មន្ទិលសង្ឃ័យបានកើតឡើង បន្ទាប់ពីសម្ដីរបស់ លោក ហ៊ុន សែន នាយករដ្ឋមន្រ្តីថ្មីដែលទើបតែជ្រើសតាំង ពីសមាជិក​សភា«ឯកបក្ស» នៅថ្ងៃទី២៤ខែកញ្ញានេះ ក្នុងការថ្លែងទៅកាន់អ្នកសារព័ត៌មានថា មូលហេតុដែលបក្សប្រឆាំងមិនចូលរួម​ប្រជុំសភាលើកដំបូងគឺដោយសារថា បក្សប្រជាជនមិនយល់ព្រមតាមសំណើររបស់មេដឹក នាំបក្សសង្គ្រោះជាតិចង់គ្រប់​គ្រងរដ្ឋសភា។ ក៏ប៉ុន្តែលោក យឹម សុវណ្ណ បានអះអាងថា អ្វីដែល គណបក្សនេះចង់បាន គឺយុត្តិធម៌ចំពោះម្ចាស់ឆ្នោត។

លោក សម រង្ស៊ី (ខាងឆ្វេង) និងលោក ហ៊ុន សែន ចាប់ដៃគ្នានៅមន្ទីរដ្ឋសភាជាតិ ថ្ងៃទី១៧ខែកញ្ញាឆ្នាំ២០១៣។ (រូបថត MONOROOM.info/ O. Vary)

លោក យឹម សុវណ្ណ អ្នកនាំពាក្យគណបក្សសង្គ្រោះជាតិ និងជាអ្នកមានវត្តមាននៅក្នុងជំនួបលើកទី២ ជាមួយលោក ហ៊ុន សែន កាលពីសប្តាហ៍មុននោះ លោកបានថ្លែងប្រាប់ទស្សនាវដ្តីមនោរម្យព័ងអាំងហ្វូ នៅថ្ងៃនេះថា អ្វីដែលគណបក្ស​សង្គ្រោះជាតិចង់បាន គឺចង់រកយុត្តធម៌ជួនពលរដ្ឋ ចង់បានតុល្យភាពអំណាច ជាមួយរដ្ឋាភិបាលដើម្បីកុំឲ្យ គណបក្ស​ប្រជាជនកម្ពុជា ធ្វើអ្វីស្រេចតែចិត្តតទៅទៀត។

«... ទៅសួរលោក ហ៊ុន សែន ខ្លូនឯងទៅ ...»

ទស្សនាវដ្តីមនោរម្យព័ងអាំងហ្វួ បានសាកសួរអ្នកនាំពាក្យរូបនេះបន្តថា តើអ្វីដែលលោក ហ៊ុន សែន និយាយកាលពី​ព្រឹក​ថ្ងៃទី២៤ខែកញ្ញាឆ្នាំ២០១៣ ថា​គណបក្សសង្គ្រោះជាតិ«តថ្លៃ»អំណាចចង់កាន់កាប់រដ្ឋសភា ដោយមិនគិតរកយុត្តិធម៌​ជូន​ពលរដ្ឋជាមុននោះ ជា​ការពិត​ឬ​យ៉ាង​ណា? លោក យឹម សុវណ្ណ បានឆ្លើយថា «សូមលោកទៅសួរលោក ហ៊ុន សែន ខ្លូនឯង​ទៅ»។

ប្រតិកម្មពីគណបក្សសង្គ្រោះជាតិ តាមរយៈអ្នកនាំពាក្យនេះ បានធ្វើឡើងបន្ទាប់ពីសេចក្ដីអត្ថាធិប្បាយ​របស់​លោក ហ៊ុន សែន ទៅកាន់អ្នកការសែតនៅមុខមន្ទីររដ្ឋសភាថា នៅក្នុងជំនួបកំពូលលើកទី២នោះ ប្រមុខដឹកនាំបក្សសង្គ្រោះជាតិ បានធ្វើសម្បទានឲ្យគណបក្សប្រជាជនកម្ពុជា ដោយយល់ព្រមទទួលយកអាសនៈ៥៥ ដែល ប្រកាសដោយ គជប និង​គណបក្សប្រជាជនកម្ពុជា ទទួលបាន ៦៨ កៅអី ព្រមទាំងទទួល ស្គាល់លោក ហ៊ុន សែន ជានាយករដ្ឋមន្រ្តី ជាថ្នូនឹងការ​ផ្តល់តំណែងជាប្រធានសភា មកគណបក្សសង្គ្រោះជាតិ។

លោក ហ៊ុន សែន បានថ្លែងថា គណបក្សប្រជាជនកម្ពុជា បានបដិសេធមិនយល់ព្រមតាមការស្នើសុំ របស់បក្ស​ប្រឆាំង​នោះទេ ដោយលោកបានបញ្ជាក់ទៀតថា ប្រសិនបើពេលនោះ លោកយល់ព្រមឲ្យអំណាចមែននោះ ម្លេះតំណាងរាស្រ្ត​បក្សប្រឆាំង ចូលរួមប្រជុំសភាលើកដំបូងបាត់ទៅហើយ។

ជុំវិញបញ្ហាចែករំលែកអំណាចគ្នានេះ លោក សុខ ទូច បណ្ឌិតផ្នែកវិទ្យាសាស្រ្តនយោបាយ ធ្លាប់បានបរិហាខ្លាំងៗក្នុង​ពេលកន្លងមកថា ប្រសិនបើអ្នកនយោបាយខ្មែរ ចូលចិត្តតែចែកអំណាចគ្នាបែបនេះ នោះពលរដ្ឋនៅតែទឹកភ្នែកដដែល។ ចំណែកឯខាងសកម្មជនអ្នកគាំទ្របក្សសង្គ្រោះជាតិវិញ ក៏បានបង្ហាញជំហរមិនពេញចិត្តដែរ ប្រសិនណាជាមេដឹកនាំ​បក្ស​សង្គ្រោះជាតិ «តថ្លៃ»ជាមួយនឹងលោក ហ៊ុន សែន ជាថ្នូនឹងការចង់បានអំណាចណាមួយ។

នេះមិនមែនជាលើកទីមួយទេ ដែលលោក ហ៊ុន សែន បានលើកយកពាក្យសម្ដីរបស់គូរបដិបក្ខ មកវាយប្រហារបក​ត្រឡប់​វិញ ក្នុងនោះមានការជួបចរចារសម្ងាត់រវាងមន្ត្រីជាន់ខ្ពស់កម្ពុជា និងថៃ ក្នុងអំឡុងពេលមានជម្លោះព្រំដែន​រវាងប្រទេស​ទាំងពីរ និងការលើកយកសម្លេងឆ្លើយឆ្លងតាមទូរស័ព្ទរវាងលោក និងលោកកឹម សុខា ក្នុងពេលកន្លងមកនោះជាដើម។ ប្រសិនបើមានការចរចារលើកក្រោយទៀតនោះ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានបន្ថែមថា  លោកសូមស្នើឲ្យការជួបចរចារ​រវាង​មេដឹកនាំបក្សសង្គ្រោះជាតិ និងមេដឹកនាំបក្សកាន់អំណាច ថាត្រូវតែធ្វើឡើង​«ជាសាធារណៈ»ជូនដល់ពលរដ្ឋឲ្យបានជ្រាប ដើម្បី​ជៀសវាងមានការបកស្រាយច្រើនខុសគ្នាបែបនេះ៕

---------------------------------------------------------
ដោយៈ ជា ធីរិទ្ធ - ថ្ងៃទី២៤ កញ្ញា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