ស្រីមុំ ប្ដឹង កឹម សុខា ទារ៣សែនដុល្លារ
- ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី២២ មេសា ២០១៦
- កែប្រែចុងក្រោយ: April 23, 2016
- ប្រធានបទ: កម្ពុជា-យុត្តិធម៌
- អត្ថបទ: មានបញ្ហា?
- មតិ-យោបល់
-
«សុំតុលាការ មេត្តាជួយរកយុត្តិធម៌ ឲ្យនាងខ្ញុំជានារីទន់ខ្សោយផង» នេះជាឃ្លាមួយ នៅក្នុងសេចក្ដីសរុប ជា«សំណូមពរ»ចុងក្រោយ នៃពាក្យបណ្ដឹង របស់នាង ខុម ចាន់តារាទី ហៅ ស្រីមុំ ចុះថ្ងៃទី២២ ខែមេសា ឆ្នាំ២០១៦នេះ តាមរយៈលោក គឹម វាសនា មេធាវីថ្មីរបស់នាង។ នៅក្នុងសំណូមពរចុងក្រោយនោះ នាង ខុម ចាន់តារាទី បានទាមទារឲ្យតុលាការផ្ដន្ទាទោសលោក កឹម សុខា ដែលជាប្រធានស្ដីទីសព្វថ្ងៃ របស់គណបក្សសង្គ្រោះជាតិ បន្ថែមពីលើសំណង ៣សែនដុល្លារ ដែលនាងគិតថា ជាការជួសជុល ការខាតបង់ពេលវេលា បាត់ការងារ ខាតបង់សេដ្ឋកិច្ចគ្រួសារ ការខូចខាតកិត្តិយស និងសេចក្តីថ្លៃថ្នូររបស់នាង។
នៅក្នុងពាក្យបណ្ដឹង ដែលដាក់ចូលទៅកាន់ ព្រះរាជអាជ្ញាអមសាលាដំបូងរាជធានីភ្នំពេញ និងដែលទស្សនាវដ្ដីមនោរម្យ.អាំងហ្វូ បានទទួលមួយច្បាប់ដែរនោះ នាង ខុម ចាន់តារាទី បានសរសេរចោទលោក កឹម សុខា ថាបានធ្វើការសន្យាជាច្រើនរឿង ជាមួយនឹងរូបនាង ដូចជាសន្យាផ្ដល់លុយកាក់ ទិញផ្ទះសម្បែង និងបើកមុខរបរឲ្យជាដើម។ តែផ្ទុយទៅវិញ បន្ថែមពីលើការមិនគោរពសន្យាខាងលើ អំពើរបស់លោក កឹម សុខា បានធ្វើឲ្យនាង «ត្រូវបាត់បង់កិត្តិយសសេចក្តីថ្លៃថ្នុរ ខាតបង់ពេលវេលា ការបាត់ការងារ ខាតបង់សេដ្ឋកិច្ចគ្រួសារ»។ នេះបើតាមសេចក្ដី នៅក្នុងពាក្យបណ្ដឹងដដែល។
នាង ខុម ចាន់តារាទី ហៅស្រីមុំ បានសរសេរបន្ថែមថា៖ «ជាពិសេសនាងខ្ញុំ ជានារីដែលមិនទាន់ មានគ្រួសារនៅឡើយ (បើដូច្នេះ) សួរថា តើអ្នកណាត្រូវការ (ជ្រើសរើសយក) នាងខ្ញុំ (ជាគូអនាគត)?»
