លើសពីការបដិសេធមិនទទួលស្គាល់រដ្ឋសភា និងរដ្ឋាភិបាលឯកបក្សថ្មី ដែលបង្កើតឡើងដោយគណបក្សប្រជាជនកម្ពុជា គណបក្សសង្រ្គោះជាតិនៅថ្ងៃនេះ បានអំពាវនាវដល់សហគមន៍អន្តរជាតិ កុំឲ្យទទួលស្គាល់រដ្ឋាភិបាលរបស់លោកនាយក​រដ្ឋមន្ត្រី ហ៊ុន សែនបច្ចុប្បន្ន និងបាន​ចោទប្រកាន់រដ្ឋាភិបាលនេះ ថាបានបង្កើតឡើងដោយខុសច្បាប់និងគ្មានធម្មនុញ្ញភាព។

លោក សម រង្ស៊ី (ខាងឆ្វេង) និងលោក កឹម សុខា នៅក្នុងសន្និសិទកាសែតរបស់គណបក្សសង្គ្រោះជាតិថ្ងៃទី២៦ខែសីហា។ (រូបថត MONOROOM.info/ U. Bory)

រាជធានីភ្នំពេញ - ក្នុងពិធីធ្វើសន្និសីតការសែតនៅថ្ងៃទី ២៥ ខែកញ្ញា ឆ្នាំ២០១៣ នៅទីស្នាក់ការកណ្តាលរបស់គណបក្ស ដើម្បីបង្ហាញពីគោលជំហរជាបន្តរបស់ខ្លួន ជុំវិញស្ថានការណ៍នយោបាយបច្ចុប្បន្ន លោក សម រង្ស៊ី ប្រធានគណបក្ស​សង្រ្គោះជាតិ បានធ្វើការអំពាវនាវដល់សហគមន៍អន្តរជាតិ ប្រទេសជាហត្ថលេខីក្នុងកិច្ចព្រមព្រៀទីក្រុងប៉ារីស ជាពិសេស​ក្រុមហ៊ុនបរទេសលំដាប់អន្តរជាតិ កុំទទួលស្គាល់ កុំផ្តល់ប្រយោជន៍ និងធ្វើកិច្ចសហការណាមួយ ជាមួយរដ្ឋាភិបាល​ដែល​ទើបត្រូវបានបង្កើតថ្មីនេះ។ ប្រធានគណបក្សប្រឆាំងរូបនេះបញ្ជាក់ថា៖ «រដ្ឋាភិបាលនេះពុំមានភាពស្របច្បាប់នោះទេ ហើយរដ្ឋាភិបាលដែលបាត់បង់​ភាពស្របច្បាប់នេះ (នឹង)មិនអាចដំណើរការបានយូរទេ»។

លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជាមិនបានផ្តល់ការអត្ថាធិប្បាយ ចំពោះការអំពាវនាវរបស់ លោក សម រង្ស៊ី នោះទេ ដោយលោកជាប់ចូលរួមកិច្ចប្រជុំគណរដ្ឋមន្រ្តី។

អនុប្រធានគណបក្សសង្រ្គោះជាតិ លោក កឹម សុខា នៅក្នុងពិធីសន្និសីតការសែតដដែល បានចោទប្រកាន់ការប្រជុំរដ្ឋសភា និងការបង្កើតរដ្ឋាភិបាលថ្មីនេះមានកំហុសឆ្គង៣ធំៗ៖ «ទី១ រំលោភគោលការឯកភាពជាតិ ទី២ រំលោភគោលការណ៍​រដ្ឋធម្មនុញ្ញ ទី៣ រំលោភគោលការណ៍សេរីពហុបក្ស»។ លោក កឹម សុខា អះអាងថា កាលដែលរដ្ឋាភិបាលបានបង្កើតឡើង តាមរយៈការបោះឆ្នោតជាកញ្ចប់ក្នុងពេលថ្មីៗនេះ គឺជាការំលោភលើច្បាប់រដ្ឋធម្មនុញ្ញ។

