តុលាការនៅជាយក្រុងប៉ារីស បានបើកសំនុំរឿង ពីបទធ្វើអោយស្លាប់ដោយអចេតនា នៅបន្ទាប់ពីសាក្សីម្នាក់​មិនបញ្ជេញ​ឈ្មោះ បានចេញ​មក​បកអាក្រាត ហេតុការណ៍ ដែលទំនងជាពិត (?) ហើយបានផ្សាយព្រោងព្រាង នៅលើប្រព័ន្ធផ្សព្វ​ផ្សាយបារាំង។ ចំណែកខាងស្ថានីយ៍ទូរទស្សន៍ និងផលិតកម្មវិញ ក៏ត្រៀមវាយលុក តាមប្រព័ន្ធតុលាការតបវិញដែរ ពីបទ​«បរិហាកេរ្ត៍»។

រូបតំណាងអោយកម្មវិធីទូរទស្សន៍ «កោះល័នតា»។

បើទោះជាអាជ្ញាធរកម្ពុជា បានបិទសំនុំរឿងនេះហើយក៏ដោយ ក៏ហេតុការណ៍នេះ នៅបារាំងឯណោះ ស្ថិតនៅឆ្ងាយនៅ​ឡើយ ពីការបិទបញ្ចប់។ ក្នុងអត្ថបទមុន យើងបានស្រង់ប្រភពមួយ មកបញ្ជាក់ថា តុលាការទីក្រុងប៉ារីស នឹងមិនបើក​ការ​អង្កេត​លើ​សំនុំរឿងនេះទេ។ តែនៅថ្ងៃព្រហស្បត្តិ៍ទី២៨ខែមិនានេះ តុលាការមួយទៀត នៅតំបន់ក្រេតីយ៍ (Créteil) ជាយ​ទីក្រុង​បារីស បានសម្រេច​បើកការ​អង្កេត លើ​សំនុំរឿងនេះ ពីបទ«ធ្វើអោយស្លាប់»ដោយអចេតនា។

កោសលវិច្ច័យ លើសាកសព ដែលដឹកត្រឡប់ពីកម្ពុជា មកដល់បារាំងនៅព្រឹកថ្ងៃព្រហស្បត្តិ៍នោះ នឹងចាប់ផ្ដើមធ្វើ​នៅថ្ងៃ​សុក្រទី២៩មខែមិនានេះ។ លោក ហ្សេរ៉ា បាបាំង អាយុ២៥ឆ្នាំ បានរងគ្រោះដល់ជីវិត ដោយជម្ងឺគាំងបេះដូង នៅក្នុង​កម្មវិធី​មួយ ដែលលោកបានចុះឈ្មោះចូលលេង ផលិតដោយ ផលិកម្មអេវេនឈើ ឡាញ (Adventure line productions - ALP ) និងចាក់ផ្សាយជារៀងរាល់សប្ដាហ៍ នៅលើកញ្ចក់ទូរទស្សន៍បារាំង ប៉ុស្ដ៍លេខមួយ។ កម្មវិធីនេះ បានដំណើរការនៅ​លើ​កោះរ៉ុង កណ្ដាលឆកសមុទ្រកំពង់សោមខ្មែរ ហើយទើបតែចាប់ផ្ដើមថត នៅថ្ងៃសុក្រទី២២ខែមិនា បានតែមួយថ្ងៃដំបូង​ប៉ុណ្ណោះ តែក៏ទទួលហេតុការណ៍ ដ៏អកុសលនេះកើតឡើង។

ការស៊ើបអង្កេតជាជំហានដំបូង ពីបទ«ធ្វើអោយស្លាប់ដោយអចេតនា» ត្រូវបានធ្វើដោយតុលាការប្រចាំតំបន់ ដោយសារ​តែហ្សេរ៉ា បាបាំង មុនមរណភាព មានទីលំនៅក្នុងទីក្រុងវិលជីហ្វ (Villejuif) ដែលស្ថិតក្រោមដែនអំណាចយុត្តិធម៌ នៃ​តំបន់ វ៉ាលឌឺម៉ាន (Val-de-Marnne 94) ដែលមានរដ្ឋបាលកណ្ដាល នៅឃុំក្រេតីយ៍។ ការស៊ើបអង្កេតនេះ នៅមិនទាន់​ជា​ការ​សង្ស័យណាមួយនៅឡើយ ហើយក៏មិនទាន់បានធ្វើការចោទប្រកាន់ ទៅលើនរណាម្នាក់ដែរ។ តែគ្រាន់តែ​បាន​បើក​ធ្វើ នៅ​ក្នុងរង្វង់ច្បាប់ ដែលអនុញ្ញាតអោយប្រព័ន្ធតុលាការ មានសិទ្ធិធ្វើការងាររបស់ខ្លួនតាមទម្លាប់ ជាទូទៅក្នុងប្រទេសបារាំង ដោយមិនចាំបាច់មានពាក្យបណ្ដឹង ពីគ្រួសារជនរងគ្រោះនោះប៉ុណ្ណោះ។ ប៉ុន្តែវានឹងអាចកំណត់អោយច្បាស់ ពីមូលហេតុ និង​រឿងរ៉ាវពិតប្រាកដ នៃមរណភាព ដើម្បីផ្ដល់ជាពន្លឺ ដល់សាធារណជន និងជាពិសេសជូនទៅដល់ គ្រួសារជនរងគ្រោះ។

