ការប្រជុំរដ្ឋសភាលើកដំបូងថ្ងៃទី២៣ ខែកញ្ញា ការបោះឆ្នោតតែងតាំងរដ្ឋាភិបាលតាមវិធីបោះឆ្នោតដោយ«កញ្ចប់» ជាការ​រំលោភលើរដ្ឋធម្មនុញ្ញយ៉ាងធ្ងន់ធ្ងរ។ រាល់ការរៀបចំ«ក្បាលម៉ាស៊ីន» ទាំងរដ្ឋសភា ទាំងរដ្ឋាភិបាល ជាការវិលត្រឡប់ទៅរក​របបកុម្មុយនីស ដែលប្រើប្រាស់នូវប្រព័ន្ធ«បក្សតែមួយ» ដែលផ្ទុយពីកិច្ចព្រមព្រៀងទីក្រុងប៉ារីស១៩៩១ ដោយបាន​កំណត់​ថាកម្ពុជាប្រកាន់នូវរបប«ប្រជាធិបតេយ្យសេរីពហុបក្ស»។ ជាសភា និងជារដ្ឋាភិបាលមិនតំណាងឲ្យ​ឆន្ទៈប្រជាពលរដ្ឋ​នោះ​ឡើយ ពិសេសនេះជាការធ្វើ«រដ្ឋប្រហារ»រដ្ឋធម្មនុញ្ញ។ នេះជាការលើកឡើងរបស់លោក សម រង្ស៊ី មេដឹកនាំប្រឆាំងនៅ​កម្ពុជា។

លោក សម រង្ស៊ី និងលោក កឹម សុខា នៅទីលានប្រជាធិបតេយ្យ ថ្ងៃទី២៦ខែសីហា។ (រូបថត MONOROOM.info/ O. Vary)

រាជធានីភ្នំពេញ - លោក សម រង្ស៊ី ប្រធានគណបក្សសង្រ្គោះជាតិក្នុងសន្និសីទកាសែតកាលពី ព្រឹកថ្ងៃទី ២៥ ខែកញ្ញានេះ បានបង្ហាញពី«ជំហរ»របស់ខ្លួនជុំវិញស្ថានការណ៍នយោបាយនាពេលបច្ចុប្បន្ន។ លោកថា«គោលជំហររបស់យើង មិន​ត្រឹម​តែមិនទទួលស្គាល់នោះទេ យើងសូមថ្កោលទោសទៅលើរដ្ឋាភិបាល និងរដ្ឋសភាថ្មីនេះ ដោយស្នើសុំទៅសហគមន៍ជាតិ អន្តរជាតិ និងក្រុមហ៊ុននានាកុំឲ្យមានការឲ្យតម្លៃ និងផ្តល់ប្រយោជន៍ ឬចរចាចុះហត្ថលេខា​ជាមួយរដ្ឋាភិបាល«ខុស»​ច្បាប់​មួយនេះ។

ប្រធានគណបក្សសង្រ្គោះជាតិរូបនេះបន្តរថា«យើងមិនអាចទទួលស្គាល់រដ្ឋាភិបាល និងសហការណ៍ជាមួយរដ្ឋាភិបាល​បែបនេះទេ។ ការប្រជុំសភាមុននេះ ជាការរំលោភរដ្ឋធម្មនុញ្ញ ឯការបង្កើតរដ្ឋាភិបាល និងរដ្ឋសភាតាមរយៈការបោះឆ្នោត​ជាកញ្ចប់ (វា)ជាការដើរ«ថយក្រោយ» ទៅរបប«ឯកបក្ស»ខុសពីខ្លឹមសារកិច្ចព្រមព្រៀងទីក្រុងប៉ារីសឆ្នាំ១៩៩១។

