កាលពីថ្ងៃព្រហស្បត្តិ៍ សប្ដាហ៍មុន តុលាការក្រុងសៀងហៃ នៃប្រទេសចិនកុម្មុយនីស្ដិ៍ បានសម្រេចផ្ដន្ទាទោស លើបុរសម្នាក់ ពីបទបានសម្លាប់ភរិយាខ្លួន និងបានទុកសាកសពឲ្យកក នៅក្នុងទូទឹកកក ក្នុងរយៈពេល៣ខែ។ បុរសរូបនោះ ឈ្មោះ «Zhu Xiaodong» អាយុ៣១ឆ្នាំ ត្រូវបានតុលាការរកឃើញថា បានច្របាច់កភរិយា រហូតស្លាប់ តាំងពីឆ្នាំ២០១៦។

ប្រព័ន្ធផ្សព្វផ្សាយក្នុងស្រុក បានរាយការណ៍ឲ្យដឹងថា លោក «Zhu Xiaodong» បានខ្ចប់រាងកាយគ្មានជីវិត នៃភរិយាខ្លួន ដាក់ក្នុងភួយ ហើយបានយកទៅដាក់ក្នុងទូបង្កក ដែលស្ថិតនៅរានហាល នៃលំនៅដ្ឋានខ្លួន។ ក្នុងរយៈពេល៣ខែ ក្រោយពីហេតុការណ៍ដ៏រន្ធត់នេះ បុរសដៃឆៅ បានចេញដើរកំសាន្ដ ជាមួយស្ត្រីម្នាក់ផ្សេង ធ្វើវាហី។

» ទិដ្ឋភាពក្រុមគ្រួសារជនរងគ្រោះ ស្រែកដង្ហោយនៅខាងក្រៅតុលាការ៖

ប៉ុន្តែរឿងដែលហួសចិត្តជាងនេះ គឺរាល់ការចំណាយទាំងអស់ នៅក្នុងដំណើរកំសាន្ដទាំងនោះ ត្រូវបានបុរសប្រើថវិកា នៃសពភរិយាខ្លួន។ តុលាការក្រុងសៀងហៃ បានអះអាងបន្ថែម ជាមួយនឹងសាលក្រមរបស់ខ្លួនថា៖ «ជនជាប់ចោទ បានចំណាយដោយមិនខ្វល់អ្វីទាំងអស់ និងបានបង្ហាញថា ខ្លួនមិនមានវិប្បដិសារីអ្វីឡើយ ពីទង្វើរបស់ខ្លួន»។ 

ហើយដើម្បីលាក់បំបាំង មរណភាពនៃភរិយាខ្លួន បុរស «Zhu Xiaodong» បានសរសេរសារទាំងឡាយ ជំនួសនាងនៅលើបណ្ដាញសង្គម។ ប៉ុន្តែនៅទីបំផុត បុរសបានចូលសារភាព នៅចំពោះមុខអាជ្ញាធរ នៅមុនបុណ្យខួបកំណើត នៃឪពុកក្មេក (ឪពុកភរិយា) ខ្លួន ដែលនាងជាភរិយា ចាំបាច់ត្រូវទៅចូលរួម។

រឿងរ៉ាវខាងលើ បានបង្កឲ្យមានភាពរន្ធត់ជាទូទៅ នៅក្រុងសៀងហៃ ខណៈឪពុកម្ដាយនៃជនរងគ្រោះ បានអំពាវនាវជាសាធារណៈ ឲ្យតុលាការផ្ដន្ទាទោស ដោយ«ប្រហារជីវិត» ទៅលើបុរស «Zhu Xiaodong» ដែលជាស្វាមី និងដែលមានបេះដូង ត្រជាក់ជាងទឹកកក៕