យន្ដហោះប្រភេទ ប៊ូអីង (Boeing 737) មួយគ្រឿង របស់ក្រុមហ៊ុនអាកាសចរណ៍ «UTair airlines» ដែលដឹកអ្នកដំណើរ១៦៦នាក់ រួមនឹងបុគ្គលិកបម្រើការលើយន្ដហោះ ចំនួន៦នាក់ផង បានរអិលធ្លាក់ផ្លូវ ចូលទៅក្នុងស្ទឹងមួយ នៅពេលចុះចតនៅព្រលានយន្ដហោះ ក្រុង «Sotchi» (ភាគខាងត្បូងប្រទេសរ៉ូស្ស៊ី) កាលពីយប់ថ្ងៃសុក្រ ឆ្លងចូលមកថ្ងៃសៅរ៍។

ស្លាបម្ខាងរបស់យន្ដហោះ បានរងការខូចខាតធ្ងន់ធ្ងរ មុននឹងផ្ទុះឆេះជាអគ្គិភ័យឡើង។

អាជ្ញាធរតំបន់ទទួលបន្ទុកផ្នែកសុខភាព បានប្រកាសឲ្យដឹងថា នៅក្នុងហេតុការណ៍នេះ មនុស្ស១៨នាក់ បានទទួលការថែទាំ និងការព្យាបាល ពីក្រុមគ្រូពេទ្យ។ នៅក្នុងចំណោមអ្នករបួសទាំងនេះ មាន៣នាក់ ជាកុមារ។

ការស៊ើបអង្កេតមួយ ត្រូវបានបើកធ្វើ ដើម្បីស្វែងរកការបញ្ជាក់ ពីមូលហេតុនេះគ្រោះថ្នាក់ខាងលើ ដែលបានកើតឡើង នៅវេលាម៉ោង ២និង៥០នាទី ទៀបភ្លឺព្រឹកថ្ងៃសៅរ៍ ទី០១ ខែកញ្ញា ឆ្នាំ២០១៨នេះ។

ដោយឡែក នៅក្នុងប្រតិបត្តិការជួយសង្គ្រោះនោះ បុគ្គលិកបម្រើការម្នាក់ ក្នុងព្រលានយន្ដហោះ បានស្លាប់។ មូលហេតុនៃមរណភាព អាចបណ្ដាលមកពីអាការៈគាំងបេះដូង។ នេះ បើតាមការអះអាង របស់អ្នកនាំពាក្យ ព្រលានយន្ដហោះ ក្រុង «Sotchi»។

សូមបញ្ជាក់ដែរថា ក្រុង «Sotchi» ដែលស្ថិតនៅជាប់មាត់សមុទ្រខ្មៅ ភាគខាងត្បូងនៃប្រទេសរ៉ូស្ស៊ី ធ្លាប់ទទួលធ្វើជាម្ចាស់ផ្ទះ នៃព្រឹត្តិការណ៍​ប្រកួតកីឡាអូឡាំពិក សិសិររដូវ ឆ្នាំ២០១៤៕