អធិបតេយ្យជាតិ - «វៀតណាមជួយយើងពិត យើងដឹងគុណ ទូលលើក្បាល។ ប៉ុន្តែមិនអាចដឹងគុណ​ឲ្យដីទៅគេប៉ិន​គ្រាប់ខ្សាច់ ឬមួយមីលីម៉ែតបានទេ អាហ្នឹងខ្ញុំសូមជម្រាប។ អាហ្នឹង ខ្ញុំសូមជម្រាបថាលោក សម រង្ស៊ី កុហកទាំង​ស្រុង»។ នេះជាការបញ្ជាក់របស់លោក ជាម យៀប មន្រ្តីជាន់ខ្ពស់របស់គណបក្សប្រជាជនកម្ពុជា ដល់ទស្សនាវដ្តី​មនោរម្យ.អាំងហ្វូ នៅថ្ងៃទី០៥ ខែ ឧសភា ឆ្នាំ២០១៤។

នៅថ្ងៃទី០៥ ខែ ឧសភា ឆ្នាំ២០១៤ ជាថ្ងៃដែលលោកសម រង្ស៊ី ប្រធានគណបក្សសង្រ្គោះជាតិ បានអះអាងនៅចំពោះ​មុខអ្នកគាំទ្ររបស់គណបក្សសង្រ្គោះជាតិ នៅខេត្តក្រចេះ ថា៖ «បើឲ្យមេដឹកនាំបច្ចុប្បន្នធ្វើដូចសព្វថ្ងៃ បួនដប់ឆ្នាំទៀត​ប្រទេសនឹងរលាយ។ ព្រំដែនកម្ពុជា នៅស្រុកស្នួល យួនចូលដប់គីឡូ បងប្អូន គេមកបោះបង្គោលព្រំដែនលើដីខ្មែរ យក​ដែនសមុទ្រ និងកោះខ្មែរ។ (...) ខ្ញុំអត់ព្រមទេ។»

ប្រធានគណបក្សជំទាស់រូបនេះបន្ថែមថា អ្នកគ្រប់គ្រងប្រទេសបច្ចុបន្នបានបង្ខិតព្រំដែនថយក្រោយ ខណៈប្រទេស​វៀតណាមបានបង្ខិតចូលមកកាន់តែជ្រៅ ដែលធ្វើឲ្យផ្ទៃដីប្រទេសកម្ពុជា កាន់តែរួមតូច។ លោកសម រង្ស៊ី បញ្ជាក់ថា៖ «មេដឹកនាំយើងជំពាក់គុណយួន អត់ហ៊ានតតាំងជាមួយយួន។ ញ្ចឹងមានតែគណបក្សសង្រ្គោះជាតិ ដែលអត់ជំពាក់​គុណយួន ហើយហ៊ានតតាំងជាមួយយួនការពារទឹកដី។»

តែការបរិហាររបស់លោកសម រង្ស៊ី ត្រូវបានលោក ជាម យៀប រិះគន់ថាលោកសម រង្ស៊ី និងបក្ខពួកមិនបានដឹង ពី​បញ្ហាព្រំដែនឲ្យបានពិតប្រាកដនោះទេ ហើយចេះតែបកស្រាយដើម្បីកេងចំណេញនយោបាយ។ លោក ជាម យៀប ក៏បានអះអាងដែរថា ក្រុមមេដឹកនាំរបស់គណបក្សប្រជាជនកម្ពុជា និងរដ្ឋាភិបាលបច្ចុប្បន្ន មានអ្នកមានសមត្ថភាព​គ្រប់គ្រាន់ ទាំងផ្នែកបច្ចេកទេស និងផ្លូវច្បាប់ ហើយក៏ជាកូនខ្មែរស្នេហាជាតិ ដូច្នេះមិនឲ្យបាត់បង់ទឹកដីរបស់​ប្រទេស​កម្ពុជា នោះទេ។

លោកសុខ ទូច បណ្ឌិតផ្នែកវិទ្យាសាស្រ្តនយោបាយ និងជាអ្នកវិភាគនយោបាយឯករាជ្យកម្ពុជា កន្លងមកបាន​លើក​ឡើងថា គេមិនត្រូវបកស្រាយថាវៀតណាមមានគុណលើកម្ពុជា ហើយបំភ្លេចថាកម្ពុជាក៏មានគុណលើវៀតណាម ក្នុងសម័យសង្រ្គាមដូចគ្នាផងដែរ។ លោកសុខ ទូច ក៏បានអះអាងដែរថា កម្ពុជាមានប្រៀបមូលដ្ឋានផ្លូវច្បាប់ និងកត្តា​ផ្សេងៗទៀត ជាច្រើន ដើម្បីប្តឹងទៅតុលាការយុតិ្តធម៌អន្តរជាតិ ទាមទារកោះត្រល់ពីប្រទេសវៀតណាមមកវិញ៕