នរណាជាឃាតករ សម្លាប់ឧកញ៉ា អ៊ឹង ម៉េងជឺ?
![នរណាជាឃាតករ សម្លាប់ឧកញ៉ា អ៊ឹង ម៉េងជឺ?](http://monoroom.info/uploads/2014/11/20141122-meutre-ppenh01.jpg)
- ដោយ: ដារា រិទ្ធ ([email protected]) - ភ្នំពេញ ថ្ងៃទី២៦ មករា ២០១៧
- កែប្រែចុងក្រោយ: January 27, 2017
- ប្រធានបទ: ឧក្រិដ្ឋកម្ម
- អត្ថបទ: មានបញ្ហា?
- មតិ-យោបល់
-
ភាពអាថ៌កំបាំង នៅតែបន្តមាន... ក្នុងសំនុំរឿងឧក្រិដ្ឋ បាញ់សម្លាប់កណ្ដាលរាជធានី យ៉ាងសហាវព្រៃផ្សៃ ពីសំណាក់ខ្មាន់កាំភ្លើងមួយរូប ទៅលើលោកឧកញ៉ា អ៊ឹង ម៉េងជឺ ឲ្យដួលស្លាប់ នៅក្នុងថ្លុកឈាមភ្លាមៗ នឹងកន្លែង កាលពីថ្ងៃទី២២ ខែវិច្ឆិកា ឆ្នាំ២០១៤កន្លងទៅ។ បុរសអ្នកមានប្រាក់ អាយុ ៥៣ឆ្នាំរូបនេះ បានចុះពីរថយន្ដធុន ឡិចស៊ីស របស់លោក នៅមុខហាងលក់ផ្លែឈើ «ឡោ តិចសេង» ម្តុំអាងទឹកអូឡាំពិក ហើយត្រូវបានបុរសមាឌក្រអាងម្នាក់ ដកកាំភ្លើងឈរជំទែងបាញ់សន្ធាប់ ឲ្យស្លាប់យ៉ាងអាណោចអាធម។
វីដេអូសុវត្ថិភាព ដែលត្រូវបានបង្ហោះផ្សាយ លើបណ្ដាញសង្គម នៅប៉ុន្មានម៉ោងក្រោយឃាតកម្ម បានបង្ហាញឲ្យឃើញថា បន្ទាប់ពីបានធ្វើសកម្មភាពរួច ខ្មាន់កាំភ្លើង បានលោតឡើង ជិះពីក្រោយម៉ូតូមួយ ដែលឈប់ចាំនៅក្បែរនោះ មុននឹងបើកចេញទៅ ដោយគ្មានភាពស្ទាក់ស្ទើរអ្វីទាំងអស់។
នៅជាងមួយសប្ដាហ៍ក្រោយមក ជនសង្ស័យ៤នាក់ ត្រូវបានចាប់ខ្លួន ជាបន្តបន្ទាប់ ក្នុងនោះមានឈ្មោះ សៀង វាសនា អាយុ៤៤ឆ្នាំ សង្ស័យជាជនដៃដល់ - កុយ ចាន់ថល អាយុ២៩ឆ្នាំ - មាស សម្បត្តិ អាយុ២៧ឆ្នាំ សង្ស័យថាជាអ្នកមើលផ្លូវ និងឈ្មោះ លី សៅ សង្ស័យជាអ្នកបើកម៉ូតូ ដឹកជនដៃដល់ឈ្មោះ សៀង វាសនា ខាងលើ។
ប៉ុន្តែជនទាំងបួននាក់ខាងលើ មិនមែនគ្រាន់តែជាជនមួយក្រុម ដែលជាប់សង្ស័យថា ប្រដាប់ដោយអាវុធ ហើយធ្វើការបាញ់បោះ សម្លាប់មនុស្សប៉ុណ្ណោះទេ។ តែគឺជាកងអង្គរក្ស របស់លោកឧកញ៉ា ថោង សារ៉ាត់ ដែលជាមន្ត្រីជាន់ខ្ពស់ខ្មែរ មានដើមកំណើតយួនមួយរូប នៅក្នុងក្រសួងការពារជាតិកម្ពុជា និងដែលត្រូវបានក្រុមអ្នកស៊ើបអង្កេត សង្ស័យថា បានបញ្ជាឲ្យមានអំពើឃាតកម្មនេះឡើង ដោយសំអាង លើការឆ្លើយសារភាព របស់ជនសង្ស័យ ឈ្មោះ សៀង វាសនា។
