កាលពីព្រឹកម៉ិញនេះ សកម្មជនគណបក្សប្រឆាំងដ៏ធំនៅកម្ពុជា គណបក្សសង្គ្រោះជាតិ បានមកជួបជុំគ្នាធ្វើបាតុកម្ម នាទីលានប្រជាធិបតេយ្យ ក្នុងគោលបំណងបញ្ជូនញត្តិរបស់ខ្លួនទៅ គ.ជ.ប តាមរយៈការដង្ហែរជាក្បួន។

លោក កឹមសុខា អនុប្រធានគណបក្សសង្គ្រោះជាតិ បានអាននូវសេចក្តីថ្លែងការរបស់ខ្លួន ដោយសង្កត់ធ្ងន់ថា ការបង្កើត ឲ្យមានបាតុកម្មនោះឡើង ក្នុងគោលបំណងចង់ឲ្យកម្ពុជា ក្រោយការបោះឆ្នោតអណត្តិទីប្រាំ នាខែកក្កដាខាងមុខនេះ មាន«រដ្ឋាភិបាលមួយស្របច្បាប់»។

ការលើកឡើងដូចនេះ ដោយលោកបានបញ្ជាក់ថា តាមរបាយការណ៍របស់អង្គការអ៊ិនឌីអាយ(NDI) និងអង្គការ​ខុមហ្វ្រេល (COMFREL) បានបង្ហាញថា គ.ជ.ប មានកំហុសឆ្គងក្នុងការធ្វើបញ្ជីឈ្មោះអ្នកបោះឆ្នោត ដែលជាកំហុស​ដ៏ធ្ងន់ក្នុងការបំប៉ោង និងបំបាត់ឈ្មោះអ្នកបោះឆ្នោត សម្រាប់នីតិកាលទីប្រាំនេះ។

លោកសុំឲ្យគ.ជ.ប ពន្យាពេលបោះឆ្នោតនីតិកាលទីប្រាំនេះ ដើម្បីធ្វើការចុះឈ្មោះ និងរៀបចំបញ្ជីឈ្មោះអ្នក​បោះឆ្នោត​សារជាថ្មីឡើងវិញ ដោយធានាឲ្យមាននូវគុណភាពគ្រប់គ្រាន់។

លោកបន្តថា សុំឲ្យសហគមអន្តរជាតិ ជួយ ជុំរុញឲ្យការរៀបចំបោះឆ្នោតខាងមុខនេះមានលក្ខណៈសេរី ត្រឹមត្រូវ និង​យុត្តិធម៌។ ព្រមទាំងជួយអន្តរាគម ឲ្យមានការវិលត្រឡប់ដោយសុវត្តិភាព និងគ្មានលក្ខខ័ណ្ឌ របស់ប្រធាន​គណបក្ស​សង្គ្រោះជាតិ បានចូលរួមក្នុងការបោះឆ្នោតក្នុងខែកក្កដា ខាងមុខនេះ។

លោកបានបញ្ជាក់ថាបើគ.ជ.ប និងរាជរដ្ឋាភិបាល មិនទទួលយកនូវអនុសាសន៍របស់អង្គការសហប្រជាជាតិ អង្គការ​ជាតិ អង្គការអន្តរជាតិ និងគណបក្សនយោបាយទេ នោះការបោះឆ្នោតនិងមិនប្រព្រឹត្តទៅដោយសេរី ត្រឹមត្រូវ និង​យុត្តិធម៌ទេ។ ដូច្នេះសុំឲ្យសហគមអន្តរជាតិ មិនទទួលស្គាល់លទ្ធផលនៃការបោះឆ្នោត និងមិនទទួលស្គាល់រាជរដ្ឋាភិបាល​ថ្មីនោះ។

លោក ហូ វ៉ាន់ តំណាងឲ្យក្រុមបាតុកម្មដោយអហិង្សា បានឡើងអានញត្តិស្តីពី«សុឆន្ទៈមហាជន» ដែលបានដាក់ជូន គ.ជ.ប មានបួនចំណុចសំខាន់ៗ ដូចទៅនឹងសេចក្តីថ្លែងការនោះដែរ។

លោក កឹម សុខា បានប្រាប់ថា នៅថ្ងៃទី២៤ ខែមេសានេះ នៅសហរដ្ឋអាមេរិច ប្រជាពលរដ្ឋខ្មែរ និងសហគមអន្តរជាតិ ក៏បានធ្វើបាតុកម្មទាមទារឲ្យមានការបោះឆ្នោតដោយសេរី ត្រឹមត្រូវ និងយុត្តិធម៌ដូចគ្នានេះដែរ។

នៅវេលាម៉ោងជាងដប់ព្រឹក តំណាង គ.ជ.ប. លោកថោង ស៊ឹម បានមកទទួលយកញត្តិពីគណបក្សប្រឆាំង នៅទីលាន​ប្រជាធិបតេយ្យ កាលពីព្រឹកថ្ងៃទី២៤ខែមេសានេះផ្ទាល់តែម្តង។ លោកបានបញ្ជាក់ថា លោកត្រូវបាន គ.ជ.ប ចាត់តាំង​ឲ្យមកទទួលយកញត្តិនៅថ្ងៃនេះ ហើយលោកសន្យាថានឹងនាំយកញត្តិនេះ ដាក់ជូនដោយផ្ទាល់ដល់ប្រធាន គ.ជ.ប។

មនោរម្យព័ងអាំងហ្វូ មិនអាចសុំការបញ្ជាក់ពីការទទួលញត្តិរបស់គណៈប្រឆាំងនេះ ពីលោក ទេព នីថា អគ្គលេខាធិការ គ.ជ.ប បានទេ ដោយលោកពុំទទួលទូរសព្ទ័។ ប៉ុន្តែថ្មីៗនេះលោកបានប្រាប់វិទ្យុអូស្ត្រាលីថា លោកបានត្រៀមតំណាង ដើម្បីទៅទទួលយកញត្តិនោះហើយ។ ប៉ុន្តែ គ.ជ.ប នៅតែមិនអាចធ្វើអ្វី ឱ្យលើសពីច្បាប់បាននោះឡើយ។ លោកបាន​ហៅការធ្វើបាតុកម្មនោះថា ជាសិទ្ធិពេញទីរបស់ពួកគេ ក្នុងការសម្តែងមតិនៅក្នុងសង្គមប្រជាធិបតេយ្យ។

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី២៤ មេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