អ្នកបើកបរយន្ដហោះ អាយុ៣៥ឆ្នាំ ជាតិថៃមួយរូប បានស្លាប់ក្នុងថ្ងៃសៅរ៍នេះ បន្ទាប់ពីបានកាន់​ចង្កូត​យន្ដហោះ​ ប្រភេទ​ប្រដេញ​មួយ​គ្រឿង ហើយ​យន្ដហោះ​នេះ បានជួបគ្រោះថ្នាក់ និងបានធ្លាក់បោកខ្លួន នៅ​ក្បែរ​ព្រលាន។ ការ​ហោះ​ហើរ​នេះ ជាការចូលរួមបង្ហាញផ្ទាំងទស្សនីយភាព សម្រាប់ទិវាកុមារប្រចាំឆ្នាំ ដែល​ត្រូវ​បាន​រៀបចំ​ឡើង នៅ​ក្នុង​ខេត្ត«Hat Yai» ស្ថិតនៅភាគខាងត្បូង​ប្រទេសថៃ។

យន្ដហោះប្រភេទ «JAS 39 Gripen» ដែលផលិតនៅប្រទេសស៊ុយអែដ បានហោះសំយ៉ុងខ្លួន ធ្លាក់​មក​ក្រោម មុននឹងផ្ទុះឆេះឡើង។ នៅតាមរូបភាព ដែលត្រូវអ្នកចូលរួម ក្នុងកម្មវិធីទស្សនីយភាពហោះហើរនេះ បាន​បង្ហោះ​នៅ​តាម​បណ្ដាញ​សង្គម បានបង្ហាញឲ្យឃើញ ពីអណ្ដាតភ្លើង និងខ្សែខ្មួលខ្មាញ់ ចេញ​ពី​កន្លែង​កើត​ហេតុ។ មូលហេតុ​បណ្ដាល​ឲ្យ​ធ្លាក់​យន្ដហោះនេះ នៅមិនទាន់ឲ្យដឹងនៅឡើយ។

អ្នកនាំពាក្យក្រសួងការពារជាតិថៃ លោក «Kongcheep Tantravanich» បានថ្លែងឲ្យដឹងថា៖ «អ្នក​បើកបរ​បាន​ស្លាប់ នៅ​ក្នុង​គ្រោះថ្នាក់​នេះ ហើយការស៊ើបអង្កេតមួយ ត្រូវបានបើកធ្វើ»។ លោកបានបន្ថែមទៀត​ថា មិន​មាន​នរណា​ផ្សេង បានរងគ្រោះនៅក្នុងហេតុការណ៍នេះទេ។

នៅក្នុងឱកាសនៃទិវាកុមារថៃ មូលដ្ឋានយោធាសឹងតែទាំងអស់ នៅជុំវិញប្រទេស បានបើកទ្វា​ទទួល​កុមារ និង​គ្រួសារ​របស់​ពួកគេ ដើម្បី​ចូល​ទស្សនា និងចូលរួម ក្នុងការបង្ហាញផ្ទាំងទស្សនីយភាព ដែល​និយាយ​​ពី​មហិទ្ធិរិទ្ធិ​យោធា​ថៃ៕

» រូបថតអ្នកបើកបរ ដែលប្រព័ន្ធផ្សព្វផ្សាយថៃ បានផ្សាយ៖