មកដល់ថ្ងៃនេះ ក្ដីមន្ទិលនៅតែបន្តមាន ហើយអាថ៌កំបាំង ក៏នៅរកពន្លឺមិនទាន់ឃើញនៅឡើយ បើទោះជាជនសង្ស័យទាំងអស់ រាប់ទាំងលោក ថោង សារ៉ាត់ ផង ត្រូវបានចាប់ខ្លួន និងកំពុងរងការឃុំខ្លួន នៅពន្ធនាគារ ជាបណ្ដោះអាសន្ននោះក៏ដោយ។ ជាពិសេស ការសួរដេញដោល កាលពីថ្ងៃទី២៤ ខែមករា កន្លងមកនេះ រវាងជនសង្ស័យជាខ្មាន់កាំភ្លើង ឈ្មោះ សៀង វាសនា និងមន្ត្រីតំណាងឲ្យអាជ្ញាធរ ត្រូវបានធ្វើឡើង នៅចំពោះតុលាការ សាលាដំបូងរាជធានីភ្នំពេញ បានឲ្យដឹងថា ជនសង្ស័យខ្លួនឯង ត្រូវបានបង្ខំឲ្យសារភាព ដើម្បីជាថ្នូរនឹងសាច់ប្រាក់ ចំនួន២ម៉ឺនដុល្លារ។
សារព័ត៌មាន «ដើមអំពិល» បានស្រង់ការតទល់សំដីគ្នា រវាងលោក សៀង វាសនា និងមន្ត្រីតំណាងអាជ្ញាធរ គឺលោក តេង វិសាល ជាអនុប្រធានការិយាល័យ ព្រហ្មទណ្ឌកម្រិតធ្ងន់ មកសរសេរថា៖ «ឈ្មោះ សៀង វាសនា បានសួរទៅលោក តេង វិសាល ថា តើលោកវាយខ្ញុំ និងលី សៅ ដើម្បីអ្វី? លោក តេង វិសាល ឆ្លើយថា ពុំបានវាយទេ។ ឈ្មោះ សៀង វាសនា សួរថា លោកបានបញ្ជាកូនចៅវាយខ្ញុំ និងលី សៅ (ឬ)ទេ? លោក តេង វិសាល ឆ្លើយថា ពុំបានបញ្ជាឲ្យវាយទេ។»។
កាសែតចេញផ្សាយប្រចាំថ្ងៃ បានដកស្រង់បន្តទៀតថា៖ «ឈ្មោះ សៀង វាសនា សួរថា ស្គាល់ ហ៊ុន ទូច ឬទេ? លោក តេង វិសាល ឆ្លើយថា ស្គាល់ពេលចូលបំភ្លឺ នៅប៉ូលិស។ ឈ្មោះ សៀង វាសនា បានសង្កត់ធ្ងន់ថា "ហ៊ុន ទូច និង ទូច សាវុធ" ឲ្យខ្ញុំសារភាពថា បាញ់សម្លាប់ អ៊ឹង ម៉េងជឺ ហើយឲ្យខ្ញុំទទួលលុយ ២ម៉ឺនដុល្លារពីប្រពន្ធ អ៊ឹង ម៉េងជឺ តើលោក តេង វិសាល បានដឹង(ឬ)អត់? លោក តេង វិសាល ឆ្លើយថា ពុំបានដឹងទេ។»។
