តើនរណាម្នាក់ ដែលមិនភ្ញាក់ផ្អើល នៅពេលបានបើកទ្វាផ្ទះ នៅព្រឹកព្រលឹមឡើង ស្រាប់តែឃើញ មានពស់​មួយ​ក្បាល នៅខាងមុខផ្ទះនោះ? ប៉ុន្តែសម្រាប់លោក ណៃ វង់ដា និងគ្រួសារ វិញ ករណីនេះ មិនត្រឹមជាការ​ភ្ញាក់​ផ្អើល មួយធម្មតានោះទេ។ លោកបានអះអាងថា នេះជាការគម្រាមមួយ ទៅលើរូបលោក ដែលជាសកម្មជនសិទ្ធិ​មនុស្ស។

បើទោះជាពស់នោះ ជាពស់ស្លាប់ ដែលត្រូវគេច្រកក្នុងស្បោង យកមកដាក់ចោល នៅខាងមុខផ្ទះលេខ ១០អេ ផ្លូវ៣៦១ សង្កាត់ច្បារអំពៅ១ ខណ្ឌច្បារអំពៅ រាជធានីភ្នំពេញក៏ដោយ តែអនុប្រធានផ្នែកសិទ្ធិមនុស្ស និង​ជំនួយ​ការផ្នែកច្បាប់ នៃសមាគមការពារសិទ្ធិមនុស្ស អាដហុក លោក ណៃ វ៉ង់ដា បានថ្លែងអះអាង ប្រាប់ទស្សនាវដ្តី​មនោរម្យ.អាំងហ្វូ ថាជាចេតនា របស់ជនអនាមិក ក្នុងការ«គម្រាម»លោកតែម្តង។ លោកបានធ្វើការ​សន្និដ្ឋាន​ថា៖ «ទីមួយ នៅភ្នំពេញគ្មានទេ ប្រភេទពស់អញ្ចឹង។ ទីពីរ ច្រកស្បោង យកមកដាក់មុខផ្ទះ ហើយបញ្ចេញក្បាល​ពស់ងាប់នោះ ថែមទាំងលានអណ្តាតមកទៀត វាហាក់ដូចជាការគម្រាមថា កុំឲ្យយើង ធ្វើសកម្មភាព​ការងារ​សិទ្ធិ​មនុស្សច្រើនពេក ខ្លាំងក្លាពេក ប្រយ័ត្នមានករណីអញ្ចឹង កើតឡើង។ (...) ខ្ញុំគិតថា វាអាចជា​ការគម្រាម។»

សម្រាប់សកម្មជនសិទ្ធិមនុស្សរូបនេះ វាមិនមែនជាលើកទីមួយទេ ដែលលោក និងគ្រួសារគិតថា ពិតជាកំពុងរង នូវការគម្រាមរបស់ ជនអនាមិកនោះ។ លោកប្រាប់ថា លើកទីមួយ មានការគម្រាមមួយ តាមរយៈគ្រោះថ្នាក់​ចរាចរណ៍ តែមិនមានគ្រោះថ្នាក់ធំដុំទេ ដោយគ្រាន់តែ កូនៗរបស់លោក មានការភិតភ័យខ្លះៗដែរ។ លើកទីពីរ មានការផ្ញើររូប ជារូបកាំភ្លើង និងគ្រាប់ ដោយជនអនាមិក ទៅក្នុងគណនេយ្យហ្វេសប៊ុក របស់ប្រពន្ធលោក។  ហើយ​នាព្រឹកថ្ងៃទី១៨ ខែមិថុនានេះ ជាលើកទីបី ដែលមានការទម្លាក់ពស់«ងាប់» នៅមុខផ្ទះលោក។

ការផ្លុងពស់ ទាក់ទងនឹងតុលាការ?

កន្លងមកនេះ មន្ត្រីសិទ្ធិមនុស្សរូបនេះ បានធ្វើសកម្មភាពខ្លាំងក្លា ទៅលើការសង្កេតការណ៍នានា ទាក់ទងនឹង​ការរំលោភសិទ្ធិមនុស្ស នៅក្នុងប្រទេសកម្ពុជា ជាពិសេសការឃ្លាំមើល ការអនុវត្តច្បាប់ របស់តុលាការកម្ពុជា។ លោក ណៃ វង់ដា ក៏ជាមន្ត្រីឯករាជ្យ វោហាបានមួយរូប នៅចំពោះអ្នកសារព័ត៌មាន ដែលតែងប្រមាញ់សុំ​ប្រតិកម្ម ឬការធ្វើអត្ថាធិប្បាយពីលោក ទាក់ទងនឹងសំនុំរឿងរសើបៗ ឬករណីនយោបាយ ដែលតែងកើតមាន​នៅ​ក្នុង​ប្រទេស។

លោកបានលើកយកសំនុំរឿងក្ដី ចោទប្រកាន់ទៅលើសកម្មជន គណបក្សសង្គ្រោះជាតិ មកបញ្ជាក់ ដោយ​​បាន​ថ្លែងជាទូទៅ ប្រាប់អ្នកសារព័ត៌មានថា៖ «ប្រសិនបើតុលាការណាមួយ ដែលមិនគោរពវិជ្ជាជីវៈ និងក្រម​សីលធម៌​ត្រឹមត្រូវ មិនមានឯករាជ្យភាព មិនផ្តល់យុត្តិធម៌ដល់ពលរដ្ឋទេ ប្រជាពលរដ្ឋកម្ពុជាទាំងអស់ ខ្ញុំសូម​អំពាវ​នាវ​កុំ​ឲ្យ​គោរព កុំឲ្យតម្លៃតុលាការបែបហ្នឹងតទៅទៀត។ តែបើតុលាការគេល្អ ចៅក្រមគេល្អ ព្រះរាជ​អាជ្ញា​គេ​ល្អ យើង​គោរព​ឲ្យតម្លៃគេទៅ។»

សំនុំរឿងរសើបចុងក្រោយ ដែលបានកើតឡើង នៅមុនមួយថ្ងៃ នៃការផ្លុងពស់នេះ គឺសមាគមរបស់លោក បាន​ដាក់មេធាវី និងការពារដល់អង្គរក្សខ្សែរទីពីរ របស់លោក សម រង្ស៊ី ត្រូវបានតុលាការខេត្តកណ្តាល ចេញដីការ​បង្គាប់ឲ្យចាប់ខ្លួន ពាក់ព័ន្ធនឹងការប្តឹងថា បានឆរបោកប្រាក់គេ ចំនួនប្រាំពាន់ដុល្លា។ នៅក្នុងករណីនេះ លោក​បាន​ផ្តល់ប្រឹក្សាយោបល់ ដើម្បីកុំឲ្យមានការចាប់ខ្លួន មន្ត្រីអង្គរក្សទាំងនោះ និងរៀបចំឲ្យមានមេធាវី ការពារ​ជា​បន្ទាន់​ដែរ។

មិនអាចសុំការបកស្រាយ ពីអាជ្ញាធរមូលដ្ឋាន ទាក់ទងនឹងករណី«ផ្លុង»ពស់ងាប់នេះបានទេ នៅក្នុងពេល​ភ្លាមៗ​នេះ៕