មាន​ការ​បង្គាប់​បញ្ជា​ឲ្យ​គ.ជ.ប ផ្លាស់ប្ដូរ​លទ្ធផល​ឆ្នោត​២០១៣?

នៅយប់ថ្ងៃទី២៨ខែកក្កដា ដែលជាថ្ងៃបោះឆ្នោត «មានការបង្គាប់បញ្ជាឲ្យគ.ជ.ប ផ្លាស់ប្ដូរតួលេខនិងលទ្ធផល ដើម្បី​យក​ជ័យជំនះទៅឲ្យគណបក្សប្រជាជន?» ទោះពិតឬមិនពិត នេះជាការថ្លែងជាសាធារណៈរបស់លោក កឹម សុខា អនុប្រធាន​គណបក្សសង្រ្គោះជាតិ នៅចំពោះមុខអ្នកគាំទ្ររាប់ពាន់នាក់ នាល្ងាចថ្ងៃទី៦ ខែសីហា នៅទីលានប្រជាធិបតេយ្យ។
Loading...
  • ដោយ: អ៊ុំ បូរី
  • កែប្រែចុងក្រោយ: August 07, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

នៅយប់ថ្ងៃទី២៨ខែកក្កដា ដែលជាថ្ងៃបោះឆ្នោត «មានការបង្គាប់បញ្ជាឲ្យគ.ជ.ប ផ្លាស់ប្ដូរតួលេខនិងលទ្ធផល ដើម្បី​យក​ជ័យជំនះទៅឲ្យគណបក្សប្រជាជន?» ទោះពិតឬមិនពិត នេះជាការថ្លែងជាសាធារណៈរបស់លោក កឹម សុខា អនុប្រធាន​គណបក្សសង្រ្គោះជាតិ នៅចំពោះមុខអ្នកគាំទ្ររាប់ពាន់នាក់ នាល្ងាចថ្ងៃទី៦ ខែសីហា នៅទីលានប្រជាធិបតេយ្យ។


លោកកឹម សុខា (ឆ្វេង) ចាប់ដៃលោក សម រង្ស៊ី នៅចំពោះមុខអ្នកគាំទ្ររាប់ពាន់នាក់ថ្ងៃទី០៦ខែសីហា នៅទីលាន​ប្រជាធិបតេយ្យ។ (រូបថត គណបក្ស)

អនុប្រធានគណបក្សប្រឆាំង លោក កឹម សុខា បានថ្លែងទៅកាន់អ្នកគាំទ្រថា៖ «គិតត្រឹមល្ងាចថ្ងៃទី២៨ ខែកក្កដា ឆ្នាំ២០១៣ គណបក្សសង្រ្គោះជាតិ ទទួលបានជ័យជំនះ៧០ភាគរយ»។ លោកបន្តអះអាងយ៉ាងប្រាកដប្រជាថា នៅយប់ថ្ងៃទី២៨​ខែ​កក្កដា នៅក្រោយបន្តិច ពីការបោះឆ្នោតបានបញ្ចប់ មានគេបញ្ជាមនុស្សម្នាក់ ឲ្យបញ្ចេញព័ត៌មានមិនពិតថា គណបក្សគេ​(គណបក្សប្រជាជនកម្ពុជា) ឈ្នះ ហើយថែមទាំងប្រាប់គណៈកម្មាធិការជាតិ រៀបចំការបោះឆ្នោត គ.ជ.ប ឲ្យបញ្ឍប់ការ​ប្រកាសលទ្ធផលពិត ដែល​បង្ហាញ​ថាគណបក្សសង្រ្គោះជាតិជាអ្នកទទួលបានជ័យជំនះ។

សូមរំឮកថា នៅល្ងាចថ្ងៃទី២៨ ខែកក្កដា ឆ្នាំ២០១៣ ពោលគឺថ្ងៃបោះឆ្នោត លោក ខៀវ កាញ៉ារិទ្ធ រដ្ឋមន្រ្តីក្រសួងព័ត៌មាន និងជាមន្ត្រីជាន់ខ្ពស់របស់គណបក្សប្រជាជនកម្ពុជា បានអះអាងថា គណបក្សរបស់លោក ជាអ្នកទទួលបានជ័យជំនះ ក្នុង​ការបោះឆ្នោតនីតិកាលទី៥ ដោយទទួលបាន៦៨អាសនៈ រីឯគណបក្សសង្រ្គោះជាតិទទួលបាន៥៥អាសនៈ ក្នុង​ចំណោម​១២៣អាសនៈ។ ការអះអាងរបស់លោក បានធ្លាក់មកមុនការប្រកាស នូវលទ្ធផលបឋមរបស់គណៈកម្មាធិការជាតិ​រៀបចំ​ការបោះឆ្នោត។

មានការលើកឡើងតៗគ្នា ថានៅល្ងាចថ្ងៃទី២៨ខែកក្កដានោះ មានទាហានមួយក្រុមត្រូវបានចល័តទៅកាន់ ទីស្នាក់ការ​កណ្ដាលរបស់គ.ជ.ប។ មន្ត្រីម្នាក់ស្និតនឹង គ.ជ.ប បានខ្សឹបអះអាងពីព័ត៌មាននេះប្រាប់មនោរម្យព័ងអាំងហ្វូ តែគេមិនដឹង​ថា​វត្តមានរបស់ក្រុមទាហានទាំងនោះ មានគោលបំណងដើម្បីការពារសុវត្ថិភាពឲ្យគ.ជ.ប ឬដាក់ឈរជើងដើម្បី«ធ្វើគម្នាប»​ទៅលើស្ថាប័ននេះនោះទេ។ ព័ត៌មាននេះ មនោរម្យព័ងអាំងហ្វូ មិនអាចស្វែងរកការបញ្ជាក់ការពិត បានលើសពីនេះ​បាន​នៅឡើយ។

