គ្រាន់តែប្រធានក្រុមប្រឹក្សាជំនុំជម្រះតុលាការកំពួល បានប្រកាសដោះលែងលោក ប៊ន សំណាង និងលោក សុខ សំអឿន ថាមិនមានទោសពៃរិ៍ទេនោះ មជ្ឈដ្ឋានជាតិនិងអន្តរជាតិ បានសម្តែងការសាទរភ្លាមៗ ចំពោះជនជាប់ចោទទាំងពីរ ដែល​ត្រូវតុលាការដោះលែងឲ្យមាន សេរីភាពឡើងវិញ។ ក៏ប៉ុន្តែដើមបណ្តឹងរដ្ឋប្បវេណីនិងត្រូវជាប្អូនប្រុសបង្កើតលោក ជា វិជ្ជា គឺលោក ជា មុនី ហាក់មិនមានការរំភើបអ្វីនោះទេ ចំពោះការដោះលែងនេះ ដោយលោក អះអាងថា រឿងនេះវាគ្មានអ្វី​​ចម្លែក​ឡើយ។

លោក​ ប៊ន សំណាង និងលោក សុខ សំអឿន ដែលត្រូវបានបណ្ដើរពីពន្ធនាគារ មកដល់តុលាការកំពូល។ (រូបថត MONOROOM.info/ C. Thyrith)

រាជធានីភ្នំពេញ - អស់រយៈពេលជាង១០ ឆ្នាំមកហើយ ឃាតករសប្បនិមិត្តសម្លាប់លោក ជា វិជ្ជា គឺលោក ប៊ន សំណាង និងលោក សុខ សំអឿន ត្រូវបានតុលាការចាប់ឃុំខ្លួនក្នុងពន្ធនាគារ ដោយចោទ ប្រកាន់ពីបទឃាតកម្មគិតទុកជាមុន ក្នុង ករណី​សម្លាប់​លោក ជា វិជ្ជា អតីតមេដឹកនាំសហជីព សេរីកម្ពុជានៃព្រះរាជាណាចក្រកម្ពុជា កាលពីឆ្នាំ២០០៤ កន្លងទៅ។ នៅថ្ងៃនេះ តុលាការ កំពូលនៃប្រទេសកម្ពុជា បានសម្រេចបើកការជំនុំជម្រះនិងប្រកាសសាលដីកានៅក្នុងថ្ងៃដដែរ ថា លោក ប៊ន សំណាង និងលោក សុខ សំអឿន ដែលត្រូវបានតុលាការឧទ្ធរណ៍សម្រេច ចោទប្រកាន់ពីបទ​ឃាតកម្មគិត​ទុក​ជាមុន ដោយ​តម្រូវឲ្យជាប់ពន្ធនាគាររយៈពេល ២០ ឆ្នាំ និងពិន័យជាប្រាក់ជាង៤០លានរៀល កាលពីខែធ្នូឆ្នាំទៅ ថាគ្មាន​ទោសពៃរិ៍​អ្វី​នោះទេ ព្រោះការ សម្រេចរបស់ចៅក្រមតុលាការឧទ្ធរណ៍មិនផ្អែកលើគោលការច្បាប់ និងគ្មានភស្តុតាងដាក់ បន្ទុកសោះ​ឡើយ ព្រមទាំងបានសម្រេចទាត់ចោលនូវសេចក្តីសម្រេចរបស់តុលាការនេះ។

នៅក្នុងបន្ទប់សវនាការ​កាល​ពីព្រឹកមិញនេះ ភ្លាមៗបន្ទាប់ពីលោក ឃឹម ប៉ុន ប្រធានក្រុមប្រឹក្សា ជំនុំជម្រះតុលាការកំពូល បានអាននូវសេចក្តីសម្រេចចប់ រំពេចនោះ សំឡេងហោរិ៍ ក្តីរំភើប ស្រែកអរគុណតុលាការ លាយឡំជាមួយទឹកភ្នែក​មក​ជា​មួយផងនោះ បានចេញពីជាប់ចោទ ទាំងពីរ និងក្រុមគ្រូសារជាពិសេសគឺភរិយា ព្រមទាំងអ្នកចូលរួមតាមដាន​សវនាការ​ទាំងជាតិ និងអន្តរជាតិផងដែរ ដោយត្រេកអរចំពោះ លោក ប៊ន សំណាង និងលោក សុខ សំអឿន ដែលត្រូវបានតុលាការ​ដោះលែងឲ្យមានសេរីភាពឡើងវិញ។

«ជាការអសមត្ថភាព​របស់​អជ្ញាធរនិង តុលាការកម្ពុជា ...»

