ថ្ងៃផុតកំណត់ ក្នុងការចុះឈ្មោះគណបក្សនយោបាយ និងចុះបញ្ជីបេក្ខជនឈរឈ្មោះបោះឆ្នោត ជ្រើសតាំង​តំណាងរាស្ត្រ​នីតិកាលទីប្រាំ នាល្ងាចថ្ងៃច័ន្ទទី១៣ខែឧសភា។ ក្នុងរយៈពេល១៥ថ្ងៃនេះ មានតែគណបក្សនយោបាយ​ប្រាំបី​ប៉ុណ្ណោះ ក្នុង​ចំណោមគណបក្សជាង៤០ ដែលបានចុះឈ្មោះ ចូលរួមការបោះឆ្នោត នាថ្ងៃទី២៨ ខែកក្កដាខាងមុខ ។

សន្និសីទកាសែតនាទីស្តីការ គ.ជ.ប ក្នុងថ្ងៃទី១៣ ខែឧសភា។ (រូបថត O. Vary/ MONOROOM.info)

ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ ត្រូវបានប្រកាសបិទជាផ្លួវការត្រឹម​ម៉ោង១៧.៣០នាទី ក្នុងថ្ងៃទី១៣ ខែឧសភា ល្ងាចនេះ ក្នុងសន្និសីទកាសែតនាទីស្តីការ គ.ជ.ប។

ក្នុងអង្គសន្និសិទការសែត លោក សោ សុភរី សមាជិក គ.ជ.ប បានប្រកាសថាមានគណបក្សចំនួនប្រាំបី​ ដែលបានចុះ​ឈ្មោះ។ តែមានគណបក្សប្រាំដែលបានទទួលស្គាល់ជាផ្លូវការ៖ គណបក្សប្រជាជនកម្ពុជា គណបក្សសញ្ជាតិកម្ពុជា គណបក្សសម្ព័ន្ធដើម្បីប្រជាធិបតេយ្យ គណបក្សហ៊្វុនស៊ិនប៉ិច គណបក្សសាធារណរដ្ឋប្រជាធិបតេយ្យ ។

លោកបន្តថា ឯគណបក្សសង្គ្រោះជាតិ គ.ជ.ប បានដាក់លិខិតនៅក្នុងថ្ងៃនេះឲ្យធ្វើការកែតម្រូវចំណុចខ្វះខាតមួយចំនួន ដូចជាកំហុសខាងអក្ខរាវិរុទ្ធ និងកំហុសលើឈ្មោះ ថ្ងៃខែឆ្នាំកំណើតរបស់បេក្ខជនដែលឈរឈ្មោះ។ ចំពោះគណបក្សខ្មែរ​ឈប់ក្រ និងគណបក្សខ្មែរអភិវឌ្ឍន៍សេដ្ឋកិច្ចកំពុងតែពិនិត្យ។ ក្នុងចំណោមគណបក្សទាំងប្រាំបី នោះមានពីរគណក្ស​ដែល​មានថ្នាក់ដឹកនាំជាស្រី្ត និងជាបេក្ខភាពនាយករដ្ឋមន្ត្រី នោះគឺគណបក្សហ៊្វុនស៊ិនប៉ិច និងគណបក្សសាធារណរដ្ឋប្រជាធិបតេយ្យ។

លោកបានបង្ហាញថា ចំពោះគណបក្សទាំងប្រាំដែលគ.ជ.ប ទទួលស្គាល់ជាផ្លូវការមានបេក្ខជនពេញសិទ្ធិចំនួន៥៩៦ នាក់ មានស្រ្តីចំនួន១០៥ នាក់។ និងបេក្ខជនបំរុងចំនួន៦៨៨ នាក់ និងស្រ្តីចំនួន១៧៩ នាក់។ ឯគណបក្សបីទៀត មិនទាន់ដឹង​ចំនួនបេក្ខជនពិតប្រាដកនៅឡើយទេ។

ចំពោះគណបក្សសង្រ្គោះជាតិ លោកទេព នីថា អគ្គលេខាធិការ គ.ជ.ប បានបញ្ជាក់ថា ចាប់រាប់ពីថ្ងៃនេះ មានរយៈពេល​ប្រាំថ្ងៃសម្រាប់ធ្វើការកែតម្រូវនូវចំណុចខ្វះខាត។ ការកែសម្រួលនោះ ចំពោះតែបញ្ជីឈ្មោះបេក្ខជន ប្រហែលជា២០នាក់​ប៉ុណ្ណោះ។ ផុតរយៈពេលប្រាំថ្ងៃនេះ បើគណបក្សសង្រ្គោះជាតិមិនបានធ្វើការកែតម្រូវ ឬកែតម្រូវហើយមិនបានបញ្ជួនមក គ.ជ.ប វិញទេ មានន័យថា បោះបង់ការចុះឈ្មោះបេក្ខជននោះចោល តាមច្បាប់ គ.ជ.ប នឹងដកសិទ្ធិចូលរួមនេះ។

លោកទេព នីថា បញ្ជាក់ថា បើទោះជាគ្មានគណបក្សសង្គ្រោះជាតិ ដែលជាគណបក្សប្រឆាំងមិនបានបញ្ជូន បញ្ជីឈ្មោះ​បេក្ខជនតំណាងរាស្ត្រ សម្រាប់ការបោះឆ្នោតនាថ្ងៃខាងមុខក៏ដោយ ដំណើរការនៃការបោះឆ្នោត នៅតែប្រព្រឹត្តទៅ​ជា​ធម្មតា។

ប៉ុន្តែគណបក្សប្រឆាំងនេះក៏ធ្លាប់បានប្រកាសថា ខ្លួនគ្រោងនឹងធ្វើបាតុកម្មជាលើកទីពីរនាថ្ងៃទី២០ខែឧសភានេះ បន្តរការ​ទាមទារឲ្យមានការផ្លាស់ប្តូរ និងកែទម្រង់គ.ជ.ប។

សូមរម្លឹកថារយៈពេល១៥ថ្ងៃ ចាប់គិតពីថ្ងៃ២៧ ខែមេសា ដល់ថ្ងៃទី១៣ ខែឧសភា ជាពេលវេលាមួយដែលគ.ជ.ប បាន​កំណត់សម្រាប់គ្រប់គណបក្សទាំងអស់រៀបចំបញ្ជូន បញ្ជីឈរឈ្មោះគណបក្សនយោបាយ និងបញ្ជីបេក្ខជនឈរឈ្មោះ ដើម្បីចូលរួមការបោះឆ្នោត។

--------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី១៣ ឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