កូកាអ៊ីន ប្រមានជា១០០គីឡូក្រាម ត្រូវបានរកឃើញដោយនគរបាលអេស្ប៉ាញ នៅក្នុងប្រអប់ដាក់ចេក សម្រាប់យកទៅ​លក់ឯផ្សារ។ ប្រអប់ដែលពោពេញ ទៅដោយចេកនោះ មានមួយចំនួនបានដាក់ ចេញទៅលក់ខ្លះទៅហើយ ក្នុងទីក្រុង​បាសឺឡូន (Barcelona)។

ម្សៅកូកាអ៊ីន ដាក់បន្លំនៅក្នុងផ្លែចេក។

ការប្រកាសហេតុការណ៍នេះ ត្រូវបានធ្វើឡើងកាលពីចុងសប្ដាហ៍មុននេះ នៅខណៈពេលដែលអ្នកលក់ម្នាក់ នៅផ្សារដ៏ធំ​មួយក្នុងទីក្រុងបាសឺឡូន ឈ្មោះផ្សារ ម៉ែកាបាណា (Mercabarna) បានជូនដំណឹងនេះទៅអោយនគរបាលតំបន់ ពីវត្តមាន​របស់កញ្ចប់គ្រឿងញៀន នៅក្នុងប្រអប់ដាក់ចេកសម្រាប់លក់។

អ្នកលក់រូបនោះ បានថ្លែងប្រាប់អ្នកកាសែតថា ភ្នាក់ងារនគរបាលបាន ប្រមូលយកទៅពិនិត្យទាំងអស់ នូវប្រអប់ដាក់ចេក​ទាំងនោះ ដែលមានមួយចំនួនត្រូវបានលក់ដាច់ និងមួយចំនួនទៀតត្រូវបាន បោះចែកអោយអ្នកទទួលទិញបន្ត អស់ទៅ​ហើយ។

គេបានរកឃើញ ពីប្រអប់ដាក់ចេក នូវគ្រឿងញៀន ប្រមាណជា៨៥កញ្ចប់ មានទម្ងន់សរុបប្រមាណជា ១០០គីឡូក្រាម។ បើតាមអ្នកលក់រូបនោះ វាទំនងជាគ្រឿងញៀន  ដែលចេញមកពីប្រទេសកូឡំប៊ី និងត្រូវបាននាំចូល មកក្នុងប្រទេស​អេស្ប៉ាញ តាមផែរសមុទ្រ តារ៉ាហ្គូន (Tarragone)។

ប្រទេសអេស្ប៉ាញ ជាច្រកនាំចូលសំខាន់មួយ នៃគ្រឿងញៀន «កូកាអ៊ីន» ដែលមានប្រភពពីទ្វីបអាមេរិកឡាទីន មកក្នុង​ទ្វីបអ៊ឺរ៉ុប ដែលមានប្រមាណជា ៤០% ទៅ៥០% នៃការរិបអូសកន្លងមក រវាងពីឆ្នាំ២០០១ មកទល់នឹងឆ្នាំ២០១០។ នេះ​បើ​តាមអ្នកសង្កេតការណ៍នៅអ៊ឺរ៉ុប ដែលមានជំនាញខាងគ្រឿងញៀន។ រវាងពីខែមករា មកដល់ខែធ្នូរឆ្នាំ២០១២ ម្សៅកូកាអ៊ីន ប្រមាណជា ១៧,៦៥តោន ត្រូវបាននគរបាលរឹបអូស នៅក្នុងប្រទេសអេស្ប៉ាញ។

នាយកនគរបាលជាតិអេស្ប៉ាញ ឯកទេសខាងកូកាអ៊ីន បាននិយាយអ្នកកាសែតថា ប្រអប់ដាក់ចេកទាំងនេះ ជាវិធីមួយ ក្នុងចំណោមវិធីឯទៀត ប្រើក្នុងការរត់គ្រឿងញៀន។ លោកបន្ថែមថា «កុងទើន័រដែលដឹកតាមនាវា ជាមធ្យោបាយមួយ ដែលត្រូវបានប្រើជាញឹកញាប់។ ចំនុចដែលសំខាន់ គឺនៅពេលនាំចូលមកដល់ផែ ហើយផលិតផលទាំងអស់ ត្រូវគេនាំ​ចេញពីផែភ្លាមៗ ដើម្បីអាចដឹកជញ្ជូន ទៅអោយដល់គោលដៅ។»

អ្នកទទួលខុសត្រូវរូបនេះ បាននិយាយពន្យល់ទៀតថា «ថ្នាំញៀន អាចមកដល់គោលដៅ ដោយលាក់នៅក្នុងបាត ដែល​បានធ្វើជាពីរជាន់ ដូចជាក្ដាសម្រាប់ដាក់ទ្រទំនិញទាំងនេះ។» នៅក្នុងវិធីដទៃទៀត លោកបានលើកបង្ហាញ នូវចេកជ័រ ដែលម្សៅញៀនត្រូវបានគេលាក់ នៅក្នុងនោះ។

«បញ្ហាវាត្រង់ថា កុងទើន័រមួយ មានទំនិញទម្ងន់ប្រមាណជា ២៤តោន ហើយក្នុងនោះ មាន២០០ ទៅ៣០០គីឡូក្រាម ជា​ចេកក្លែងក្លាយ។ ក្នុងចំនួនដ៏តិចនេះ បើគ្មានព័ត៌មានអ្វីប្លែក នគរបាលពិបាកនឹងតាមរក អោយឃើញណាស់។»

ជាទម្លាប់ ឈ្មួញគ្រឿងញៀន ត្រូវរកវិធីដើម្បី ទទួលយកចេកក្លែងក្លាយទាំងនេះ មុននឹងទំនិញត្រូវបាននាំទៅដល់ទីផ្សារ។ តែពេលនេះ មិនដឹងជាហេតុភេទអី ...

--------------------------------------------------
ដោយ ឈូករ័ត្ន - ប៉ារីស​ ថ្ងៃទី០៧ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