មេដឹកនាំគណបក្សប្រឆាំង ដែលកំពុងមានប្រជាប្រិយភាពបានប្ដេជ្ញា ចំពោះហ្វូងអ្នកគាំទ្ររបស់ខ្លួនថា នឹងធ្វើការផ្លាស់ប្តូរ​ឲ្យ​បានក្នុងពេលឆាប់ៗ ខណៈលទ្ធផលនៃការបោះឆ្នោតកំពុងជួបភាពចម្រូងចម្រាស។ ការសន្យានេះធ្វើឡើង​នៅព្រឹក​ថ្ងៃ​ទី៣១​ខែកក្កដា ក្នុងវេទិការបញ្ចេញមតិ លើភាពមិនប្រក្រតីនៃការបោះឆ្នោត ដែលរៀបចំឡើងដោយគណបក្ស​សង្រ្គោះ​ជាតិ។

លោក កឹម សុខា និងលោក សម រង្ស៊ី ឈរពីលើរានហាន នៃអាគារគណបក្សសង្គ្រោះជាតិ។ (រូបថត គណបក្ស)

លោក កឹម សុខា អនុប្រធានគណបក្សសង្រ្គោះជាតិ បានថ្លែងទៅកាន់អ្នកគាំទ្រថា៖ «យើងថ្នាក់ដឹកនាំគណបក្ស​សង្រ្គោះជាតិ សន្យាជាមួយបងប្អូនថា យើងនឹងបំពេញបំណងបងប្អូន"ផ្លាស់ប្តូរ"ឲ្យបានជាដាច់ខាត»។

ការថ្លែងអះអាងនេះ ធ្វើឡើងក្រោយពេលលទ្ធផលបណ្តោះអាសន្ន បានបង្ហាញថាគណបក្សសង្រ្គោះជាតិ ទទួលបាន​៥៥អាសនៈ រីឯគណបក្សប្រជាជនកម្ពុជាទទួលបាន៦៨អាសនៈ។

លទ្ធផលបណ្តោះអាសន្ននេះ ត្រូវបានគណបក្សប្រឆាំងច្រានចោល និងអះអាងថាខ្លួនជាអ្នកឈ្នះ ដោយត្រូវទទួលបាន​៦៣​​អាសនៈ ក្នុងចំណោម១២៣អាសនៈ។ ទន្ទឹមនឹងនេះ គណបក្សប្រឆាំងបានស្នើឲ្យបង្កើតគណកម្មការចម្រុះមូយ ដែល​មានការ​ចូលរួមពីភាគីដែលពាក់ព័ន្ធ និងមានភាពឯករាជ្យ ដើម្បីបើកការស៊ើបអង្កេតបន្ទាន់នូវភាព មិនប្រក្រតីមួយចំនួន ដែលគណបក្ស​នេះអះអាងថា បានកើតមានឡើងក្នុងកំឡុងពេលបោះឆ្នោត។

លោក សម រង្ស៊ី អនុប្រធានគណបក្សសង្រ្គោះជាតិ បានថ្លែងទៅកាន់អ្នកគាំទ្រថា៖ «សម្លេងគាំទ្រគណបក្សកាន់អំណាច ភាគ​ច្រើនជាសម្លេងសម្លុត សម្លេងទិញ សម្លេងលួច សម្លេងខ្មោច សម្លេងខ្យល់ សម្លេងយួន តែសម្លេងគាំទ្រសង្រ្គោះជាតិ ជាសម្លេង​ខ្មែរសុទ្ធសាទ»។

លោកញ្ជាក់ថា មានប្រជាពលរដ្ឋយ៉ាងហោចណាស់១លាននាក់ បានបាត់បង់សិទ្ធិបោះឆ្នោត ដោយពួកគេភាគច្រើនបាត់​ឈ្មោះ ពីក្នុងបញ្ជីព្រោះត្រូវគេលុបឈ្មោះចេញ និងមួយចំនួនទៀត មានឈ្មោះតែត្រូវបានគេបោះជំនួសរួចហើយ និងមួយ​ចំនួនទៀត​មានឈ្នោះក្នុងបញ្ជី តែត្រូវបានគេបដិសេធ មិនឲ្យបោះដោយលើកហេតុផលផ្សេៗ។

