ការបែកបាក់ស្នេហា ជាអារម្មណ៏ដែលពិបាកបំផុត ហាក់ដូចជាយើងព្យាយាមដកដង្ហើមនៅក្នុងទឹកដូច្នោះដែរ។ យើងចាប់​ផ្តើមកសាងជីវិតស្នេហា ជាមួយមនុស្សម្នាក់ដែលយើងជឿជាក់ និងបារម្មណ៏ពីគេ។ បន្ទាប់មកអ្វីៗក៏មានការផ្លាស់ប្តូរ ដោយ​អ្វីដែលយើងធ្លាប់តែមានសង្ឃឹមនោះ បែរជាត្រូវឃ្លាតឆ្ងាយពីខ្លួនយើងទៅវិញ ដោយបន្សល់ទុកនូវ ភាពសោកសៅ កំហឹង និងអារម្មណ៏ឈឺចាប់ដ៏ធ្ងន់ធ្ងរ ដល់ខ្លួនយើង និងក្នុងពេលអនាគត។

នេះជាការណែនាំខ្លះៗ ដែលអាចជួយឲ្យអ្នកព្យាបាលរបួសស្នាមឈឺចាប់ ដែលអ្នកធ្លាប់មាន ឲ្យក្លាយទៅជាមនុស្សម្នាក់ថ្មី ដែលមានទឹកចិត្ត និងស្មារតីល្អឡើងវិញ។

១. ទុកពេលឲ្យខ្លួនរបស់អ្នកខ្លះ៖
អ្នកប្រហែលជាស្ថិតក្នុងការទំនាក់ទំនង ក្នុងកំឡុងពេលណាមួយ ឬប្រហែលជាគិតដល់មនុស្សម្នាក់នោះគ្មានឈប់។ ឥឡូវ​ជាពេលដែលអ្នកត្រូវគិតជាថ្មីវិញ ក្រលែកទៅមើលជីវិតរបស់អ្នក ហើយបន្ទាប់មកត្រូវធ្វើដំណើរ ទៅកាន់​គោលដៅ​របស់​អ្នក។ មនុស្សគ្រប់គ្នា តែងតែជួបរឿងបរាជ័យ និងភាពអស់សង្ឃឹម។ ប៉ុន្តែប្រការសំខាន់ អ្នកខ្លួនឯងត្រូវតែចេះកែប្រែ ដើម្បី​ការពារជីវិតរបស់អ្នក។

២. បំបាត់ចោលការចងចាំទាំងអស់ ដែលធ្វើឲ្យអ្នកនឹកឃើញដល់គេ៖
ព្យាយាមបំភ្លេចគេ ទោះជាគេជាមនុស្សដែលមានន័យសំរាប់អ្នកប៉ុណ្ណាក៏ដោយ ព្រោះគេបានធ្វើបាបអ្នក។ ហែក ឬលុប​ចោលរូបភាព ឬសំបុត្រទាំងអស់។ កុំធ្វើសកម្មភាពណា ឬទៅកន្លែងណា ដែលអ្នកធ្លាប់ធ្វើ ឬទៅជាមួយគ្នា។

៣. ផ្តាច់ការទាក់ទងគ្រប់ផ្នែកទាំងអស់៖
ការរស់នៅសព្វថ្ងៃ មនុស្សភាគច្រើន មានប្រព័ន្ធអនឡាញ រៀងៗខ្លួន ដូចជា ហ្វេសប៊ុក (Facebook) ធ្វីតថឺ (Twitter) ឬស្កាយផ៏ (Skype)។ ផ្តាច់ការទាក់ទងជាមួយគេ គ្រប់មធ្យោបាយទាំងអស់។

៤. ហាត់ប្រាណ និងបរិភោគឲ្យបានត្រឹមត្រូវ៖
ចេញទៅធ្វើការហាត់ប្រាណនៅខាងក្រៅ ព្រោះវាអាចធ្វើឲ្យអារម្មណ៏របស់អ្នកមានភាពធូរស្បើយ។ ទទួលទានអាហារ​ដែល​មានប្រយោជន៏ និងបំប៉នសុខភាព ដូចជាបរិភោគ បន្លែផ្លែឈឺ សាច់ ទឹកដោះគោ ជាពិសេសត្រូវបរិភោគ​ឲ្យបាន​ទៀងទាត់។

៥. ព្យាយាមកុំនៅកន្លែងតែមួយ ឬកន្លែងក្បែរគ្នាជាមួយគេ៖
វាពិបាកបំភ្លេចណាស់ បើអ្នកនៅតែឃើញរូបគេរាល់ថ្ងៃ។ បើអ្នករៀននៅសាលាជាមួយគេ កុំអង្គុយក្បែរគេ ឬបរិភោគអាហា​រក្បែរគ្នា បើសិនជាអាចអ្នកគួរតែប្តូរសាលាថ្មីជាការប្រសើរ។

៦. រស់នៅដោយសុទិដ្ឋិនិយម៖
វាប្រហែលជាពិបាកក្នុងការធ្វើ ប៉ុន្តែបើអ្នកនៅតែគិតអវិជ្ជមាន ឬនឹកដល់ការឈឺចាប់ពីអតីតកាលនោះ អ្នកកាន់តែមានភាព​ធ្ងន់ធ្ងរថែមទៀត។ ព្យាយាមញញឹមឲ្យបានច្រើន តាមតែអ្នកអាចធ្វើទៅបាន ព្រោះវាអាចធ្វើឲ្យអ្នកមានអារម្មណ៏​ប្រសើរ​ឡើង។ អ្នកគួរតែមើលរឿងកំប្លែង អានសៀវភៅសំណើច ឬស្តាប់រឿងកំប្លែងពីមិត្តភក្តិ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៩ ខែមិនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