ចៅក្រម​​ម្ចាស់​​រថយន្ដ​​ដែល​​ផ្ទុះ​ឆេះ​ម្សិល​ម៉ិញ ចេញ​មុខ​បក​ស្រាយ

ហេតុការណ៍នៃការឆាបឆេះរថយន្ដ ប្រភេទ ធុនដ្រា នៅលើផ្លូវជាតិលេខ៤ នៅត្រង់ចំណុច ជិតផ្សាបែកចាន បានបង្កឲ្យមានការភ្ញាក់ផ្អើលជាខ្លាំង។ នៅចំពោះការរិះគន់ជាច្រើន ពីសំណាក់សាធារណៈមតិ ម្ចាស់​រថយន្ដ​រងគ្រោះ លោក ឆឹម ឫទ្ធី ចៅក្រមសាលាដំបូងខេត្តកំពង់ស្ពឺ បានត្រឡប់មកពន្យល់ឡើងវិញ ពីរឿងរ៉ាវ ដែលបានកើតឡើង និងពីមូលហេតុ ដែលអាចបង្កឲ្យមានអគ្គិភ័យនេះ។
ចៅក្រម​​ម្ចាស់​​រថយន្ដ​​ដែល​​ផ្ទុះ​ឆេះ​ម្សិល​ម៉ិញ ចេញ​មុខ​បក​ស្រាយ
ទិដ្ឋភាពពេលរថយន្ដ តូយ៉ូតាធុនដ្រា បានផ្ទុះឆេះខ្លាំងឡើង នៅថ្ងៃទី១០ ខែកក្កដា ឆ្នាំ២០១៧ ត្រង់ចំណុចជិតផ្សាបែកចាន។ (រូបថតលើហ្វេសប៊ុក)
Loading...
  • ដោយ: មនោរម្យ.អាំងហ្វូ (info@monoroom.info) - ភ្នំពេញ ថ្ងៃទី១១ កក្កដា ២០១៧
  • កែប្រែចុងក្រោយ: July 11, 2017
  • ប្រធានបទ: គ្រោះរថយន្ដ
  • អត្ថបទ: មានបញ្ហា?
  • មតិ-យោបល់

ហេតុការណ៍នេះ ការឆាបឆេះរថយន្ដ ប្រភេទ តូយ៉ូតាធុនដ្រា (Thundra សេរីឆ្នាំ២០១១) នៅត្រង់ចំណុចជិតផ្សារបែកចាន ក្នុងភូមិបែកចាន ឃុំ​បែក​ចាន ​ស្រុក​អង្គស្នួល ខេត្តកណ្តាល បានកើតឡើង កាលពី​វេលា​ម៉ោង​៨​ និង​១៥​នាទី​ព្រឹក​ ថ្ងៃទី​១០​ ខែកក្កដា ​ឆ្នាំ​២០១៧ និងមានរយៈពេលច្រើនម៉ោង មុននឹងត្រូវក្រុមអាជ្ញាធរ ពន្លត់ភ្លើងបានជាស្ថាពរ ដោយមានអន្តរាគមន៍ ពីរថយន្ដពន្លត់អគ្គិភ័យចំនួនពីរគ្រឿង។

ការផ្ទុះឆេះរថយន្ដ ដោយអណ្ដាតភ្លើងដ៏សន្ធោសន្ធៅ ត្រូវបានសារព័ត៌មានក្នុងស្រុកជាច្រើន យកទៅចុះផ្សាយ បង្កឲ្យមានប្រតិកម្ម និងការលើកឡើងជាច្រើន ពីសំណាក់មហាជន។ ប៉ុន្តែប្រតិកម្មទាំងនោះ មិនបានធ្វើឲ្យម្ចាស់រថយន្ដ លោក ឆឹម ឫទ្ធី ដែលជាចៅក្រម​សាលាដំបូងខេត្តកំពង់ស្ពឺផង សំដែងការយល់ព្រមនោះឡើយ និងបង្ខំចិត្ត ចេញមុខមកបកស្រាយ ពីហេតុការណ៍នេះ ទៅតាមអ្វីមួយ ដែលលោកអះអាងថា ជា«ព័ត៌មានជាក់លាក់» ក្នុងនាមលោក គ្រានត់ែជា«ជនរងគ្រោះ» ដោយឧប្បត្តិហេតុ ទាំង«មិនដឹងអី»ប៉ុណ្ណោះ។