អ្នកវិភាគស្ថានការណ៍នយោបាយឯករាជ្យលោកបណ្ឌិត សុខ ទូច បានពន្យល់ថា ការដែលគណបក្សសង្រ្គោះជាតិ​រុញ​ច្រានបរទេសមិនឲ្យទទួលស្គាល់រដ្ឋាភិបាល វាជាសិទ្ធិនយោបាយរបស់គេ ប៉ុន្តែអ្នកនយោបាយ​គួរតែស្វែងរកដំណោះ​ស្រាយ ដើម្បីជៀសវៀងការជម្រុញឲ្យភាគីបរទេសកាត់ជំនួយ ឬមិនផ្តល់ផលប្រយោជន៍ដល់កម្ពុជា។ អ្នកវិភាគឯករាជ្យ​រូបនេះបញ្ជាក់ថា៖ «ការដែលបរទេសមិនផ្តល់ជំនួយមិនមែនងាប់អ្នកនយោបាយទេ គឺងាប់ប្រជាជន ដូចករណីប្រទេស​ភូមាជាដើម»។

លោក សុខ ទូច លើកឡើងថាយើងគួរសិក្សាពីប្រវត្តិសាស្រ្ត ព្រោះគ្នានបរទេសណាស្រលាញ់ខ្មែរជាងខ្មែរនោះទេ វាល្មម​គ្រប់គ្រាន់ហើយសម្រាប់អ្នកនយោបាយខ្មែរ ដែលគិតតែពីផលប្រយោជន៍គ្រួសារខ្លួន បក្សពួកខ្លួន ហើយពេលមានបញ្ហា​រត់ទៅពឹងប្រទេស។ លោក សុខ ទូច បានជម្រុញអ្នកនយោបាយមកពីគណបក្សទាំងពីរ បន្តដោះស្រាយបញ្ហារវាងខ្មែរ​និង​ខ្មែរដោយសន្តិវិធី។ អ្នកវិភាគរូបនេះសង្កត់ធ្ងន់ថា៖«ពួកគេជាអ្នកចង ដូច្នេះពួកគេតូ្រវតែជាអ្នកស្រាយ»។

លោក ហ៊ុន សែន អនុប្រធានគណបក្សប្រជាជនកម្ពុជា និងជានាយករដ្ឋមន្រ្តីទើបតែងតាំង ក្នុងបរិវេណមន្ទីររដ្ឋសភា ថ្ងៃទី​២៤ ខែកញ្ញា ឆ្នាំ២០១៣ នៅតែបង្ហាញឆន្ទះចង់ចរចាជាមួយគណបក្សសង្រ្គោះជាតិ តែលោកបានភ្ជាប់លក្ខខ័ណ្ឌ ដោយ​ជម្រុញឲ្យ​បេក្ខជនអ្នកតំណាងរាស្រ្តរបស់គណបក្សសង្រ្គោះជាតិ ចូលស្បថក្នុងព្រះបរមរាជវាំងជាមុនសិន។

គួរម្លឹកថា គណបក្សសង្រ្គោះជាតិនៅតែប្រកាន់ជំហរ បង្កើតគណកម្មការស៊ើបអង្កេត ពីភាពមិនប្រក្រតីក្នុងកំឡុង​ពេល​បោះ​ឆ្នោតជាមុនសិន មុននឹងឈានទៅដល់ការចរចាបែងចែកអំណាចណាមួយ។

ដោយឡែក សេដ្ឋវិទូឯករាជ្យមួយរូប លោកបណ្ឌិត កង ចាន់ដារារ័ត្ន បានពន្យល់ថាការអំពាវនាវរបស់លោក សម រង្ស៊ី មិនមានប្រសិទ្ធិភាពប៉ះពាល់ខ្លាំងដល់អ្នកវិនិយោគទុនអន្តរជាតិនោះទេ ព្រោះអ្នកវិយោគទុន គេមិនមានកង្វល់ច្រើនពី​រដ្ឋាភិបាលនោះទេ អ្វីដែលពួកគេបារម្ភ គឺប្រព័ន្ធធានាដល់ដំណើរការវិនិយោគរបស់គេ ដូចជាច្បាប់កិច្ចសន្យា ការប្រកួត​ប្រជែងដោយស្មើរភាពជាដើម។ អ្នកវិភាគជំនាញសេដ្ឋកិច្ចរូបនេះសង្ឃឹម ថារដ្ឋាភិបាលថ្មីនឹងបង្ក​លក្ខណៈងាយស្រួល​ដល់​អ្នកវិនិយោគ ជាពិសេសគឺការអភិវឌ្ឍន៍ប្រទេសឆ្ពោះទៅរកនីតិរដ្ឋ៕

-----------------------------------------------------
ដោយៈ អ៊ុំ បូរី - ថ្ងៃទី២៥ ខែកញ្ញា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