ក្នុងសន្និសីទសារព័ត៌មាន រួមគ្នាមួយ នៃមន្រ្តីតំណាងគណបក្សទាំងពីរ នាវិមានរដ្ឋសភា កាលពីយប់ថ្ងៃទី០៦ ខែមេសា ឆ្នាំ​២០១៥​នេះ បាន បង្ហាញ ថា ការជួបពិភាក្សា ក្នុងការសម្រេចសមាសភាពថ្មី នៃសមាជិក គ.ជ.ប នៅមិនទាន់បាន​សម្រេច ជាផ្លូវការនៅឡើយ។ ករណីនេះ តំណាងគណបក្សទាំងពីរ និងបន្តជួបពិភាក្សាគ្នាជាបន្ត នាថ្ងៃទី៨ ខេមេសា បន្ទាប់​មក​ដាក់ជូន ក្នុងសភាពេញអង្គ ដើម្បីបោះឆ្នោតគាំទ្រ និងផ្តល់សេចក្តីទុកចិត្ត ទោះលើសមាសភាព ទាំង៩ របស់ គ.ជ.ប ដែល​ទើប​ជ្រើស​រើស និងតែងតាំងថ្មីនោះ។

ចេញពីការជួបពិភាក្សានោះ គេគ្រាន់តែបានដឹងថា «វប្បធម៌សន្ទនា»ត្រូវបានបង្ហាញ និងគាំទ្រជាបន្ត រវាងតំណាង​គណបក្សទាំងពីរ ហើយនិងធ្វើការជួបគ្នាជា«ថ្មី» នាព្រលប់ថ្ងៃទី៨ ក្នុងកិច្ចប្រជុំបិទទ្វាជាសម្ងាត់។ តំណាង​គណបក្ស​ទាំង​ពីរ បានលើកឡើងប្រហែលគ្នាថា យូរបំផុតក្នុងថ្ងៃទី៨ នោះ គណបក្សទាំងពីរ និងពីនិត្យលើសមាសភាពថ្មី នៃបេក្ខជន ដែល​ត្រូវ​ចូលខ្លួន មកធ្វើជាសមាជិក ទាំង៩ របស់ គ.ជ.ប នោះ។ តំណាងគណបក្សទាំងពីរ បានឯកភាពគ្នាទៀតថា បន្ទាប់​ពីសម្រេចលើបេក្ខភាពនៃបេក្ខជន ដែលជាសមាជិកទាំង៩ ចប់សព្វគ្រប់ហើយ នឹងបញ្ជូនឈ្មោះ សមាជិក គ.ជ.ប ថ្មីនោះ ទៅ​កាន់​គណៈ​កម្មាធិការអចិន្ត្រៃយ៍រដ្ឋសភា ដើម្បីផ្តល់សេចក្តីទុកចិត្ត ក្នុងថ្ងៃទី១៣ ខែមេសា។

រីឯបេក្ខភាពប្រធាន និងអនុប្រធាន នៃ គ.ជ.ប ថ្មី នោះ និងប្រកាសជាផ្លូវការ នាថ្ងៃទី១២ខែមេសា ក្នុងកិច្ចប្រជុំសភា​ពេញអង្គ អនុម័តផ្តល់សេចក្តីទុកចិត្ត នាពេលខាងមុខ។

សូមរំលឹកថា ក្នុងជំនួបប្រជុំសំងាត់ នៃប្រធានក្រុមតំណាងរាស្រ្តមតិភាគច្រើន និងប្រធានក្រុមតំណាងរាស្រ្តមតិភាគតិច កាលពីម្សិលម៉ិញនេះ មានសមាសភាព ៦នាក់ ដែលក្នុងម្ខាងៗមាន៣រូប៖ ខាងណណបក្សប្រជាជនកម្ពុជាមាន លោក ស ខេង, លោក គាត ឈន់ និងអ្នកស្រី ម៉ែន សំអន។ ឯខាងគណបក្សសង្គ្រោះជាតិមាន លោកសម រង្ស៊ី, លោក កឹម សុខា និងលោក យឹម សុវណ្ណ៕