ពាក្យ«ដូរមេឃុំបម្រើបក្ស ដាក់មេឃុំបម្រើរាស្ត្រ» ដែលដុតឲ្យឆេះ
ពាក្យស្លោកឬសារនយោបាយ ដែលមានន័យបញ្ឆិតបញ្ឆៀង ផ្អៀងផ្អង ចងជាការប្រមាថ ញុះញង់ ប្រុងនឹងបង្កហេតុ មិនអាចយកមកលេង នៅក្នុងសង្វៀន នៃការប្រកួតប្រជែងនយោបាយ នៅក្នុងប្រទេសកម្ពុជាបានទេ ជាពិសេសពាក្យពេជ្រទាំងឡាយណា ដែលចេញពីគណបក្សសង្គ្រោះជាតិ ដៃគូប្រកួតដ៏ធំមួយ របស់គណបក្សកាន់អំណាច។ បើនៅតែហ៊ានរឹងទទឹង គណបក្សប្រជាជនកម្ពុជា ដែលមានអតីតភាព កើតចេញពីគណបក្សកុម្មុយនីសឥណ្ឌូចិន របស់លោក ហូ ជីម៉ិញ បានព្រមានរួចជាស្រេច ថានឹងប្ដឹងម្ចាស់ពាក្យស្លោក ដែលមានន័យថា «ដូរមេឃុំបម្រើបក្ស ដាក់មេឃុំបម្រើរាស្ត្រ»នេះ ទៅកាន់តុលាការ។
ប៉ុន្តែ គេក៏ត្រូវនិយាយដែរ ពីប្រសិទ្ធិភាពនៃប្រតិកម្មយ៉ាងរហ័ស របស់អ្នកនាំពាក្យគណបក្សប្រជាជនកម្ពុជា ដែលបានចេញសេចក្ដីថ្លែងការណ៍ព្រមាននេះ យ៉ាងទាន់ហន់ តែប៉ុន្មានម៉ោង(ឬនាទី)ប៉ុណ្ណោះ នៅក្រោយការថ្លែងរបស់លោក ហ៊ុន សែន [...]
