បន្ទាប់ពីបានស្នើសុំឡើងតុលាការ ជាមួយលោក កឹម សុខា នៅក្នុងសំនុំរឿង «ក្បត់ជាតិ» ដែលលោកអះអាងថា គ្រាន់តែ​ជាលេសលើគោក និងគួរឲ្យអស់សំណើច ដើម្បីឈានទៅរំលាយ​គណបក្សសង្គ្រោះជាតិនោះ នៅថ្ងៃនេះ លោក សម រង្ស៊ី បានពន្យុះតុលាការកម្ពុជាជាថ្មី ឲ្យធ្វើការចោទប្រកាន់ ទៅលើមេដឹកនាំ របស់ប្រទេសមហាអំណាច ចំនួនពីរបន្ថែមទៀត ដោយហេតុថា ស្ថាប័នមួយចំនួន នៃប្រទេសទាំងពីរនោះ សុទ្ធសឹងធ្លាប់មានទំនាក់ទំនង ជាមួយគណបក្សសង្គ្រោះជាតិ ក្នុងពេលកន្លងមក។

អតីតប្រធានគណបក្សសង្គ្រោះជាតិ បានសរសេរនៅលើបណ្ដាញសង្គមថា៖ «ការចោទប្រកាន់លោក កឹម សុខា ពីបទ "ក្បត់ជាតិ សន្និដ្ឋិភាពជាមួយបរទេស" ត្រូវរាលដាល មកដល់រដ្ឋាភិបាលសហរដ្ឋអាមេរិក និងរដ្ឋាភិបាលប្រទេសអាល្លឺម៉ង់»។ 

មេដឹកនាំប្រឆាំង បានពន្យល់ពីមូលហេតុឡើងថា៖ 

«- រដ្ឋាភិបាលសហរដ្ឋអាមេរិក ដោយសារតែអង្គការអាមេរិកាំង "IRI" និង "NDI" បានផ្តល់ជំនួយ ឲ្យគណបក្សសង្គ្រោះជាតិ ដោយបានរៀបចំសិក្ខាសាលា នៅប្រទេសម្ពុជា ដើម្បីជួយបណ្តុះបណ្តាលធនធានមនុស្ស ឲ្យមានការយល់ដឹងកាន់តែច្បាស់ អំពីសិទ្ធិមនុស្ស និងលទ្ធិប្រជាធិបតេយ្យ។»

«- រដ្ឋាភិបាលប្រទេសអាល្លឺម៉ង់ ដោយសារតែអង្គការអាល្លឺម៉ង់ "Konrad Adenauer Fondation (KAF)" បានជួយគណបក្សសង្គ្រោះជាតិ ក្នុងការរៀបចំកម្មវិធីនយោបាយ របស់ខ្លួន។»

បន្ទាប់មក លោក សម រង្ស៊ី បានពន្យុះតុលាការកម្ពុជា បែបចំអកថា៖ «ដូច្នេះ តុលាការនៃប្រទេសកម្ពុជា ក្រោមការត្រួតត្រារបស់លោកនាយករដ្ឋមន្ត្រី ហ៊ុន សែន ត្រូវតែធ្វើការចោទប្រកាន់ផងដែរ ឲ្យបានគ្រប់ជ្រុងជ្រោយ មកលើលោក ដូណាល់ ត្រាំ (Donald Trump) ជាប្រធានាធិបតី នៃសហរដ្ឋអាមេរិក និងលោកស្រី អង់ជឺឡា មែរគែល (Angela Merkel) ជានាយករដ្ឋមន្ត្រី នៃប្រទេសអាល្លឺម៉ង់ ដោយសារតែប្រទេសទាំងពីរនេះ បាន "សមគំនិតជាមួយលោក កឹម សុខា ក្នុងការប៉ុនប៉ង រំលំរដ្ឋាភិបាលលោក ហ៊ុន សែន"»។

ប្រាកដហើយ ថារដ្ឋាភិបាលគណបក្សប្រជាជនកម្ពុជា របស់លោក ហ៊ុន សែន ពិតជាពិបាកទទួលយកការពន្យុះខាងលើនេះ ពីសំណាក់មេដឹកនាំប្រឆាំងណាស់ ហើយពិតណាស់ ថាប្រតិកម្មនឹងធ្លាក់មកដល់ ក្នុងពេលខាងមុខ៕