កាលពីម្សិលមិញលោក អ៊ុច បូរិទ្ធិ រដ្ឋលេខាធិការក្រសួងការបរទេសកម្ពុជា បានថ្លែងប្រាប់អ្នកសារព័ត៌មានថា ការមិន​ទទួល​ស្គាល់លទ្ធផលនៃការបោះឆ្នោត របស់គណបក្សប្រឆាំងមិនមែនជារឿងថ្មីនោះទេ វាជារឿងដដែលៗ ព្រោះវាបាន​កើតឡើង​តាំងការបោះឆ្នោតមុនៗ មកម្ល៉េះ។

គួរបញ្ជាក់ថាគណបក្សប្រជាជនកម្ពុជា ដែលជាគណបក្សកាន់អំណាច កាលពីល្ងាចថ្ងៃទី២៨ ខែកក្កដា ឆ្នាំ២០១៣បាន​ចេញ​នូវសេចក្តីថ្លែងការណ៍មួយ ដោយអះអាងថាគណបក្សខ្លួនបានឈ្នះការបោះឆ្នោត និងទទួលបានអាសនៈគ្រប់គ្រាន់ ក្នុងការ​បង្កើតរដ្ឋាភិបាលសម្រាប់នីតិកាលទី៥។

លោក កែម ឡី អ្នកវិភាគឯករាជ្យអំពីស្ថានការណ៍នយោបាយនៅកម្ពុជា បានពន្យល់ថា គណបក្សទាំងពីរមិនគួរប្រញាប់​ប្រញាល់ ទទួលស្គាល់ ឬក៏បដិសេធអំពីលទ្ធផលបោះឆ្នោត លឿនពេកនោះទេ ខណៈរបាយការណ៍ពិតមិន​ទាន់ចេញ​ផ្សាយ។

យោងតាមប្រតិទិន នៃការបោះឆ្នោតជ្រើងតាំងតំណាងរាស្រ្តនីតិកាលទី៥ ឆ្នាំ២០១៣ បានបង្ហាញថា ការប្រកាស​លទ្ធផល​ផ្លូវការ ការបែងចែកអាសនៈ និងការកំណត់បេក្ខជនជាប់ឆ្នោត (តាមករណីគ្នានឬមានបណ្តឹង និងករណីគ្នានការ​បោះឆ្នោត​សាជាថ្មី) នឹងត្រូវធ្វើនៅចន្លោះថ្ងៃទី១៤ ខែសីហា ដល់ថ្ងៃទី៨ ខែកញ្ញា ឆ្នាំ២០១៣។

សូមរម្លឹកថា ការស្នើបង្កើតគណកម្មការចម្រុះ ដោយគណបក្សប្រឆាំងត្រូវបានបដិសេធ ដោយគណៈកម្មាធិការជាតិ​រៀបចំ​ការបោះឆ្នោត គ.ជ.ប ខណៈបក្សប្រឆាំង បានបង្ហាញគោលចំហរថា មហាបាតុកម្មទូទាំងប្រទេស​អាចនឹងកើត​មានឡើង ប្រសិនបើការបង្កើតគណកម្មការចម្រុះត្រូវបរាជ័យ។ ព័ត៌មានចុងក្រោយដែល មនោរម្យអាំងហ្វូទទួលបាន គណៈកម្មការ​ចម្រុះដែលស្នើសុំ ដោយគណបក្សប្រឆាំងនេះ ត្រូវបានស្វាគមន៍ដោយនាយករដ្ឋមន្ត្រីចាំផ្ទះ លោក ហ៊ុន សែន ហើយ នៅ​រសៀលថ្ងៃដដែល។

យើងនឹងវិលមក លំអិតព័ត៌មាននេះបន្ថែមទៀត ក្នុងអត្ថបទលើកក្រោយ៕

-------------------------------------------------------
ដោយៈ អ៊ុំ បូរី - ភ្នំពេញថ្ងៃទី៣១ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