ប្រធានាធិបតីឥណ្ឌូនេស៊ី៖ ការបំផ្ទុះគ្រាប់បែកនៅចាការតា ជា«អំពើភេរវកម្ម»
«ប្រជាជាតិ និងប្រជាជនរបស់យើង មិនមានភាពតក់ស្លុតទេ។ យើងនឹងមិនចុះចាញ់ នូវទង្វើភេរវកម្មទាំងនេះឡើយ។» នេះជាការប្រកាសរបស់លោក ចូដូ វីដូដូ (Joko Widodo) នៅតាមកញ្ចក់ទូរទស្សន៍ «Metro TV» ដោយបានបន្ថែមថា អាជ្ញាធរឥណ្ឌូនេស៊ី សូមធ្វើការថ្កោលទោស នូវសកម្មភាពបំផ្ទុះគ្រាប់បែក ដែលបានបង្កឲ្យខូចដល់សណ្ដាប់ធ្នាប់ និងការភ័យភិត ដល់ប្រជាពលរដ្ឋ។
របាយការណ៍ចុងក្រោយ បានអះអាងថា យ៉ាងហោចមនុស្ស៧នាក់ ក្នុងនោះ៥នាក់ ជាជនខ្មាន់កាំភ្លើង បានស្លាប់នៅក្នុងព្រឹត្តិការណ៍ បំផ្ទុះគ្រាប់បែក ជាច្រើនគ្រាប់ នៅព្រឹកថ្ងៃព្រហស្បត្តិ៍នេះ នៅពីមុខហាងកាហ្វេ «Starbucks» កណ្ដាលរដ្ឋធានីចាការតា។ រីឯជនរងគ្រោះពីរនាក់ទៀត មានម្នាក់ជាជនជាតិកាណាដា។ ក្រសួងការបរទេសឥណ្ឌូនេស៊ី បានប្រកាសពីដំណឹងនេះ ទៅកាន់ស្ថានទូតនៃប្រទេសកាណាដា ប្រចាំប្រទេសឥណ្ឌូនេស៊ី ទាក់ទងនឹងមរណៈភាព របស់ពលរដ្ឋកាណាដា នៅក្នុងការវាយប្រហារ។
[...]
