​អាជីវករ នៅ​ផ្សារ​ចាស់ កណ្ដាល​រាជធានី​ភ្នំពេញ ស្ទើ​តែ​ទាំង​អស់​។ ក្រុម​អាជីវករ​មួយ​ចំនួន បាន​ត្អូញ​ត្អែរ​ថា នោះ​ជា​ទ្រព្យ​សម្បត្តិ ដែល​ពួក​គាត់​ខំ​ស្វែង​រក​ជិត​ពាក់​កណ្តាល​ជីវិត​ទៅ​ហើយ តែ​​នៅ​ទី​បំផុត ត្រូវ​បាន​អគ្គិភ័យ​ដ៏​កំណាច ឆាប​យក​អស់​គ្មាន​សល់។ អាជីវករ​មួយ​ចំនួន​បាន​សម្រេច​ចិត្ត​ទៅ​ខ្ចី​ប្រាក់​គេ ដើម្បី​យក​មក​សាង​សង់​តូប​សំរាប់​លក់​ដូរ​ឡើង​វិញ។ ក្រុម​អាជីវករ​ខ្លះ បាន​ថ្លែង​ថា បើ​រង​ចាំ​​ត​ទៅ​ទៀត ពួក​គាត់​នឹង​ខាត​ពេល​វេលា​រក​ទទួល​ទានកាន់​តែ​ច្រើន  ព្រោះ​គ្រួសារ​ពួក​គាត់​ទាំង​នោះ ពឹង​ផ្អែក​តែ​ទៅ​លើការ​ប្រកប​របរ​លក់​ដូរ​នៅ​ផ្សារ​នេះ តែ​មួយ​មុខ​ប៉ុណ្ណោះ។

យ៉ាងណាក៏ដោយចុះ ក្រុមអាជីវករ​ទាំងនោះ នៅ​តែ​បាន​ធ្វើការ​អំពាវនាវឲ្យអាជ្ញាធរ រកដំណោះស្រាយ​ជួយ​ពួក​ខ្លួន ខណៈ​ដែលលោកអភិបាលរងរាជធានី​ភ្នំពេញ លោក ឃួង ស្រេង ធ្លាប់​បាន​និយាយនៅក្រោយអគ្គិភ័យ ថា​ឲ្យ​ពួកខ្លួនរងចាំការដោះស្រាយ ពីសំណាក់​ថ្នាក់​ដឹក​នាំ។ ប៉ុន្តែ​រហូត​មក​ដល់​ពេលនេះ នៅមិនទាន់មានតំណាង​អាជ្ញាធរ​ណាម្នាក់ មកសួរ​នាំដើម្បី​ជួយ​រក​ដំណោះ​ស្រាយ ក្រៅតែពីការអនុញ្ញាតឲ្យសាងសង់​តូបឡើងវិញ​ដោយ​ខ្លួនឯង និងគ្រាន់តែបានផ្តល់​ខ្នាត​តូប​នីមួយៗ ត្រូវ​មាន​កំពស់ ៤ម៉ែត្រ​ប៉ុណ្ណោះ នោះឡើយ។

ការខាតបង់ ដែលមានចំនួនច្រើនពាន់ម៉ឺនដុល្លារ

អាជីវករលក់សំលៀកបំពាក់ អ្នកស្រី តាំង សុខជា ជាបានប្រាប់ទស្សនាវដ្តីមនោរម្យអាំងហ្វូថា ភ្លើងដែលឆេះ​ទ្រព្យសម្បត្តិនៅក្នុងផ្សារនេះអស់ចំនួន ៨ពាន់ដុល្លាហើយ។ បច្ចុប្បន្ននេះ អ្នកស្រីកំពុងសាសងតូបលក់ថ្មី នៅ​ទីតាំងរបស់គាត់ដដែល។ ចំពោះការសាងសង់នេះ អ្នកស្រីចំណាយថវិការផ្ទាល់តែម្តង អស់យ៉ាងតិច ៨រយ​ដុល្លារ ដោយមិនមាន​រដ្ឋាភិបាលជួយចេញថ្លៃខូចខាត ឫជួយជួសជុលតូបនោះទេ។

រីឯលោក ហួរ ផល្លា អាជីករលក់គ្រឿងអលង្ការ បានអំពាវនាវដល់រដ្ឋាភិបាល ឲ្យជួយដល់គាត់​ដែលជាជន​រង​គ្រោះផង និងជួយផ្តល់ជាថវិការ ឫជាសម្ភារៈដើម្បីសាងសង់តូប។ លោកបាននិយាយថា ទ្រព្យសម្បត្តិ​របស់​លោក ឆេះអស់ជាង ៣ម៉ឺនដុល្លា ហើយតូបថ្មីដែលគាត់កំពុងសាងសង់នេះ ចំនាយអស់ទឹកប្រាក់ផ្ទាល់ខ្លួន ចំនួន ១១៥០ដុល្លា។ តែមកដល់ពេលនេះ លោកមិនបានលឺថា អាជ្ញាធរនឹងជួយដោះស្រាយបញ្ហានេះទេ។

ចំណែងឯអ្នកស្រី សេង មួយគា អ្នកលក់ផ្លែឈើឯនោះវិញ បានត្អូញត្អែរថា អ្នកស្រីមានសមាជិកគ្រួសារ ក្នុង​បន្ទុកជាច្រើននាក់ ដែលមិនអាចតំអក់ក្នុងការរកទទួលទាននេះ បានយូរតទៅទៀតឡើយ។ ស្រី្តអាជីវកររូប​នេះ បានបន្តការត្អូញត្អែរទៀតថា កន្លងមកក្រុមគ្រួសាររបស់អ្នកស្រី តែងតែជួយឧបត្ថមថវិការដល់ជនក្រីក្រ តាមរយៈកាកបាតក្រហមកម្ពុជា មិនដែលខាន។ ដូច្នេះនៅពេលអាសន្នទាល់ក្រដែរនេះ អ្នកស្រីចង់ឲ្យមាន​ការជួយឧបត្ថម្ភវិញម្តង។

លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ មិនអាចទំនាក់ទំនងសុំការស្រាយបំភ្លឺបានទេ ក្នុង​ពេល​នេះ៕