ប្រធានបក្សសង្គ្រោះជាតិបានបញ្ជាក់ថា គណបក្សសង្គ្រោះជាតិនៅតែទាមទារឲ្យមានការស្វែងរកការពិត នៅតែទទូច​ទាម​ទារឱ្យមានការបង្កើតគណៈកម្មាធិការឯករាជ្យ ស៊ើបអង្កេតភាពមិនប្រក្រតីជាមុនសិន។ «យើងអត់ទៅប្រជុំសភាដើម្បី​ប្រថាប់ត្រាឱ្យគេបាននោះទេ។ យើងនឹងចូលរួមប្រជុំ ដរាបមានការបឈ្ឈប់ការយកដីប្រជារាស្រ្ត ការកាប់បំផ្លាញព្រៃឈើ។ យើងចង់ឱ្យមានតុល្យភាពអំណាច នៅក្នុងប្រទេសដែលមានស្ថាប័នបី ដូចជានីតិបញ្ញត្តិដោយបក្សឈ្នះមួយ នីតិប្រតិបត្តិ​ដោយបក្សឈ្នះឆ្នោតមួយផ្សេងទៀត និងតុលាការត្រូវស្ថិតក្រោមយន្តការ នៃការត្រួតពិនិត្យដោយបក្ស​ឈ្នះឆ្នោតទាំងពីរ​ដើម្បីការគោរពច្បាប់ និងភាពយុត្តិធម៌សម្រាប់ប្រជាពលរដ្ឋ។»

ឯអនុប្រធានគណបក្សសង្រ្គោះជាតិលោក កឹម សុខាបានបន្ថែមថា «យើងគោរពឆន្ទៈម្ចាស់ឆ្នោត យើងគោរពគោលការណ៍​ប្រជាធិបតេយ្យ និងរដ្ឋធម្មនុញ្ញ ដែលជាចែងពីប្រជាធិបតេយ្យសេរីពហុបក្ស។ យើងមិនចូលដៃក្នុងការមិនគោរពរច្បាប់​រដ្ឋធម្មនុញ្ញជាមួយគេនោះទេ។» ជាមួយគ្នានេះអនុប្រធានបក្សប្រឆាំងរូបនេះ​បានបញ្ជាក់ថា «យើងមិនទាន់មាន​ការឯកភាព​គ្នា ដូច្នេះការបង្កើរដ្ឋាភិបាល និងរដ្ឋសភាជា«រដ្ឋប្រហារដ្ឋធម្មនុញ្ញ»។ លោកបន្តរថាដូច្នេះអ្វីៗដែលគណបក្សសង្គ្រោះជាតិ​បានដើរ ឬការសម្រេចចិត្តមិនចូលប្រជុំរដ្ឋសភា ជាភាពជោគជ័យមួយដ៏ខ្ពស់របស់គណបក្សសង្គ្រោះជាតិ ហើយលោកបាន​ចាត់ទុកថាជាការដើរលើផ្លូវមួយដ៏ត្រឹមត្រូវ។

សូមមើលអត្ថបទបន្ថែម ស្ដីពីទស្សនះរបស់លោក ម៉ម សូណង់ដូ ស្ដីពីការបង្កើតរដ្ឋាភិបាលដែលខុសពីឆន្ទះរាស្ត្រ ជារដ្ឋ​ប្រហារដ្ឋធម្មនុញ្ញ ដោយចុចលើទីនេះ។

ឆ្លើយតបទៅនឹងការលើកឡើងខាងលើ មន្ត្រីជាន់ខ្ពស់គណបក្សប្រជាជនកម្ពុជា និងប្រធានគណៈ​កម្មការសេដ្ឋកិច្ច ហិរញ្ញ​វត្ថុ រដ្ឋសភាទើបនឹងតែងតាំងថ្មី លោក ជាម យៀប បានបញ្ជាក់ចំពោះបញ្ហាចោទ ទាក់ទងនឹងគណបក្សប្រជាជន​កម្ពុជា​ធ្វើ​«រដ្ឋប្រហារដ្ឋធម្មនុញ្ញ» យ៉ាងដូច្នេះ​ថា ការលើកឡើង ការចោទប្រកាន់នានាជាសិទ្ធិសេរីភាពរបស់លោក សម រង្ស៊ី តែត្រូវ​ធ្វើយ៉ាងណាឲ្យស្របទៅតាមច្បាប់។ តែលោកបានបដិសេធទាំងស្រុង មិនអាចទទួលយកបានទេ ចំពោះការលើកឡើង​ទាំងនោះ ដោយលោកបានពន្យល់ថា «ឯកបក្ស»មានបក្សតែមួយ តែសម្រាប់ការបោះឆ្នោតមានប្រាំបីគណបក្ស ហើយមាន​តែពីរគណបក្សទេដែលទទួលបានសម្លេងក្នុងរដ្ឋសភា។

«ស្លឹកឈើ ជ្រុះមិនឆ្ងាយពីគល់ ...»