របាយការណ៍ផ្លូវការរបស់ស្ថានីយ៍ទូរទស្សន៍ និងផលិតកម្មដែលផលិតកម្មវិធី ដូចជាបានបង្កអោយមានភាព​ស្ងាត់ស្ងៀម​រួចហើយ នៅមុននេះមួយថ្ងៃ។ តែអ្វីដែលបានធ្វើអោយ មានការរំជើបរំជួលខ្លាំងមកវិញនោះ គឺនៅបន្ទាប់ពីការផ្សាយ នូវ​ការបកអាក្រាតមួយ កាលពីថ្ងៃព្រហស្បត្តិ៍ទី២៨ខែមិនា របស់គេហទំព័រមួយឈ្មោះ «ឈប់លើរូបភាព (Arrêt sur images)» ដោយបានដកស្រង់សម្ដី សាក្សីមួយរូប ដែលមានវត្តមាននៅផ្ទាល់កន្លែង។ អ្នកសារព័ត៌មាន ដែលបានធ្វើ​របាយការណ៍នេះ ក៏បានអះអាងដែរថា ពួកគេបានធ្វើការប្រកបដោយវិជ្ជាជីវៈ ១០០% ជាមួយនឹងប្រភពច្បាស់ការណ៍ ដែលជា​សមាជិក​នៃ​ផលិកម្ម អេវេនឈើ ឡាញ។ សាក្សីនោះ បានចោទផលិកម្ម ថាបានធ្វើអោយយឺត ក្នុងការបញ្ជូន ជន​រង​គ្រោះ​ទៅ​កាន់​មន្ទីពេទ្យ។

សូមអានរបាយការណ៍ «បកអាក្រាត» ដោយចុចលើទីនេះ។

ចំណែកខាងផលិកម្ម អេវេនឈើ ឡាញ ឯណោះវិញ នៅថ្ងៃព្រហស្បត្តិ៍ដដែល បានប្រកាសមកថា នឹងត្រៀមប្ដឹងបក ពី​បទ«បរិហាកេរ្តិ៍» ប្រឆាំងនឹងសាក្សីនោះ ដែលនិយាយបង្កាច់បង្ខូចផលិកម្មខ្លួន តាមរយៈគេហទំព័រ«ឈប់លើរូបភាព»។ ប្រភពច្បាស់ការណ៍មួយទៀត ក៏បានបញ្ជាក់ដែរថា គ្រួសារជនរងគ្រោះ ក៏បាន«ផ្ដាច់ទំនាក់ទំនង» ជាមួយផលិតកម្ម និង​ស្ថានីយ៍ទូរទស្សន៍នេះដែរ ប្រហែលក្រោយបន្ទាប់ពីបាន ដឹងដំណើររឿងដូចគ្នា ស្ដីពីលោកហ្សេរ៉ា បាបាំង។

មរណភាពរបស់ ហ្សេរ៉ា បាបាំង បានបង្ខំអោយស្ថានីយ៍ទូរទស្សន៍ លប់ចោលនូវកម្មវិធីវគ្គទី១៦ នៃ«កោះល័នតា»​ឆ្នាំ​២០១៣នេះជាស្ថាពរ ហើយបានបញ្ជូនបេក្ខជន និងក្រុមការងារទាំងអស់ អោយត្រឡប់មកបារាំងវិញ។ ក្នុងវគ្គមុន​ឆ្នាំ​២០១២ កម្មវិធីនេះបានជួយរកទូរទស្សនិកជន អោយស្ថានីយ៍ទូរទស្សន៍ បានប្រមាណជាមធ្យម ៧,៤លាននាក់៕

--------------------------------------------------------
ដោយ សេក មនោរកុមារ - ប៉ារីស​ ថ្ងៃទី២៨ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