ក្នុងសម័យនេះ ជីវិតមនុស្សសត្វ មិនត្រូវបានចារ ដោយវាសនា ឬព្រហ្មលិខិតទៀតហើយ តែជីវិតមនុស្ស ជា​ល្បែងកំសាន្ដ របស់ក្រុមមនុស្ស គ្មានគុណធម៌មួយចំនួន ដែលផឹកប្រមឹក បើកបរយានយន្ដលើទ្រូងផ្លូវ ដោយ​គ្មានយល់ពីច្បាប់ទម្លាប់ គិតស្មានតែមួយផ្លូវមានតែឯង។ នេះគេនៅមិនទាន់និយាយដល់ ថានៈបុណ្យស័ក្តិ និងធន់ធានដែលក្រុមមនុស្សទាំងនោះ តែងយកមកប្រើ ដើម្បីជះទៅលើជនរងគ្រោះ នៅពេលខ្លួនបានបង្ក​គ្រោះថ្នាក់​​ម្ដងៗនោះផង។

សូមមើលរូបភាពខាងលើ ដែលនឹងធ្វើឲ្យអ្នកគិតថា បើសិនជាថ្ងៃណាមួយ រឿងនេះធ្លាក់មកអ្នកវិញ... តើអ្នក​ត្រូវស្ថិតក្នុងសភាពបែបណា? ស្ត្រីម្នាក់ ត្រូវបានរថយន្ដទំនើប របស់មន្ត្រីយោធាថានៈផ្កាយពីរម្នាក់ បើក​បំបុក​ប៉ើងដូចខ្យល់ ទៅបុកទ្ទប់នឹងរថយន្ដមុួយទៀត រហូតធ្លាយពោះស្លាប់។

ហេតុការណ៍ដ៏រន្ធត់នេះ បានកើតឡើងនៅថ្ងៃទី១៥ ខែសីហា ឆ្នាំ២០១៥ វេលាម៉ោង១៥ និង១៥នាទី នៅ​តាម​បណ្ដោយផ្លូវ២០០១ ស្ថិតក្នុងភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ។ យោធាពាក់ផ្កាយពីរម្នាក់ ដែល​ត្រឡប់​ពីផឹក​ស្រវឹង​ធ្លាក់ភ្នែក បានបើករថយន្ដទំនើប ធុន ហាយឡែនឌ័រ ពាក់ស្លាកលេខ ភ្នំពេញ 2AA-2600 របស់ខ្លួន យ៉ាង​លឿន ហើយជ្រុលទៅបុកស្ត្រីម្នាក់ ដែលកំពុងជិះម៉ូតូ ក្នុងទិសស្របគ្នា បណ្ដាល​ឲ្យ​ស្ត្រីរូបនោះ ប៉ើង​ខ្ទាត​ទៅ បុក​ខ្ទប់​នឹង​រថយន្ដនីសាន់មួយគ្រឿងទៀត ពេញមួយទំហឹង។ នេះបើតាមការ​អះអាង របស់​មន្ត្រី​សមត្ថកិច្ចនគរបាល ដែល​បាន​ចុះអន្តរាគមន៍ នៅនឹងកន្លែង។ ហេតុការណ៍ដ៏អាណោចអាធម រក​អ្វី​មក​ថ្លែង​ពុំ​បាន ព្រោះស្ត្រី​រង​គ្រោះ បានធ្លាយពោះវៀន ស្លាប់នឹងកន្លែងភ្លាមៗ។

មន្ត្រីនគរបាល បានធ្វើការងាររបស់ខ្លួន ដោយចាប់យោធារូបនេះ ប្រមូលយក រថយន្តបង្ករ និងម៉ូតូជនរងគ្រោះ ទៅកាន់ស្នងការនគរបាលភ្លាម ដើម្បីធ្វើការដោះស្រាយ និងចាត់ការតាមនីតិវិធីច្បាប់។ ប៉ុន្តែរឿងដ៏រន្ធត់ នៅ​តែ​បន្តលង សម្រាប់ក្រុមគ្រួសារនៃជនរងគ្រោះ ដែលបានទទួលសាកសព បន្ទាប់ពីក្រុមសមត្ថកិច្ច បាន​ធ្វើការ​ត្រួត​ពិនិត្យហើយនោះ ដើម្បីយកទៅធ្វើបុណ្យ ទាំងខ្លោចផ្សារ។

សភាពដ៏តក់ស្លុតរកថ្លែងពុំបាន បានកើតឡើង ចំពោះស្ត្រីរងគ្រោះ និងក្រុមគ្រួសារនេះ តែមិនប្រាកដថា វានឹង​មិន​កើតឡើង ចំពោះអ្នកនៅថ្ងៃនេះ ឬថ្ងៃស្អែកឡើយ ដរាបណាការអនុវត្តន៍ច្បាប់ចរាចរណ៍ មិនត្រូវបានរឹតបន្តឹង ហើយការដាក់ទោសទណ្ឌ មិនធ្វើឲ្យបានម៉ឺងម៉ាត់ ទៅលើជនគ្មានគុណធម៌ ដែលប្រើប្រាស់ទ្រូងថ្នល់ យ៉ាង​អាណា​ធិបតេយ្យ ដូចសព្វថ្ងៃ៕