កឹម សុខា ត្រូវបន្តនៅក្នុងពន្ធនាគារ៦ខែទៀត
- ដោយ: មនោរម្យ.អាំងហ្វូ ([email protected]) - ភ្នំពេញ ថ្ងៃទី០៥ មីនា ២០១៨
- កែប្រែចុងក្រោយ: March 05, 2018
- ប្រធានបទ: នយោបាយខ្មែរ
- អត្ថបទ: មានបញ្ហា?
- មតិ-យោបល់
-
បន្ទាប់ពីបញ្ចប់ការសាកសួរ លោក កឹម សុខា នៅឯពន្ធនាគារត្រពាំងផ្លុង ខេត្តត្បូងឃ្មុំ កាលពីវេលាម៉ោងប្រមាណ ៣ រសៀលនេះ លោក គី ឫទ្ធី ចៅក្រមស៊ើបសួរ នៃសាលាដំបូងរាជធានីភ្នំពេញ បានសម្រេចបន្តនីតិវិធី ដើម្បីឃុំខ្លួនប្រធានគណបក្សសង្គ្រោះជាតិរូបនេះ ឲ្យនៅក្នុងពន្ធនាគារ សម្រាប់រយៈពេល ៦ ខែទៀត។
អ្នកស្រី ម៉េង សុភារី មេធាវីម្នាក់ ពីក្នុងចំណោមមេធាវីទាំង៦នាក់ របស់លោក កឹម សុខា បានជំទាស់ ការបន្តនីតិវិធីខាងលើ ដោយខាងការពារក្ដី បានលើកយកមូលហេតុ ដែលទាក់ទងនឹងសុខភាព របស់មេដឹកនាំបក្សប្រឆាំងរូបនេះ ដែលចាំបាច់ ត្រូវទទួលការវះកាត់ និងព្យាបាល។
ថ្លែងពីពន្ធនាគារត្រពាំងផ្លុង នៅក្រោយមន្ត្រីតុលាការ ចុះសាកសួរកូនក្តីរបស់ខ្លួននោះ អ្នកស្រី ម៉េង សុភារី បានអះអាងថា៖ «យើងមិនចង់ឲ្យមានការពន្យារពេល នៃការឃុំខ្លួនបន្តទៀតទេ ដោយសារមូលហេតុ សុខភាពរបស់គាត់ជាចម្បង។ ដោយសារគាត់ មានបញ្ហាឆ្អឹងគាប លើសរសៃ ដែលត្រូវការវះកាត់ និងព្យាបាល។»។
អ្នកស្រី បានស្រង់សំដី របស់ចៅក្រមស៊ើបអង្កេត មកបញ្ជាក់ថា ការបន្តឃុំខ្លួននោះ ព្រោះការស៊ើបអង្កេត នៅ«មិនទាន់មូល»។ អ្នកស្រីបន្តថា ក្រុមមេធាវីនឹងប្ដឹងទាស់ ទៅកាន់សភាស៊ើបសួរ នៃសាលាឧទ្ធរណ៍ ជាបន្តទៀត ដើម្បីជំទាស់និងការសម្រេច របស់ចៅក្រមសាលាដំបូងខាងលើ។
លោក កឹម សុខា ត្រូវបានក្រុមជនប្រដាប់អាវុធ ចូលទៅចាប់ខ្លួន ដល់ក្នុងគេហដ្ឋានរបស់លោក កាលពីយប់ថ្ងៃទី ២ ចូលថ្ងៃទី ៣ ខែកញ្ញា ឆ្នាំ ២០១៧ បន្ទាប់ពីការបង្ហោះឡើងវិញ នៅលើបណ្ដាញសង្គម នូវឃ្លីបវីដេអូមួយ ដែលជាការថ្លែង របស់ប្រធានគណបក្សសង្គ្រោះជាតិ ទៅកាន់ក្រុមអ្នកគាំទ្រ នៅក្នុងប្រទេសអូស្ត្រាលី កាលពីអំឡុង ឆ្នាំ ២០១៣។ រដ្ឋាភិបាលលោក ហ៊ុន សែន បានចោទមេដឹកនាំប្រឆាំងរូបនេះ តាមរយៈវីដេអូនោះ ថាបានប្រព្រឹត្តិ «ទង្វើក្បត់ជាតិ»។
ការចោទប្រកាន់ ដែលត្រូវបានច្រានចោល ដោយគណបក្សសង្គ្រោះជាតិ ដោយហៅការឃុំខ្លួនប្រធានគណបក្សខ្លួន ថាជាវិធានការមួយ ក្នុងចំណោមយុទ្ធនាការជាច្រើន របស់រដ្ឋាភិបាលគណបក្សប្រជាជនកម្ពុជា ដើម្បីបំបាក់សម្លេងប្រឆាំងឲ្យបាន នៅមុនការបោះឆ្នោតជាតិ ដែលនឹងមកដល់ក្នុងពេលខាងមុខ។ យុទ្ធនាការទាំងនោះ បានរងការថ្កោលទោសខ្លាំងក្លា ពីសហគមន៍អន្តរជាតិ រហូតដល់មានការកាត់ជំនួយ ជាបន្តបន្ទាប់ពី សហរដ្ឋអាមេរិក និងពីសហគមន៍អឺរ៉ុប៕