ជាមួយគ្នានេះប្រធានគណៈកម្មការសេដ្ឋកិច្ច ហិរញ្ញវត្ថុ ក៏បានចោទប្រកាន់ទៅលើលោកសម រង្ស៊ី និងលោក កឹម សុខា ថា​ជាអ្នកធ្វើ«រដ្ឋប្រហាររដ្ឋធម្មនុញ្ញ»ទៅវិញនោះ។ លោកថា «ស្លឹកឈើ ជ្រុះមិនឆ្ងាយពីគល់ទេ។ សម រង្ស៊ី មានគំនិតជាប្រព័ន្ធ​ប្រហារដូចលោក សម សារី ឪពុកគាត់អញ្ចឹង»។ លោកក៏បានចោទទៀតថា លោក សម រង្ស៊ី បានធ្វើការឃុំខ្លួន​តំណាង​រាស្រ្តទាំង៥៥រូបនៅសៀមរាបដោយមិនអនុញ្ញាតិឲ្យមកប្រជុំរដ្ឋសភាជាការ«ប្រមាថ»ដល់សិទ្ធិមនុស្ស។ «ខ្ញុំសូមជំរាបថា គណបក្សប្រជាជនគោរពច្បាប់មួយរយភាគរយ រដ្ឋធម្មនុញ្ញ ច្បាប់ស្តីពីការជ្រើសតាំងតំណាងរាស្រ្ត គោរពតាមព្រះរាជ​សារ​ព្រះករុណា។»

ចំពោះបញ្ហា «ឯកភាពជាតិ» លោកបានលោកឡើងថា គឺខាងគណបក្សសង្គ្រោះជាតិទេដែល«មិនឯកភាព ហើយដឹកនាំ​ទៅរកការក្បត់ជាតិ»នោះ ឯគណបក្សប្រជាជនកម្ពុជា ក្រោមការដឹកនាំរបស់ព្រះមហាក្សត្រ ជាព្រះប្រមុខរដ្ឋ។ គ.ជ.ប ក៏​បានធ្វើអ្វីៗទៅតាមសមត្ថកិច្ចរបស់ខ្លួនដែរ និងក្រុមប្រឹក្សាធម្មនុញ្ញក៏បានអនុវត្តនូវនីតិវិធីរបស់ខ្លួនចប់សព្វគ្រប់ហើយ និង​ក៨បានបិទផ្លូវតវ៉ាដែរ។

សូមមើលអត្ថបទបន្ថែម ស្ដីពីរាជានិយម​នៅ​កម្ពុជា​នឹង​មាន​បន្ត ​ដរាប​ណា​គ្មាន«រដ្ឋប្រហារ​រដ្ឋធម្មនុញ្ញ» ដោយចុចលើទី​នេះ។

ដោយឡែកនៅថ្ងៃជាមួយគ្នានៃការបដិសេធមិនទទួលស្គាល់រដ្ឋាភិបាលដោយគណបក្សសង្គ្រោះជាតិ នៅឯវិមាន​សន្តិភាព​បន្ទាប់ពីរដ្ឋសភាបោះឆ្នោតផ្តល់សេចក្តីទុកចិត្តបង្កើតរាជរដ្ឋាភិបាលកាលពីថ្ងៃទី២៤ ខែកញ្ញា ដោយមានសម្លេងគាំទ្រ​៦៨​លើ៦៨ ក្នុងការដឹកនាំសមាជិកគណៈរដ្ឋមន្ត្រីអាណត្តិទីប្រាំនៃកិច្ចប្រជុំគណរដ្ឋមន្រ្តីដំបូង ក្រោយពីបានធ្វើសម្បថក្នុង​ព្រះ​បរមរាជវាំង ក្រោមព្រះរាជធិបតី សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី២៥ កញ្ញា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