ជាមួយនឹងរូបថតច្រើនសន្លឹក ដែលបង្ហាញពីការបំបែកកញ្ចក់រថយន្ដនោះ ព្រះសង្ឃ ប៊ុត ប៊ុនតិញ បានអះអាង នៅក្នុងគណនេយ្យ​ហ្វេស​បុក ​របស់​ព្រះ​អង្គ​ថា ឡានព្រះអង្គ ត្រូវបានជនទុច្ចរិតមិនស្គាល់មុខគប់ បង្កឱ្យបែកកញ្ចក់ខាងស្ដាំផ្នែកកណ្ដាល​នៃឡាន។ ព្រះតេជគុណបានមានថេរដីកាបន្តថា ហេតុការណ៍ បានកើតឡើង កាលពី​យប់​ថ្ងៃ​ទី​១១ កក្កដា វេលា​ម៉ោង​ប្រមាណ ២២ និង​២៣នាទី ​នៅ​​ជិតវត្តសិរីពោធិព្រឹក្ស ឃុំបន្ទាយដែក ស្រុកកៀនស្វាយ ខេត្តកណ្ដាល។

ព្រះអង្គ​ ប៊ុនតិញ បានបន្តសង្ឃដីកា​ថា ហេតុការណ៍​នេះបានកើតឡើង បន្ទាប់ពី​ក្រុមការងារបណ្ដាញព្រះសង្ឃឯករាជ្យ ដើម្បីយុត្តិធម៌​​សង្គម​​ បាន​និមន្ត​ចុះពន្យល់ពុទ្ធ​បរិស័ទ​ ឱ្យរួមគ្នាការពាររូបបដិមាបូរាណមួយ នៅក្នុងឃុំដា ស្រុក​កំពង់​លែង​ ខេត្តកំពង់ឆ្នាំង។

កាលពីពេលកន្លងមក ព្រះសង្ឃ ប៊ុត ប៊ុនតិញ បានអះអាងថា មានក្រុមសមត្ថកិច្ច តែងតាមឃ្លាំមើលព្រះអង្គ សឹងមិនលោះពេល។ ជាពិសេស ការឃ្លាំមើល និងការ​តាមដាននោះ បានធ្វើឡើង ទោះព្រះអង្គនិមន្តទៅដល់ខេត្តណាក៏ដោយ នៅក្នុងថ្ងៃទី៣០ ខែមិថុនាកន្លងទៅ។ ព្រះតេជគុណ បានបន្តសង្ឃដីកាទៀតថា ក្រុមអាជ្ញាធរហាក់ចង់បង្ហាញ ពីបំណងអ្វីមួយដល់ព្រះអង្គ ខណៈព្រះអង្គគឺជាព្រះសង្ឃ ដែលរិះគន់មិនសំចៃមាត់មួយអង្គ ទៅលើបញ្ហាសង្គម និងនយោបាយ នៅកម្ពុជា។

ស្ថាបនិកបណ្ដាញព្រះសង្ឃ ដ៏ល្បីអង្គនេះ បាន​ចាត់​ទុក​សកម្មភាព​ខាងលើ ថា​ជា​ការ​គំរាម​កំហែង ការប៉ុនប៉ងបំបាត់សម្លេង និងបង្ក​អសន្តិសុខ ​ដល់​ព្រះ​អង្គ និង​ក្រុម​ការ​ងារ​របស់ព្រះ​អង្គ។ ព្រះអង្គ​បាន​ចាត់​ទុក​ថា​សកម្មភាព​នេះ ថាមាន​ជាប់​ទាក់​ទង​ជា​មួយ​នយោបាយ ហើយសមត្ថកិច្ចរបស់រដ្ឋ​ត្រូវ​​ទទួល​ខុសត្រូវ​ ប្រសិន​ជា​មាន​បញ្ហាណាមួយ ប៉ះពាល់ដល់​ព្រះអង្គ៕