លោក ហ៊ុន សែន នាយករដ្ឋមន្រ្តីបីទសវត្សន៍ របស់កម្ពុជា តែងបង្ហាញកណ្តាប់ដៃដែក របស់ខ្លួន ទៅលើស្ថាប័នតុលាការ នៅស្ទើរគ្រប់រឿងទាំងអស់ ជាពិសេសរឿង ដែលលោកគិតថា ជាការប្រឆាំង ឬមិនស្របតាមគំនិត និងការសម្រេច​របស់​លោកជាដើម។ មិនថាតែរឿង ដែលទាក់ទងនឹងសកម្មជនដីធ្លី សកម្មជនបក្សប្រឆាំង រឿងទាក់ទងនឹងឃាតករសម្លាប់ លោក អ៊ឹង ម៉េងជឺ ឬរឿងលោក កឹម សុខា នោះទេ បើទោះជាសំនុំរឿង បទល្មើសចរាចរណ៍ ដូចករណីស្រ្តីវ័យក្មេង ផឹក​ស្រវឹង បុករបងភូមិគ្រឹះ របស់លោក នៅជិតវិមានឯករាជ្យ ក៏តែងតែមានការលើកឡើង ឬបញ្ជាដោយផ្ទាល់ ពីនាយក​រដ្ឋ​មន្រ្តី​ដ៏​មហិមា ទៅកាន់តុលាការដែរ។

ជាក់ស្តែងកាលពីថ្ងៃទី ៦ ខែមេសា នេះ លោក ហ៊ុន សែន បានប្រកាសជាសាធារណៈទៀតថា ការដោះលែងស្រ្តី វ័យ​២៦ឆ្នាំ ដែលមានជាតិស្រវឹងក្នុងខ្លួន ហើយបើកបរ (ឡាន) បុករបងភូមិគ្រឹះរបស់លោក ដោយតុលាការ ជាគំនិតផ្ទាល់​របស់លោក។ លោកបានអះអាងថា ការដែលលោកស្នើទៅតុលាការ ឲ្យនៅក្រៅឃុំបែបនេះ ដើម្បីតែគេចឲ្យឆ្ងាយ ពី​ពាក្យ​ចចាមរាមថា លោកអាងអំណាច ហើយសម្រេចទោស ដាក់គុកលើស្រ្តីវ័យក្មេងម្នាក់នេះ ព្រោះតែរឿងតូចតាច។

ថ្លែងក្នុងពិធីសម្ពោធ ដាក់ឲ្យប្រើប្រាស់ ស្ពានអ្នកលឿងក្នុងថ្ងៃទី៦ ខែមេសានេះ លោកនាយករដ្ឋមន្រ្តីបានបញ្ជាក់ថា លោក​ផ្ទាល់ជាអ្នកហៅទូរស័ព្ទ ទៅកាន់ប្រធានសាលាដំបូងរាជធានីភ្នំពេញ ដើម្បីឲ្យមានការដោះលែង ស្រ្តីវ័យក្មេងនោះ ឲ្យបាននៅក្រៅឃុំ។ លោកបានលើកពីការសន្ទនានោះ មកបញ្ជាក់យ៉ាងដូច្នេះថា៖ «គាត់ខុសហ្នឹង (វា)ខុសហើយ ប៉ុន្តែ​អាចធ្វើទៅបានទេ ទៅតាមនីវិធីតុលាការទៅចុះ។ ក៏ប៉ុន្តែអនុញ្ញាតឲ្យ គាត់នៅក្រៅឃុំទៅ។ បានទេ? គាត់ថាបាន។ (…) អាហ្នឹង ក៏ជានីតិវិធីរបស់តុលាការ ឲ្យនៅក្រៅឃុំ ក្រោមការត្រួតពិនិត្យ របស់តុលាការដែរ។ (…) បើសិនជារឿងហ្នឹង វា​ជា​រឿងផ្ទាល់របស់ខ្ញុំ មិនទាក់ទងទៅលើច្បាប់យើង ក៏មានការយោគយល់។ ព្រោះកុំឲ្យគេថា អាងខ្លួនជានាយករដ្ឋមន្ត្រី យក​កូន​គេទៅឃុំ ទៅដាក់គុក។»

