អ្នកនាំពាក្យព្រឹទ្ធសភា លោក ម៉ម ប៊ុននាង បានថ្លែងថា ការប្រជុំរបស់ព្រឹទ្ធសភា បានសម្រេចឲ្យ​អាជ្ញាធរមាន​សមត្ងកិច្ច បន្តនីតិវិធីរបស់ខ្លួន ដោយពុំគិតពីអភ័យឯកសិទ្ធិ ក្រោមមូលហេតុ បទល្មើសជាក់ស្តែង។ លោកថា បទល្មើសជាក់ស្តែង ដែលមានចែងតាមមាត្រា១០៤ថ្មី នៃរដ្ឋធម្មនុញ្ញកម្ពុជា អាចធ្វើការចាប់ខ្លួនជាមុន ចាំ​រាយការណ៍ជាក្រោយបាន។ លោកបន្ថែមថា ដូច្នេះទាំងសមត្ថកិច្ច ទាំងតុលាការ អាចបន្តធ្វើការការរបស់ខ្លួន តាមនីតិវិថីច្បាប់ ដេលបានចែងនេះ ជាបន្តបន្ទាប់ទៀត។

» សូមស្តាប់ការបកស្រាយទាំងស្រុង របស់លោក ម៉ម ប៊ុននាង ដូចខាងក្រោម៖

លោក សម រង្ស៊ី ប្រធានគណបក្សសង្គ្រោះជាតិ បានថ្លែងនៅពន្ធនាគារព្រៃសរ កាលពីថ្ងៃទី១៧ ខែសីហា ម្សិល​ម៉ិញនេះថា ករណីខាងលើនេះ នឹងអាចធ្វើការចរចា ជាមួយលោក នាយករដ្ឋមន្រ្តី ហ៊ុន សែន បានដើម្បីឈាន​ទៅរកការដោះលែង សកម្មជននយោបាយទាំងអស់ ដែលកំពុងជាប់ឃុំ។

លោក សម រង្ស៊ី ថ្លែងថា នេះជាលើកទីបី ក្នុងការសម្រេច និងធ្វើការដោះស្រាយ ទាក់ទងនឹងករណីប្រហាក់​ប្រហែលគ្នានេះ ព្រោះកន្លងមក សុទ្ធតែអាចធ្វើការ​សោះស្រាយបាន។ លោក សម រង្ស៊ី បានបញ្ជាក់ថា៖ «លោក ហុង សុខហួរ គឺទើបតែចាប់ផ្តើម ប៉ុន្មានថ្ងៃមុននេះ។ អញ្ចឹងនៅលើកទីបី នាខែសីហា២០១៥នេះ ខ្ញុំ​ជឿ​ជាក់ថា នឹងមានដំណោះស្រាយដូចគ្នាអញ្ចឹង។ ពីព្រោះបញ្ហា វាប្រហាក់ប្រហែលនឹងគ្នា។ ដំណោះស្រាយ គឺ​ប្រហែល​ជា​មាន​ដំណោះស្រាយ ប្រហាក់ប្រហែលនឹងគ្នាអញ្ចឹងដែរ។ ខ្ញុំមានសុទិដ្ឋិនិយម ខ្ញុំមានសេចក្តី​សង្ឃឹម ខ្ញុំ​មាន​ជំនឿ​ថា បើ​យើង​ប្រកាន់សារតីហ្នឹង យើងនឹងអាចរកដំណោះស្រាយ ដូចលើកទី១ ដូចលើកទី២​អញ្ចឹង។»៕