ពាក្យបណ្ដឹងរបស់នាង ខុម ចាន់តារាទី បានធ្វើឡើងតែប៉ុន្មានថ្ងៃ ក្រោយពីនាងបានចូលទៅបំភ្លឺ ក្នុងនាមជាសាក្សីមួយរូប កាលពីថ្ងៃអង្គារកន្លងមកនេះ នៅឯសាលាដំបូងរាជធានី នៅក្នុងពាក្យបណ្ដឹង របស់នាង ធី សុវណ្ណថា ដែលជាតារាល្បីឈ្មោះ នៅក្នុងបណ្ដាញសង្គមហ្វេសប៊ុក ទាក់ទងនឹងខ្សែអាត់សម្លេងបែកធ្លាយជាច្រើន ដែលនាង ធី សុវណ្ណថា គិតថាខ្លួននាង បានរងគ្រោះនឹងការបរិហារកេរ្តិ៍។ នៅក្នុងខ្សែអាត់ ដែលត្រូវបានយកមកបង្ហោះ តាមបណ្ដាញសង្គមទាំងនោះ មានការជជែកឆ្លើយឆ្លងគ្នា ដែលគេគិតថា ទំនងជាសម្លេងរបស់លោក កឹម សុខា និងនាង ខុម ចាន់តារាទី ហៅ ស្រីមុំ ដែលប្រព័ន្ធផ្សព្វផ្សាយ ក្នុងស្រុកជាច្រើនចាត់ទុកថា ជាស្ត្រីកំណាន់របស់លោក។
រីឯការចោទប្រកាន់ ទៅលើលោក កឹម សុខា នេះទៀតសោធ ក៏នាង ខុមចាន់តារាទី បានធ្វើឡើងផ្ទុយ នៅនឹងការអះអាងដោយខ្លួននាងផ្ទាល់ នៅក្នុងកិច្ចសម្ភាសជាបន្តបន្ទាប់ ទៅឲ្យសារព័ត៌មានឯករាជ្យជាច្រើន ជាពិសេសទៅឲ្យវិទ្យុអាស៊ីសេរី កាលពីថ្ងៃទី ៩ ខែមីនា ឆ្នាំ២០១៦ និងបន្ទាប់មក នៅក្នុងកម្មវិធីវេទិកាអ្នកស្ដាប់អាស៊ីសេរី នៅថ្ងៃទី១១ ខែមីនា ឆ្នាំ២០១៦។ សូមស្ដាប់កិច្ចសម្ភាសទាំងនេះ នៅក្នុងវីដេអូខាងក្រោម ដូចតទៅ៖
នៅថ្ងៃបន្តបន្ទាប់មកទៀត (ក្នុងខែមីនាដដែល) នាង ខុម ចាន់តារាទី បានត្អូញត្អែរ សម្ដែងពីក្ដីបារម្ភរបស់ខ្លួន ទាក់ទងនឹងសុវត្ថិភាពផ្ទាល់ខ្លួនរបស់នាង ក្រោយពីនាងបានផ្ដល់កិច្ចសម្ភាសទាំងនោះ មកទៅកាន់ប្រព័ន្ធផ្សព្វផ្សាយខាងលើ។ ការត្អូញត្អែរ ដែលធ្វើឲ្យមានមន្ទិលនៅថ្ងៃនេះថា តើការផ្លាស់ប្ដូរចម្លើយរបស់នាង នៅចំពោះការសាកសួរអង្កេត របស់តុលាការរាជធានី កាលពីថ្ងៃអង្គារ អាចមានជាប់ពាក់ព័ន្ធ នឹងការគម្រាម ឬការលាងសម្អាតណាមួយ ដែរឬទេ។
លិខិតចំហរ បកអាក្រាតមន្ត្រីច្រើននាក់ ដែលបង្គាប់ឲ្យនាងកុហក...