មានចំណុចសង្ស័យពីរ ចេញពីសំដីរបស់លោក សៀង វាសនា៖ ចំណុចទីមួយ គឺការចូលពាក់ព័ន្ធ នៅក្នុងសំនុំរឿងនេះ ពីសំណាក់លោក ហ៊ុន ទូច និងលោក ទូច សាវុធ ដែលសុទ្ធសឹងជាមន្ត្រីនគរបាល។ រីឯចំណុចទីពីរ គឺភរិយាសពលោកឧកញ៉ា អ៊ឺង ម៉េងជឺ ត្រូវជនជាប់ចោទ អះអាងថា នឹងប្រគល់ប្រាក់ ២ម៉ឺនដុល្លារមកខ្លួន ដើម្បីឲ្យខ្លួនឆ្លើយសារភាព និងទម្លាក់កំហុស (បើតាមការឲ្យដឹង ពីសំណាក់មន្ត្រីអាជ្ញាធរ) ទៅលើលោកឧកញ៉ា ថោង សារ៉ាត់។ ចំណុចនេះ ពិបាកធ្វើឲ្យគេជឿបន្តិច។ តែបើពិតមែន គេឆ្ងល់ថា តើអ្នកស្រី តាំង គឹមឆេង ភរិយាសពលោក អ៊ឺង ម៉េងជឺ មានគោលបំណងអ្វីទៅ ទើបបានជាប្រគល់ប្រាក់ ទៅឲ្យមនុស្សម្នាក់ ដែលមិនមែនឃាតករពិត ឲ្យបង្កើតរឿងនេះឡើង។
អ្នកស្រី តាំង គឹមឆេង ក៏ដូចជាលោក ហ៊ុន ទូច និងលោក ទូច សាវុធ មិនអាចទាក់ទងភ្លាមៗ ដើម្បីសុំការបំភ្លឺ ទាក់ទងនឹងការលើកឡើង របស់ជនជាប់ចោទឈ្មោះ សៀង វាសនា ខាងលើបានទេ។
កាលពីថ្ងៃទី ៥ ខែឧសភា ឆ្នាំ២០១៥ កាសែត«កោះសន្តិភាព» បានស្រង់ប្រភពព័ត៌មាន ពីមេធាវីការពារក្តីឱ្យអ្នកស្រី តាំង គឹមឆេង មករាយការណ៍ថា ភរិយាសពជនរងគ្រោះរូបនេះ បានដាក់ពាក្យសុំចេញដីការក្សាការពារ ហាមឃាត់ទ្រព្យសម្បត្តិ និងផ្ទះសម្បែង ជាកម្មសិទ្ធិស្របច្បាប់ទាំងប៉ុន្មាន របស់លោកឧកញ៉ា ថោង សារ៉ាត់ ដែលកំពុងជាប់ឃុំនៅពន្ធនាគារ ដើម្បីទុកទូទាត់សំណងរដ្ឋប្បវេណី មកឲ្យខ្លួន ក្នុងករណីលោក ថោង សារ៉ាត់ និងគូកន ត្រូវបានរកឃើញ ថាបានប្រព្រឹត្តិឧក្រិដ្ឋកម្មខាងលើ។
ក្នុងនាមជាភាគីជនរងគ្រោះ អ្នកស្រី តាំង គឹមឆេង បានប្តឹងទារសំណងរដ្ឋប្បវេណី ទាក់ទងនឹងករណីមនុស្សឃាតនេះ នូវសំណងជំងឺចិត្ត ពីក្រុមឃាតករ ក្នុងនោះមាន៖ ជនជាមេខ្លោង ទឹកប្រាក់ចំនួន៥០លានដុល្លារអាមេរិក - ជនដៃដល់ និងអ្នកសមគំនិត ក្នុងម្នាក់ៗ ១០លានដុល្លារអាមរិក ព្រមទាំងសំណូមពរ ឱ្យតុលាការចាត់ការលើឧក្រិដ្ឋជន តាមផ្លូវច្បាប់។
សម្រាប់លោក ថោង សារ៉ាត់ វិញ ដែលបានបញ្ចេញឃ្លីបវីដេអូ យ៉ាងហោចចំនួនបី ក្នុងអំឡុងពេល នៃការរត់គេចខ្លួន ពីការតាមប្រមាញ់ របស់អាជ្ញាធរខ្មែរ អស់រយៈពេលជាច្រើនខែ បានបដិសេធការជាប់ពាក់ព័ន្ធ នៅក្នុងឃាតកម្មនេះ និងបានយំយែក សុំឲ្យមានអន្តរាគមន៍ ពីលោកនាយករដ្ឋមន្ត្រី ហ៊ុន សែន។ លោកឧកញ៉ា ដែលជាម្ចាស់ក្រុមហ៊ុន សង់បូរី «999» បានច្រានចោល ការជំពាក់ប្រាក់លោកឧកញ៉ា អ៊ឹង ម៉េងជឺ និងបានហៅការចោទប្រកាន់ រឿង«ជំពាក់ប្រាក់» ឬ«ឃាតកម្ម» មកលើរូបលោកនេះ ថាមានលក្ខណៈ «ស្វាស៊ីបាយលាបមាត់ពពែ»។
