ក្រុមហ៊ុនអ័បផល (Apple) បានប្រកាសឲ្យដឹងថា ចំណូលរបស់ពួកគេមានការកើនឡើង ជាងការរំពឹងទុក នៅក្នុង​ត្រីមាសទី២នេះ។ បុន្តែបើធៀបទៅនឹងឆ្នាំមុន វាមានការធ្លាក់ចុះ ១៨%។

សេចក្តីរាយការណ៏មួយ បាននិយាយថា ក្រុមហ៊ុនអ័បផល បានទទួលចំណូលប្រមាណ ៩,៥ពាន់លានដុល្លា ទៅលើ​ផលិតផល​លក់សរុបអស់ ៤៣,៦ពាន់លានដុល្លា។ នោះជាគោលដៅដ៏ត្រឹមត្រូវមួយ ទៅតាមអ្វីៗ ដែលក្រុមហ៊ុនរំពឹងទុក និងគិតថា នឹងអាចទទួលបានចំណូលពី ៩,២៣ទៅ ១០,២៣ពានលានដុល្លា ក្នុងការលក់អស់ពី ៤១ទៅ ៤៣ពាន់​លាន​ដុល្លា។

ប៉ុន្តែបើធ្វើការប្រៀបធៀបទៅនឹងត្រីមាសដូចគ្នាកាលពីឆ្នាំមុន ក្រុមហ៊ុនអ័បផល ទទួលបានចំណូល ១១,៦ពាន់​លាន​ដុល្លា ក្នុងការលក់អស់ ៣៩,២ពានលានដុល្លា។ ប៉ុន្តែឆ្នាំនេះ ការលក់ចេញនូវផលិតផល អាយហ្វូន (iPhone) និង​អាយផេដ (iPad) លក់ដាច់រហូតដល់ ១៥១% ខណៈពេលដែលឆ្នាំមុន លក់បានត្រឹមតែ ៨៨%។

នាយកប្រតិបត្តិក្រុមហ៊ុនអ័បផល លោក ធីម ឃូក (Tim Cook) បាននិយាយថា «យើងសង្ឃឹមថា ផលចំណេញរបស់​យើង នឹងមានការកើនឡើងបន្ថែមទៀត ហើយការលក់នូវផលិតផល អាយហ្វូន និងអាយផេដ ឲ្យកាន់តែលក់​ដាច់​ខ្លាំងឡើងៗថែមទៀត។ ក្រុមការងាររបស់យើង កំពុងតែខិតខំធ្វើការងារយ៉ាងខ្លាំង ក្នុងការឆ្នៃប្រឌិតនូវរូបរាង្គ កម្មវិធី និងសេវាកម្មថ្មីៗ ជូនដល់អ្នកប្រើប្រាស់របស់យើងទាំងអស់គ្នា។»

លោក ឃូក បានបន្តទៀតថា «យើងបានលក់អាយផេដ ជិត២០លានគ្រឿង ហើយយើងជឿថាចំនួនតម្រូវការ ថេប្លិត (tablets) មានច្រើនជាង ម៉ែក (Mac)។ ប៉ុន្តែយើងនឹងធ្វើឲ្យកុំព្យូទ័រ មានភាពកាន់តែសម្បូរបែបថែមទៀត និងបន្ថែម​មុខងារជាច្រើនទៀតផងដែរ។

សំរាប់ត្រីមាសបន្ទាប់ ក្រុមហ៊ុនអ័បផល បានប្រាប់ឲ្យដឹងថា ពួកគេរំពឹងថា នឹងលក់ដាច់សរុបពី ៣៣,៥ពាន់លានដុល្លា ទៅ៣៥,៥ពាន់លានដុល្លា ហើយចំនួនភាគរយ នឹងមានការកើនឡើងចន្លោះពី ៣៦ទៅ ៣៧% គិតជាចំនួនមធ្យម។ ចំណែកឯកំរិតខ្ពស់បំផុតនោះ ពួកគេរំពឹងទុកថា នឹងលក់អស់ ៣៨,៦ពានលានដុល្លា ប្រមាណជា ៣៨,៦% នៃការកើន​ឡើង៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៤ ខែមេសា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