មិនត្រឹមតែពាក្យបណ្ដឹង មួយខាងលើនេះប៉ុណ្ណោះទេ នៅក្នុងថ្ងៃសុក្រទី២២ ខែមេសា ឆ្នាំ២០១៦នេះដដែល នាង ខុម ចាន់តារាទី ថែមទាំងបញ្ចេញនូវលិខិតចំហរមួយទៀត បកអាក្រាតមន្ត្រីមួយចំនួន របស់អង្គការការពារសិទ្ធិមនុស្សផ្សេងទៀត ដែលនាងបានស្នើសុំ ឲ្យមានការជួយជ្រោមជ្រែងខ្លួន កាលពីអំឡុងខែមីនា នោះផង។ មន្ត្រីជំនាញ ខាងការការពារសិទ្ធិមនុស្សទាំងនោះ រួមមានលោក នី សុខា, លោក យី សុខសាន្ត, លោក ណៃ វ៉ាន់ដា និងអ្នកស្រី លឹម មុន្នី (អ្នកទាំងបួន ជាមន្រ្តីអង្គការអាដហុក) អ្នកស្រី ធីតា ឃីៈ ប្រធានអង្គការសីលការ លោក ស៊ីន សាលី មន្រ្តីអង្គការសិទ្ធិមនុស្ស UN និងបន្ថែមទាំងលោក ស៊ាង ចែត ដែលជាមេឃុំស្រុកកំពង់សៀម ខេត្តកំពង់ចាម ម្នាក់នោះថែមទៀត។ ក្នុងលិខិតចំហរ នាង ស្រីមុំ បានចោទមន្ត្រីទាំងនោះ ថាបានបង្គាប់ឲ្យនាងនិយាយ«កុហក»។
លិខិតចំហរបកអាក្រាតនេះ បានធ្វើឡើង បន្ទាប់ពីសមាគមការពារសិទ្ធិមនុស្សអាដហុក កាលពីថ្ងៃសុក្រ បានប្រកាសថា សមាគមបានសម្រេច ឈប់ផ្តល់មេធាវីការពារក្ដី សម្រាប់នាង ខុម ចាន់តារាទី ទៀតហើយ។ សមាគមអាដហុក បានអះអាងដូច្នេះ ដោយសារនៅក្រោយពេលចូលបំភ្លឺ នៅសាលាដំបូង កាលពីថ្ងៃអង្គារកន្លងមក នាង ខុម ចាន់តារាទី មិនមែនស្ថិតក្នុងស្ថានភាពគំរាមកំហែងធ្ងន់ធ្ងរ និងគួរឲ្យព្រួយបារម្ភ ដូចដែលសមាគមយល់ឃើញ នាពេលមុននោះទេ។ សមាគមអាដហុក បានបញ្ជាក់ថា៖ “ករណីបណ្តឹងបរិហាកេរិ៍្ត វាគ្រាន់តែជារឿងវិវាទធម្មតា រវាងបុគ្គលសាមញ្ញ និងបុគ្គលសាមញ្ញ ដែលមិនស្ថិតនៅក្នុងអាណតិ្ត របស់សមាគមអាដហុក»។
សូមបញ្ជាក់ដែរថា ភ្លាមៗបន្ទាប់ពីការសាកសួរអង្កេត ទៅលើនាង ខុម ចាន់តារាទី កាលពីថ្ងៃអង្គាររួច សាលាដំបូងរាជធានីភ្នំពេញបានប្រកាស ថាតាមចម្លើយរបស់ស្ត្រីវ័យក្មេងរូបនេះ គឺលោក កឹម សុខា អនុប្រធានគណបក្សសង្រ្គោះជាតិ (និងសព្វថ្ងៃជាប្រធានស្ដីទី) បានណែនាំនាង ចាន់តារាទី មិនឲ្យនិយាយការពិតពីទំនាក់ទំនងស្នេហា ដែលត្រូវគេទម្លាយតាមខ្សែអាត់សំឡេង។ ប្រព័ន្ធតុលាការកម្ពុជា ដែលកម្រឃើញចេញមកធ្វើប្រតិកម្ម ទាក់ទងនឹងសំនុំរឿង ព្រំដែន ពុករលួយ ឧក្រិដ្ឋកម្មធំៗ... ស្រាប់តែបានបង្កនូវភាពភ្ញាក់ផ្អើល នឹកស្មានមិនដល់ តាមរយៈសេចក្តីថ្លែងការណ៍មួយរបស់ខ្លួន ចេញផ្សាយនៅថ្ងៃអង្គារដដែលនោះ ដោយបញ្ជាក់ថា៖ «ឈ្មោះ ខុម ចាន់តារាទី ហៅស្រីមុំ បានទទួលស្គាល់ថា សម្លេងក្នុងខ្សែអាត់ ជាសម្លេងរបស់ខ្លួន ហើយការដែលខ្លួនបដិសេធសម្លេងនេះកន្លងមក ដោយសារមានការណែនាំ ពីឈ្មោះ កឹម សុខា»៕