មួយវិញទៀត ការយឺតយ៉ាវក្នុងការប្រកាសលទ្ធផលបថម តាមពេលវេលាដែលបានគ្រោងទុក នាយប់ថ្ងៃទី២៨ខែ​កក្កដា​នោះ គ៏ជាហេតុផលមួយ ដែលមតិមហាជនមួយចំនួន បានធ្វើការចោទប្រកាន់ ពីភាពមិនសុច្ចរិតរបស់ស្ថាប័នអ្នករៀបចំ​ការបោះឆ្នោតនេះដែរ។

ចំពោះការអះអាងរបស់លោក កឹម សុខា អគ្គលេខាធិការគ.ជ.ប លោក ទេព នីថា តាមរយៈកិច្ចសម្ភាសតាមទូរស័ព្ទជា​មួយទស្សនាវដ្តីមនោរម្យព័ងអាំងហ្វូ បានចាត់ទុកថា «ការលើកឡើងនេះ គឺគ្រាន់តែជាការថ្លែង របស់អ្នកនយោបាយ​តែ​ប៉ុណ្ណោះ ហើយអ្វីដែលគាត់លើកឡើង វាជាសិទ្ធិសេរីភាពក្នុងការយល់ឃើញរបស់គាត់»។ លោកបន្តថា គ.ជ.ប ធ្វើ​កិច្ចការតាំងពីមូលដ្ឋានដល់ខេត្ត រហូតដល់ថ្នាក់ជាតិ មានការចូលរួមពីគណបក្សនយោបាយ អង្គការសង្គមស៊ីវិល និង​មានការកែតម្រូវ ជាបន្តបន្ទាប់ស្របតាមនីតិវិធី។

ដោយឡែក លោក យឹម សុវណ្ណ អ្នកនាំពាក្យគណបក្សសង្រ្គោះជាតិ បានបដិសេធមិនធ្វើអត្ថាធិប្បាយបំភ្លឺបន្ថែមទៅលើអ្វី ដែលលោក កឹម សុខា បានអះអាងនោះទេ។

រហូតមកដល់ពេលនេះ គណបក្សប្រជាជនកម្ពុជា និងគណបក្សសង្រ្គោះជាតិ ធ្លាប់បានប្រកាសតែរៀងៗខ្លួនថា គណបក្ស​របស់ពួកគេជាអ្នកទទួលបានជ័យជំនះ ខណៈដែល គ.ជ.ប មិនទាន់បានប្រកាសពីលទ្ធផលផ្លូវការនៅឡើយ។

បន្ទាប់ពីថ្ងៃបោះឆ្នោតរហូតមកដល់ពេលនេះ គេសង្កេតឃើញថាមានបណ្តាប្រទេស និងមេដឹកនាំមួយចំនួន​ពីជុំវិញ​ពិភពលោក បានសម្តែងការអបអរសារទរ នូវការទទួលបានជ័យជំនះរបស់គណបក្សប្រជាជនកម្ពុជា ហើយបានកោត​សរសើរ​អំពីដំណើរការបោះឆ្នោតនៅកម្ពុជាថា ប្រពឹត្តទៅដោយសេរី និងយុត្តិធម៌អាចទទួលយកបាន។ ផ្ទុយទៅវិញ អង្គការសហប្រជាជាតិ សហរដ្ឋអាមេរិច និងសហគមន៍អ៊ឺរ៉ុប ដែលមានសមាជិក២៧ប្រទេស អង្គការជាតិ​និងអន្តរជាតិ​មួយចំនួន បានស្នើឲ្យមានការស៊ើប​អង្កេតដោយឯករាជ្យពីភាពមិនប្រក្រតី ក្នុងដំណើរការបោះឆ្នោតដ៏ប្រទាំងប្រទើសនេះ ដែលធ្វើឲ្យមានមន្ទិល​ដល់លទ្ធផលនៃការបោះឆ្នោតនេះ។

លោក គល់ បញ្ញា នាយកប្រតិបត្តិអង្គការ ខមហ្រ្វែល បានពន្យល់ថា ការប្រទាំងប្រទើសគ្នានេះ បណ្ដាលមកពី គ.ជ.ប មានតួលេខ និងមូលដ្ឋានផ្សេង គណបក្សនយោបាយមានផ្សេង ដូចនេះពួកគេត្រូវធ្វើការជាមួយគ្នា ផ្ទៀងផ្ទាត់ជាមួយគ្នា ដើម្បីជម្រះបញ្ហាមន្ទិលសង្ស័យ។

ទាក់ទងនឹងគណៈកម្មការចម្រុះឯករាជ្យទាមទារដោយគណបក្សប្រឆាំង លោកបានបន្តថា លក្ខខណ្ឌក្នុងការបង្កើត​គណកម្មការនេះ មានការចុះសម្រុងច្រើនហើយ តែខុសគ្នាត្រង់ថាគណបក្សកាន់អំណាច និង គ.ជ.ប អនុញ្ញាតឲ្យភាគី​អង្គការសហប្រជាជាតិមានសិទ្ធិត្រឹមអ្នកសង្កេតការណ៍ តែគណបក្សប្រឆាំងចង់ឲ្យមានតួនាទីខ្ពស់ជាងនេះ ឬយ៉ាង​ហោច​ណាស់ជាអាជ្ញាកណ្តាល៕

-------------------------------------------------------
ដោយៈ អ៊ុំ បូរី - ភ្នំពេញថ្ងៃទី៧ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...