ម្ដាយបីសាច ស៊ីកូនខ្លួនទើបកើតបានបីថ្ងៃ នៅចិន
- ដោយ: សុបិន្ដ អត្ថបទ៖ សុបិន្ត ([email protected]) - ម៉ុងរ៉េអាល់ ថ្ងៃទី០៥ ធ្នូ ២០១៤
- កែប្រែចុងក្រោយ: December 06, 2014
- ប្រធានបទ: ហួសនិស្ស័យ
- អត្ថបទ: មានបញ្ហា?
- មតិ-យោបល់
-
ស្ត្រីគ្រូពេទ្យមួយរូប ដែលធ្វើការក្នុងមន្ទីរពេទ្យសម្ភព នាទីក្រុង សេនហ្សេន (Shenzhen - ផ្នែកខាងត្បូងនៃប្រទេសចិន) បានតក់ស្លុតយ៉ាងខ្លាំង នៅពេលនាងបានឃើញម្ដាយម្នាក់ «ស៊ី»ទារក ដែលទើបនឹងប្រសូតបានបីថ្ងៃ ចេញពីឧទររបស់ខ្លួន។ នាងបានចូលទៅទាន់ហេតុការណ៍នេះ នៅក្នុងបន្ទប់អ្នកជម្ងឺ ខណៈពេលដែលម្ដាយជនជាតិចិន នាង លី ហ្សេនហួ (Li Zhenghua) អាយុ២៤ឆ្នាំ កំពុងយកដៃខាងឆ្វេងរបស់ទារក មកខាំជញ្ជក់ឈាម។
គ្រូពេទ្យរូបនោះ បានប្រកាសអាសន្នភ្លាមៗ ហើយបានសាកល្បងរំដោះទារកដ៏កំសត់ ចេញពីម្ដាយបីសាច។ ប៉ុន្តែម្ដាយវ័យក្មេង ដែលទំនងជាកំពុងទទួលរសជាតិឆ្ងាញ់ពិសារ ពីសាច់កូនខ្លួនបង្កើតនេះ បានបដិសេធមិនព្រមបើកធ្មេញ ព្រលែងដៃកូនខ្ចីចេញឡើយ ធ្វើឲ្យការប្រទាញប្រទង់គ្នានៅពេលនោះ បានកើតឡើង។
ក្រុមគ្រូពេទ្យជាច្រើននាក់ទៀតបានមកដល់ ហើយបានយកវត្ថុមួយមកគាស់រង្វះមាត់ស្ដ្រីចម្លែក ដើម្បីឲ្យនាងខ្ជាក់ដៃរបស់ទារកមកវិញ។ អ្នកនាំពាក្យរបស់មន្ទីរពេទ្យ បានថ្លែងឲ្យដឹងថា៖ «វាជារឿងគួរឲ្យរន្ធត់ណាស់។ ដៃម្ខាងរបស់ទារក ត្រូវបានខាំចូលកប់ បង្កឲ្យមានរបួសយ៉ាងធំ និងមានឈាមហូរមក សឹងតែខ្សោះអស់ពីខ្លួនទារកនោះផង។»
ស្ត្រីជាម្ដាយវ័យក្មេងរូបនេះ ត្រូវបានគេនាំមកកាន់មន្ទីរពេទ្យ បន្ទាប់ពីគេបានឃើញនាងកំពុងឆ្លងទន្លេនៅតាមផ្លូវ។ បន្ទាប់មក នាងបានប្រសូតបុត្រនេះនៅមន្ទីរពេទ្យ ហើយក្រុមគ្រូពេទ្យកំពុងព្យាយាមស្វែងរក ញាតិមិត្តរបស់នាង។
នគរបាលបានយកសំនុំរឿងនេះ មកស្រាវជ្រាវបន្ត ហើយបានរកឃើញថា នាង ហ្សេនហួ ត្រូវបានម្ដាយក្មេកបណ្ដេញចេញពីផ្ទះ (នៅចិន ប្រពន្ធរៀបការហើយ ត្រូវទៅរស់នៅខាងប្ដី)។ គ្រួសាររបស់នាងមិនបាននិយាយប្រាប់នរណាម្នាក់ ពីសភាព (ផ្លូវចិត្ត ជម្ងឺ ឬធម្មជាតិ) របស់នាង ហ្សេនហួរ ទេ។ បើតាមទំនងមើលទៅ អ្នកម្ដាយវ័យក្មេងរូបនេះ គ្មានជម្រកនិងបានរស់នៅនៅតាមផ្លូវ តាំងពីច្រើនសប្ដាហ៍ ឬច្រើនខែមកហើយ។ ការស៊ើបអង្កេតមួយត្រូវបានបើកធ្វើ ដើម្បីកំណត់ឲ្យដឹង ពីសភាពរបស់នាង ហ្សេនហួ និងដើម្បីសម្រេចថា តើទារកតូចមួយនេះ គួរត្រូវអាជ្ញាធរយកមកបីបាច់ ឬយ៉ាងណា៕