តែភាសាយោគយល់ របស់លោក ហ៊ុន សែន វាជាការអួតអាងមួយ ដែលធ្វើឲ្យគេមើលឃើញ កាន់តែច្បាស់ថា នាយក​រដ្ឋមន្រ្តី​កម្ពុជា កំពុងប្រើអំណាចរបស់ខ្លួន បញ្ជាលើតុលាការ ដែលកំពុងរងការរិះគន់ថា មិនឯករាជ្យ និងសម្បូរទៅដោយ រឿងអាស្រូវ​ពុករលួយ។ រីឯការដោះលែងស្រ្តីវ័យក្មេង របស់តុលាការវិញ ក៏បានបង្ហាញដែរថា តុលាការកម្ពុជាមួយនេះ កំពុងតែ​អនុវត្ត​មិន​ឲ្យទាស់ នូវបញ្ជា ឬការស្នើរបស់លោកនាយករដ្ឋមន្រ្តីដែរ ដែលមិនបានបង្ហាញថា តុលាការ​អនុវត្ត​តាម​ច្បាប់ ដែល​​កំពុង​​មាន​​ជាធរមាននោះឡើយ។

ប្រធានផ្នែកស៊ើបអង្កេត នៃសមាគមការពារសិទ្ធិមនុស្ស អាដហុក លោក នី ចរិយា បានថ្លែងឲ្យ​ទស្សនាវដ្តី​មនោរម្យ.អាំងហ្វូ​ដឹង​ថា «សម្តេច ហ៊ុន សែន ជានាយករដ្ឋមន្រ្តីមួយ ដែលមានឥទ្ធិពល ក្នុងការបញ្ជាតុលាការ បានតាម​អំពើ​ចិត្ត។ នេះ​ជា​ភស្តុតាង​ជាក់ស្តែង។ (...) យើងឃើញថា ឲ្យតែមានរឿង រាល់ករណីទាំងអស់ ស្រេចតែទៅលើ​សេចក្តី​សម្រេច របស់​លោក​នាយករដ្ឋមន្រ្តី ចង់ឲ្យចាប់ ចាប់ ចង់ឲ្យលែង លែង ចង់ឲ្យចង ចង។»

ជាការរំលឹកត្រួសៗ នៅក្នុងសំនុំរឿង សកម្មជនដីធ្លី ដែលកំពុងត្រូវបានឃុំខ្លួននោះ ក៏ពុំមានបទល្មើសណាមូយ ត្រូវ​បាន​តុលាការរកឃើញ ដើម្បីសម្រេចឃុំខ្លួនពួកគេឡើយ។ តែការឃុំខ្លួន ត្រូវតែមាន ព្រោះលោក ហ៊ុន សែន បានប្រកាស​រួច​ជាស្រេចថា គ្មានការដោះលែង ឬលើកលែងឲ្យសកម្មជនដីធ្លី ណាសូម្បីតែម្នាក់។ មួយករណីទៀត ដែលគេទាំងអស់គ្នា បាន​មើល​ឃើញកាន់តែច្បាស់ថា អំណាចនាយករដ្ឋមន្រ្តី កំពុងតែបញ្ជា លើអំណាចតុលាការ ដ៏ពិតប្រាកដនោះ គឺការ​បញ្ជា​​ឲ្យ​ចាប់មកវិញ នៃឪពុក និងម្តាយរបស់លោក ថោង សារ៉ាត់ ដែលតុលាការខ្លួនឯងមើលឃើញថា មានកំហុស តែ​អាច​ឲ្យ​នៅ​ក្រៅឃុំបាននោះ។ មិនត្រឹមតែចាប់ឪពុក និងម្តាយរបស់លោក ថោង សារ៉ាត់ មកដាក់គុកវិញនោះទេ តែបើ​សូម្បី​​ប្រធាន​តុលាការ និងមន្ត្រីតុលាការមួយចំនួន ក៏ត្រូវបានផ្លាស់ប្ដូរតំណែង ហើយកំពុងនៅភ័យ «ផ្អែមមាត់» នៅ​ឡើយ​ដែរ មក​​ទល់​​នឹង​ពេល​នេះ។

លោក នី ចរិយា បានបញ្ជាក់ទៀតថា៖ «ទាំងនេះ បង្ហាញឲ្យ​ឃើញ​ថា ការ​ប្រើ​អំណាច​ទៅ​យាយី ទៅលូកលាន់ ទៅដល់​អំណាច​តុលាការច្បាស់ណាស់។ (…) លោក (ហ៊ុន សែន) មិន​ត្រូវ​ខឹង​គេ ខឹង​អង្គការ​សង្គម​ស៊ីវិល ដែលថា គាត់ (នាយក​រដ្ឋមន្រ្តីកម្ពុជា) ត្រួតត្រាអំណាចតុលាការ លូកលាន់​អំណាច​តុលាការ មិនត្រូវខឹងគេទេ ព្រោះគាត់អញ្ចឹងមែន។»៕