តែមនុស្សដែលជំពាក់ប្រាក់លោកឧកញ៉ា អ៊ឹង ម៉េងជឺ ទំនងជាមានច្រើននាក់។ នេះ បើតាមពាក្យបណ្តឹងមួយផ្សេងទៀត របស់អ្នកស្រី តាំង គឹមឆេង ប្ដឹងឧកញ៉ាម្នាក់ ដែលបានចេញមូលប្បទានបត្រ (Chèque) គ្មានសាច់ប្រាក់ នូវទឹកប្រាក់«ស្អុយ» ចំនួនជិត៥លានដុល្លារ ទៅឲ្យស្វាមីអ្នកស្រី កាលពីពេលនៅមានជីវិត។ ទាក់ទងនឹងព័ត៌មាននេះ គេហទំព័រ «ដើមត្នោត» បានស្រង់ប្រភពព័ត៌មាន ពីមន្ត្រីសាលាក្ដី និងអ្នកស្និតនឹងគ្រួសារជនរងគ្រោះ មកបញ្ជាក់ថា ឧកញ៉ាដែលរងការប្ដឹងនោះ គឺលោក នង សាវុត នាយកក្រុមហ៊ុនពិភពអេស៊ា ត្រេឌីង និងក្រុមហ៊ុនសុវណ្ណវឌ្ឍនៈ ដែលជាអ្នករកទទួលទាន ខាងដីធ្លីយ៉ាងសកម្មមួយរូប។
ការអះអាងថ្មី «ការបង្ខំឲ្យសារភាព ជាថ្នូរនឹងប្រាក់ពីរម៉ឺនដុល្លារ» បានបង្កើនអាថ៌កំបាំង ក្នុងរឿងឃាតកម្មកណ្ដាលរាជធានីមួយនេះ បន្ថែមពីលើការបដិសេធ របស់ជនជាប់ចោទទាំងបួន ក្នុងពេលដែលពួកគេ ត្រូវបានសាកសួរ ដោយចៅក្រមស៊ើបអង្កេត របស់សាលាដំបូងរាជធានី តាំងពីដំបូងមក។ ក្រុមអង្គរក្សទាំងបួននាក់ បានអះអាងថា រាល់ចម្លើយសារភាព ដែលពួកគេបានឆ្លើយជាមួយនគរបាល ត្រូវបានធ្វើឡើង ដើម្បីឲ្យពួកគេបានរួចផុត ពីការធ្វើទារុណកម្ម របស់ក្រុមនគរបាល។
ស្រង់សម្ដីដោយវិទ្យុអាស៊ីសេរី ផ្សាយជាភាសាយួន អង្គរក្សមួយរូប បានបញ្ជាក់ថា ខ្លួនគេគ្មានការជាប់ពាក់ព័ន្ធ ក្នុងឃាតកម្មនេះទេ ហើយបានអះអាងទៀតថា ថ្ងៃកើតហេតុ ខ្លួនគេមិនទាំងមានវត្តមាន នៅក្នុងរាជធានីភ្នំពេញផង។
គួរបញ្ជាក់ដែរថា ឪពុកម្ដាយរបស់លោកឧកញ៉ា ថោង សារ៉ាត់ ដែលមានដើមកំណើតយួនសុទ្ធ សុទ្ធសឹងជាមន្ត្រីអន្ទ្រើសៗ របស់កម្ពុជា។ ម្ដាយលោក ថោង សារ៉ាត់ គឺអ្នកស្រី កែវ សារី (ហៅចែហាយ) មានឋានរន្ដស័ក្ដិ ជាវរសេនីយ៍ទោ នៅក្រសួងការពារជាតិ និងជាអតីតទីប្រឹក្សា នៃអគ្គលេខាធិការដ្ឋានព្រឹទ្ធសភា៕