ខាងក្រោមនេះ ជាដំណកស្រង់ទាំងស្រុង ពីការលើកឡើង៥ចំណុច របស់លោក ឆឹម ឫទ្ធី៖

១/ រថយន្តខ្ញុំនោះ គឺប្រើសាំងមិនបានប្រើប្រព័ន្ធហ្គាសនោះទេ ដោយសារបារម្មណ៍ ពីសុវត្ថិភាពនេះឯង ប៉ុន្តែនៅតែឆេះដដែល។

២/ ក្នុងកំឡុងពេល ដែលរថយន្តកំពុងរត់ នៅលើដងផ្លូវ ក្នុងល្បឿនពី៧០ ទៅ៨០គីឡូម៉ែត្រក្នុងមួយម៉ោង ក្នុងពេលនោះ ខ្ញុំបានមើលតាមកញ្ចក់ក្រោយ ឃើញភ្លើងឆេះ ចេញពីធុងសាំងកម្ពស់អណ្តាតភ្លើង ជាង១ម៉ែត្រទៅហើយ។ ពេលបានដឹងភ្លាម ខ្ញុំក៌ឈប់ឡានជាបន្ទាន់ ហើយក៌បានគិត ពីសុវត្ថិភាពរបស់បងប្អូននៅតាមដងផ្លូវ ព្រមទាំងខ្លាចឆេះផ្ទះអ្នកស្រុក និងធនាគានៅទល់មុខនេះ ខំប្រឹងតាំងចិត្តចតបន្ទាន់ នៅកណ្តាលទ្រូងផ្លូវ ដើម្បីជៀសវាងការខូចខាតច្រើន ដល់អ្នកស្រុក សុខចិត្តគិតថា យ៉ាងម៉េចជា ឆេះតែម្នាក់ឯងចុះ។

៣/ បញ្ហាបង្កការឆាបឆេះនេះ គឺអាចបណ្តាល មកពីជាងជួសជុលរថយន្ត បានប្តូរបូមសាំងឲ្យខ្ញុំ មានការខ្ជីខ្ជារមិនយកចិត្តទុកដាក់ វាយសំពងខ្លាំងៗ គ្រាន់តែដូរបូមសាំងសោះ អាចធ្លាយនៅចំណុចណាមួយ ឬរិតប្រេភ្ជាប់ មិនបានល្អដូចដើម អាចសាចប្រេង ចូលបំពង់ស៊ីម៉ាំងកំពុងក្តៅ ទើបបណ្តាលឲ្យឆាបឆេះតែម្តងទៅ។ សូមបញ្ជាក់ថា រយៈពេលប្តូរ អស់ពីរសាប្តាហ៍មកហើយ។

៤/ ចំពោះមិត្តភក្តិ ដែលបានផ្តល់ជាគំនិត ឲ្យទៅប្តឹងជាង ដើម្បីទាមទារសំណង និងការទទួលខុសត្រូវនោះ ខ្ញុំយល់ឃើញថា ស្ថានភាពជីវភាពគ្រួសារជាង មានការខ្វះខាត មានការ៉ាស់តូច ខ្ញុំសម្រេចចិត្តអហោសកម្មមិនប្តឹងផ្តល់ទេ ចាត់ទុកជាគ្រោះចង្រៃរបស់ខ្ញុំទៅចុះ។ តែសូមផ្តាំទៅជាងថា ធ្វើការឲ្យមានការយកចិត្តទុកដាក់ផង កុំខ្ជីខ្ជារនឹងការងារ។ ត្រូវចាត់ទុករថយន្តរបស់ភ្ញៀវ ដូចជារថយន្តរបស់ខ្លួន ប្រហែលជាថ្ងៃក្រោយ គ្មាននរណាម្នាក់អត់ឱនឲ្យអ្នកទៀតទេ។