ជុំវិញការដោះលែងជនជាប់ចោទទាំងពីរនាក់នេះ សម្រាប់ លោក ជា មុនី ដែលត្រូវជាប្អូន ប្រុសបង្កើតរបស់លោក ជា វិជ្ជា និងជាដើមបណ្តឹងនៅក្នុងសំណុំរឿងនេះ បានសម្តែងអារម្មណ៍ខុសពីគេ ប្រាប់ទស្សនាវដ្តីមនោរម្យព័ងអាំងហ្វូនៅថ្ងៃនេះថា​លោកមិនមាន អារម្មណ៍រំភើបអ្វីទាំងអស់ ចំពោះការដោះលែងលោក ប៊ន សំណាង និងសុខ សំអឿន នៅ ពេលនេះ ។ មិន​រំភើបដោយសារថា ជនជាប់ចោទទាំងពីរនាក់នេះ លោកបានដឹងថា មិនមែន ជាឃាតករសម្លាប់បងប្រុសលោក​តាំងពីដើម​រៀងមក ដែលតាមពិតទៅតុលាការត្រូវតែដោះ លែង តាំងពីរដំបូងឡើយមកម្លេះ ពីព្រោះរឿងនេះជាការអសមត្ថភាព​របស់​អជ្ញាធរនិង តុលាការកម្ពុជា ដែលមិនបានស៊ើបអង្កេតឲ្យបានត្រឹមត្រូវតាមនីតិវិធី មុននឹងសម្រេចចាប់ជន ជាប់ចោទទាំងពីរ​ដាក់ពន្ធនាគារ។

ដើមបណ្តឹងរដ្ឋប្បវេណី និងជាភាគីតំណាងឲ្យជនរងគ្រោះរួបនេះ បានធ្វើការទទូចសាជាថ្មី ឲ្យតុលាការកម្ពុជា ពន្លឿន​ការ​ស៊ើបអង្កេត ដើម្បីវែកមុខរកឃាតករពិតប្រាកដ ដែលបានសម្លាប់ បងប្រុសបង្កើតរបស់ខ្លួនឲ្យបានឆាប់ ពីព្រោះគិត​មក​ទល់​ពេលនេះ អស់រយៈពេលជាង១០ ឆ្នាំមកហើយ ដែលតុលាការនៅតែមិនទាន់អាចរកយុត្តិធម៌ជូនលោក ជា វិជ្ជា បាន។

សូមរម្លឹកថា លោក ជា វិជ្ជា ត្រូវបានឃាតករមិនស្គាល់មុខបាញ់សម្លាប់ កាលពីថ្ងៃទី ២២ ខែ មករា ឆ្នាំ ២០០៤ ខណៈ​ពេល​ដែលលោកកំពុងតែអានការសែតនៅតូបលក់ការសែតមួយនៅ ខាងក្រោយវត្តលង្ការ រាជធានីភ្នំពេញ។ រយៈពេលជាង​មួយសប្តាហ៍ក្រោយមក ជនជាប់ចោទ ពីរនាក់គឺលោក ប៊ន សំណាង និងលោក សុខ សំអឿន ត្រូវបានចាប់ខ្លួន ដោយ​សង្ស័យថា ជាឃាតករសម្លាប់លោក ជា វិជ្ជា ។

បន្ទាប់មកនៅថ្ងៃទី ១ ខែសីហា ឆ្នាំ ២០០៥ ជនជាប់ចោទទាំងពីរ ត្រូវបាន​តុលាការដំបូងក្រុងភ្នំពេញបានសម្រេច​កាត់​ទោសឲ្យជាប់ពន្ធនាគារក្នុងម្នាក់ៗ រយៈពេល ២០ ឆ្នាំ ដោយសារការបាញ់​សម្លាប់លោក ជា វិជ្ជា។ លុះក្រោយមកទៀត តុលាការ សាលាឧទ្ធរណ៍បានសម្រេចតម្កល់សេចក្តីសម្រេច របស់តុលាការ​ដំបូងជាការត្រឹមត្រូវ ក៏ប៉ុន្តែ នៅឆ្នាំ ២០០៨ តុលាការកំពូលបានសម្រេចដោះលែងជនជាប់ចោទទាំងពីរឲ្យនៅក្រៅឃុំ បណ្តោះអាសន្ន ដើម្បីឲ្យតុលាការ​ឧទ្ធរណ៍​បើកការស៊ើបអង្កេត។ រហូតមកដល់ថ្ងៃទី ២៧ ខែធ្នូ ឆ្នាំ២០១២ កន្លងទៅ លោក សុក សំអឿន និងលោក ប៊ន សំណាង ត្រូវបានតុលាការឧទ្ធរណ៍ កាត់ទោសឡើងវិញ ដោយក្នុងម្នាក់ៗឲ្យជាប់ពន្ធនាគារ២០ឆ្នាំ និងពិន័យជាប្រាក់ ៤០លានរៀល ដែលស្មើនឹង ១ ម៉ឺនដុល្លារសហរដ្ឋអាមេរិក។

ចូលកាន់សាសនាគ្រិស្ត ធំជាងច្បាប់ ?

ការចោទប្រកាន់ថា លោក ប៊ន សំណាង និងលោក សុខ សំអឿន ថាបានសម្លាប់លោក ជា វិជ្ជា នេះ ត្រូវបានក្រុមអ្នក​តាម​ដានស្ថានការណ៍នយោបាយនៅកម្ពុជា យល់ឃើញថា គ្រាន់តែ ជាល្បែងនយោបាយរបស់អ្នកមានអំណាចតែប៉ុណ្ណោះ ដើម្បីជំនួសឬបិទបាំងឃាតករពិត អ្នកសម្លាប់លោក ជា វិជ្ជា។ នៅក្នុងសំណុំរឿងនេះ គេបានដឹងថា មានតែលោក ហេង ពៅ ដែលជាអតីតស្នងការរាជធានីភ្នំពេញទេ ដែលបានដឹងរឿងនេះច្បាស់។ ក៏ប៉ុន្តែលោក ហេង ពៅ បានបដិសេធមិនធ្វើ​សាក្សី​អ្វីទាំងអស់ ចំពោះករណីនេះ ក្រោមហេតុផលថា លោកបានចូលកាន់សាសនាគ្រិស្តហើយ មិនចង់ពាក់ព័ន្ធអ្វីនោះទេ។លោក ហេង ពៅ ដែលត្រួវ បានតុលាការ កាត់ទោសឲ្យជាប់ពន្ធនាគារប្រមាណជិ១០០ ឆ្នាំនៅក្នុងសំណុំរឿងចំនួន ៥ និងបច្ចុប្បន្នកំពុងតែទទួលទោសនៅក្នុងពន្ធនាគារព្រៃស ។

យ៉ាងណាក៏ដោយជុំវិញ សំណុំរឿង លោក ប៊ន សំណាង និងលោក សុខ សំអឿន នេះ កាលពីឆ្នាំ ២០០៥ កន្លងទៅ ព្រះ មហាវីរក្សត្រនៃប្រទេសកម្ពុជា សម្តេច សីហនុ បានចេញព្រះរាជសារអះអាងថា ជនជាប់ចោទទាំងពីរនាក់នេះ មិន​មែន​ជាឃាតករសម្លាប់លោក ជា វិជ្ជា ពិត ប្រាកដឡើយ។ តែអតីតព្រះមហាក្សត្រកម្ពុជាអង្គនេះ បានបញ្ជាក់ទៀតថា លោក​ពុំ​មានព្រះរាជសិទ្ធិអន្តរាគមន៍លើកលែងទោសឲ្យជនទាំងពីរនាក់ ឲ្យបានរួចលែងទោសវិញឡើយ ដោយសារតែ​ពេល​នោះ ព្រះអង្គបានដាក់រាជ្យឲ្យបុត្រព្រះអង្គ គឺព្រះបាទសម្តេច នរោត្តម សីហមុនី ព្រះមហាក្សត្រកម្ពុជាបច្ចុប្បន្ននេះ៕

---------------------------------------------------------
ដោយៈ ជា ធីរិទ្ធ - ថ្ងៃទី២៤ កញ្ញា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