មនោរម្យ.អាំងហ្វូ នឹងស្វែងរកចំនុចសំខាន់ផ្សេងៗទៀត មកជម្រាបក្នុងអត្ថបទក្រោយៗទៀត របស់ខ្លួន។ តែ​ខាង​​ក្រោម​នេះ យើងនឹងរៀបរាប់ ពីចំណុចសំខាន់ៗមួយចំនួន ដែលអ្នកដឹកនាំ តែងតែមាន៖


១. ដោះស្រាយបញ្ហា៖
មើលហេតុការណ៏​ឲ្យ​បាន​សព្វ​គ្រប់ ហើយ​ស្វែង​រក​មធ្យោបាយ ដើម្បី​ដោះ​ស្រាយ​ឲ្យ​មាន​ភាព​ប្រសើរ។ សង្កេត​​មើល​បញ្ហា​នៅ​ជុំ​វិញ​អ្នក ហើយ​ស្តាប់​មតិ​គេ បន្ទាប់​មក​គិត​ថា តើ​អ្នក​គួរ​ជួយ​ដោយ​វិធី​ណា?

២. គិតឃើញរូបភាពធំ៖
តើអ្នកកំពុងតែដោះស្រាយបញ្ហាឬ? បើអ្នកកំពុងតែដោះស្រាយ អ្នកត្រូវតែវិភាគទៅលើបញ្ហាតូចៗ ឲ្យបាន​ល្អិត​ល្អន់ និងឲ្យ​យល់ពីមូលហេតុរបស់វា។ បញ្ហាស៊ីជំរៅមិនមែន ម្នាក់ឯងអាចដោះស្រាយបាននោះទេ វាគួរតែ​មាន​ការពិភាក្សាជាក្រុម ដែលជាពេលដែលអ្នកត្រូវដើរតួនាទីជាអ្នកដឹកនាំ។

៣. ដឹងសភាពការមុន៖
បើអ្នកមានគំនិតនេះ នៅក្នុងអារម្មណ៏ពិតជាប្រសើរ។ អ្នកប្រហែលជាអាច ទាយមើលបញ្ហា ដែលនឹងអាច​កើត​ឡើង។ ជៀសវាងការទទឹងរង់ចាំបញ្ហាទាំងនោះកើតឡើង អ្នកត្រូវតែមានវិធីសាស្រ្តដើម្បីការពារវា។ ភាពខុស​ប្លែកគ្នា រវាងអ្នក​ចាត់ការ និងអ្នកដឹកនាំ ខុសគ្នាត្រង់ចំណុច៖ អ្នកចាត់ការមានវិធីសាស្រ្តល្អក្នុងការដោះស្រាយ​បញ្ហា រីឯអ្នកដឹកនាំ​មាន​សកម្មភាព និងមានវិធីដោះស្រាយមុនពេលដែលបញ្ហាកើតឡើង។

៤. ធ្វើការសម្រេចចិត្ត និងទទួលខុសត្រូវចំពោះអ្វីដែលបានកើតឡើង៖
ដើម្បីឲ្យមានប្រសិទ្ធភាពក្នុងការដោះស្រាយបញ្ហាធំៗបាន អ្នកចាំបាច់ត្រូវតែធ្វើការសម្រេចចិត្តឲ្យបានរហ័ស និងត្រឹម​ត្រូវ។ ត្រូវចាំថា ការសម្រេចចិត្តជាឥទ្ធិពលរបស់អ្នក។ ម្យ៉ាងវិញទៀតអ្នកត្រូវមានការទទួល​ខុសត្រូវ​ខ្ពស់ ចំពោះអ្វីដែល​ខ្លួនឯងបានធ្វើ។ ឧទាហរណ៏៖ គិតថា ខ្លួនអ្នកជាអ្នកកាន់ចង្កូតកប៉ាល់ ដៃរបស់អ្នកពិតជា​មាន​សារៈសំខាន់ ហើយសំលឹង​មើលទិសដៅឲ្យបានត្រឹមត្រូវ។

៥. ចែករំលែកចក្ខុវិស័យរបស់អ្នក៖
បើអ្នកជាអ្នកដឹកនាំ ហើយអ្នកអាចមើលឃើញ បញ្ហាធំជាងពួកគេនោះ អ្នកគួរតែបង្ហាញអ្វីៗដែលអ្នកបានដឹង ប្រាប់ដល់​ពួកគេ ដើម្បីឲ្យគេបានជួយអ្នកក្នុងការកែប្រែអ្វីៗ។ អ្នកត្រូវតែចែករំលែកអ្វីដែលមានភាពវិជ្ជមាន​ជា​មួយពួកគេ លើក​ទឹក​ចិត្តគេ និងដឹកនាំគេ។ បង្ហាញដល់ពួកគេ ឲ្យបានឃើញថា សកម្មភាពរបស់គេ ពិតជា​បាន​ដូច​ក្តីសុបិន្តមែន។

៦. ត្រូវចាំថា ការងារទាំងអស់មិនមែនមានតែអ្នកទេ៖
អ្នកដឹកនាំដែលអស្ចារ្យត្រូវតែ បង្ហាញពីតួនាទីរបស់គេ រហូតដល់ទីបញ្ចប់ តែមិនមែនមានន័យថា អ្វីៗទាំងអស់ អ្នកត្រូវ​រ៉ាប់​រងតែម្នាក់ឯងនោះទេ។ អ្នកត្រូវចេះបែងចែក ការងារ និងតួនាទីឲ្យគេធ្វើឲ្យបានល្អ និងត្រូវទៅនឹង​ជំនាញ​របស់គេផង៕