៥/ ចំពោះពត៌មានមួយចំនួន ដែលបានចុះផ្សាយថា មានមនុស្សស្រីជិះជាមួយនោះ គឺជាអ្នកធ្វើការក្នុងផ្ទះ ដែលត្រូវត្រឡប់ទៅស្រុកកំណើតវិញ នៅឯកំពង់ស្ពឺ។ស្របពេលខ្ញុំត្រូវធ្វើការ ក៏ជូនទៅតែម្តង។ ពេលនេះ គេបានទៅជួបឪពុកម្តាយគេហើយ។

នៅក្នុងរបាយការណ៍របស់អាជ្ញាធរ ដែលត្រូវបានសារព័ត៌មានក្នុងស្រុកមួយចំនួន យកមកផ្សាយបន្តនោះ ក៏មានលក្ខណៈប្រហាក់ប្រហែល នឹងការលើកឡើងខាងលើ របស់លោក ឆឹម ឫទ្ធី ដែរ។ ចំណែកឯរថយន្ដ តូយ៉ូតាធុនដ្រា ដែលបានរងការខូចខាតទាំងស្រុង ត្រូវបានក្រុមអាជ្ញាធរ​អូស​ យកទៅ​រក្សាទុក​ នៅអធិការដ្ឋាន​នគរបាល​ស្រុក​អង្គស្នួល ​ដើម្បីរង់ចាំ​​​​ម្ចាស់​មក​យកទៅ​វិញ។ ​របាយការណ៍បានអះអាងដែរថា​ ដោយសារមិនមាន​ប៉ះពាល់​ ដល់​អ្នកដទៃ​ ទើបហេតុការណ៍នេះ ​មិនមាន​អ្វី​ត្រូវបន្តការស្រាវជ្រាវ ឲ្យវែងឆ្ងាយ​ឡើយ។

ដោយឡែក ចំពោះការប្រមាថ ពីសំណាក់បណ្ដាជនមួយចំនួន ទាក់ទងនឹងតួនាទីរបស់លោកនោះ ត្រូវបានលោកចៅក្រមរូបនេះ ពន្យល់ថា វាគ្រាន់តែជា «ការប្រមាថដើម្បីបន្ថយគំនុំផ្ទាល់ខ្លួន» របស់អ្នកទាំងនោះ ចំពោះរូបលោក ដែល«មិនដឹងអីសោះ»។ លោកបានរៀបរាប់បន្តថា៖ «ខ្ញុំស្រឡាញ់ណាស់យុត្តិធម៌។ លុយប៉ុន្មាន ក៍មិនអាចទិញសតិសម្បជញ្ញ: និងវិចារណញ្ញាណ របស់ខ្ញុំបានឡើយ។ (...) មនុស្សក្នុងលោក មិនថាជាតិសាសន៍ណាទេ តែងតែមានល្អ និងអាក្រក់ សូមធ្វើការបែងចែកខ្លះផង កុំប្រមាថយ៉ាងដូច្នោះ វាពិតជាមានបាបណាស់ សម្រាប់យើងជាអ្នកកាន់ព្រះពុទ្ធសាសនាដូចគ្នា។ វាសនារបស់មនុស្សមិនដូចគ្នាទេ ឧប្បត្តិហេតុកើតឡើង ម្តងគេម្តងយើង (...) គ្រាន់តែគ្រោះនោះ តូចឬធំ ដល់អាយុជីវិត ឬមិនដល់អាយុជីវិត តែប៉ុណ្ណោះ។»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ contact@monoroom.info
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...